ସମାଜ ଡିଜିଟାଲ ଡେସ୍କ: ରାଷ୍ଟ୍ରୀୟ ଲୋକ ଦଳ (ଆରଏଲଡି)ର ବରିଷ୍ଠ ନେତା ତଥା ଉତ୍ତର ପ୍ରଦେଶ ସାଧାରଣ ସମ୍ପାଦକ ଶାହାଜେବ ରିଜଭି ଦଳରୁ ଇସ୍ତଫା ଦେଇଛନ୍ତି। ସଂସଦରେ ଓ୍ବାକଫ ବିଲ୍ ପାରିତ ହେବା ଏବଂ ଏହାକୁ ଦଳ ସମର୍ଥନ କରିବା ପ୍ରତିବାଦରେ ସେ ଏହି ପଦକ୍ଷେପ ନେଇଛନ୍ତି। ରିଜଭି ଏକ ଭିଡିଓ ବାର୍ତ୍ତା ଜାରି କରି ଦଳର ଅଧ୍ୟକ୍ଷ ଜୟନ୍ତ ଚୌଧୁରୀଙ୍କୁ କଡ଼ା ସମାଲୋଚନା କରିଛନ୍ତି। ଜୟନ୍ତ ବାଟବଣା ହୋଇଯାଇଛନ୍ତି। ମୁସଲମାନମାନେ ଜୟନ୍ତଙ୍କୁ ସମର୍ଥନ କଲେ। କିନ୍ତୁ ସେ ମୁସଲମାନ ସମ୍ପ୍ରଦାୟ ପ୍ରତି ଅନ୍ୟାୟ କଲେ।
ରିଜଭି ଅଭିଯୋଗ କରିଛନ୍ତି ଯେ, ଜୟନ୍ତ ଚୌଧୁରୀ ଧର୍ମ ନିରପେକ୍ଷତା ମାର୍ଗରୁ ବାଟବଣା ହୋଇଯାଇଛନ୍ତି। ତାଙ୍କ ନୀତି ମୁସଲମାନ ସମ୍ପ୍ରଦାୟଙ୍କ ହିତର ବିପରୀତ। ମୁସଲମାନମାନେ ଜୟନ୍ତଙ୍କୁ ଭୋଟ ଦେଲେ। ସେ ଆମ ସହିତ ଛିଡ଼ା ହେବା ବଦଳରେ ଓ୍ବାକଫ ବିଲ୍ର ସମର୍ଥନ କଲେ। ଏହା ଆମ ଭାବନା ଏବଂ ଅଧିକାର ବିରୋଧୀ। ପଶ୍ଚିମ ଉତ୍ତର ପ୍ରଦେଶରେ ଆରଏଲଡିର ୧୦ ବିଧାୟକ ନିର୍ବାଚିତ ହୋଇଛନ୍ତି। ସେଥିରେ ମୁସଲମାନଙ୍କର ବଡ଼ ଅବଦାନ ରହିଛି। ମୁସଲମାନମାନେ ଏକତରଫା ଦଳକୁ ଭୋଟ ଦେଇ ସଂଗଠନକୁ ମଜଭୁତ କରିଛନ୍ତି। କିନ୍ତୁ ଏବେ ଯେତେବେଳେ ସେମାନଙ୍କ ଆବଶ୍ୟକତା ଥିଲା, ସେତେବେଳେ ଦଳ ସହଯୋଗ କଲାନାହିଁ।
