ଡେସ୍କ: ମାର୍ଚ୍ଚ ଆରମ୍ଭରୁ ରେକର୍ଡ ଅତିକ୍ରମ କରୁଛି ତାତି। ରାଜ୍ୟରେ ପାରଦ ୩୬ ଡିଗ୍ରୀ ଉପରେ ରହୁଛି। ଗତକାଲି ଟିଟିଲାଗଡ଼ରେ ତାପମାତ୍ରା ଥିଲା ୪୦.୫ ଡିଗ୍ରୀ ସେଲସିୟସ। ସେହିଭଳି ବୌଦ୍ଧରେ ତାପମାତ୍ରା ମଧ୍ୟ ୪୦ ଡିଗ୍ରୀ ଛୁଇଁଥିଲା। ତେବେ ଏଭଳି ଗ୍ରୀଷ୍ମ ପ୍ରବାହରୁ ସାମାନ୍ୟ ଆଶ୍ବସ୍ତି ଦେଇଛି କାଳବୈଶାଖୀ ବର୍ଷା। ଭୁବନେଶ୍ବର ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର ନିର୍ଦ୍ଦେଶିକା ମନୋରମା ମହାନ୍ତି କହିଛନ୍ତି ମୟୂରଭଞ୍ଜ ଜିଲ୍ଲା ତଥା ବାରିପଦାରେ କାଳବୈଶାଖୀ ପ୍ରଭାବରେ ସର୍ବାଧିକ ୪୨.୮ ମିଲିମିଟର ବର୍ଷା ରେକର୍ଡ କରାଯାଇଛି।
ସୂଚନା ଅନୁଯାୟୀ, ଆସନ୍ତା ୫ ଦିନ ପାଇଁ କାଳବୈଶାଖୀ ପ୍ରଭାବରେ ବର୍ଷା ତଥା ବିଜୁଳି ଓ ଘଡ଼ଘଡ଼ି ପାଇଁ ଅରେଞ୍ଜ ୱାର୍ଣ୍ଣିଂ ଜାରି କରିଛି ପାଣିପାଗ ବିଭାଗ। ବିଶେଷକରି ଦକ୍ଷିଣ ଓ ଉପକୂଳ ଓଡ଼ିଶାର ଜିଲ୍ଲାଗୁଡ଼ିକୁ ଅରେଞ୍ଜ ୱାର୍ଣ୍ଣିଂ ଜାରି କରାଯାଇଛି। ଏହି ସବୁ ଜିଲ୍ଲା ଗୁଡ଼ିକରେ ହାଲକା ବର୍ଷା ସହ ୫୦ରୁ 60 କିମି ବେଗରେ ପବନ ଏବଂ ଘଡ଼ଘଡ଼ି ନେଇ ସତର୍କ କରାଯାଇଛି। ସେହିପରି ମୟୂରଭଞ୍ଜ, କେନ୍ଦୁଝର ଓ ସୁନ୍ଦରଗଡ଼ ଜିଲ୍ଲାକୁ ପ୍ରବଳ ବର୍ଷା ନେଇ ସତର୍କ କରାଯାଇଛି। ହାଲକାରୁ ମଧ୍ୟମ ବର୍ଷା ନେଇ ବାଲେଶ୍ବର, ଭଦ୍ରକ, ମୟୂରଭଞ୍ଜ, ବରଗଡ଼, ଦେବଗଡ଼ ଓ ଝାରସୁଗୁଡ଼ା ଜିଲ୍ଲାକୁ ମଧ୍ୟ ଅରେଞ୍ଜ ୱାର୍ଣ୍ଣିଂ ଜାରି କରାଯାଇଛି।
ସେହିପରି ବର୍ଷା, ଘଡ଼ଘଡ଼ି, ବିଜୁଳି ସହ ୪୦ରୁ ୫୦ କିମି ବେଗରେ ପବନ ବହିବା ନେଇ କେତେକ ଜିଲ୍ଲାକୁ ୟେଲୋ ୱାର୍ଣ୍ଣିଂ ଜାରି କରିଛି ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର। ସେସବୁ ଜିଲ୍ଲା ହେଉଛି ଅନୁଗୁଳ, କଳାହାଣ୍ଡି, କନ୍ଧମାଳ, ନୂଆପଡ଼ା, ବୌଦ୍ଧ, ଯାଜପୁର ଓ କେନ୍ଦ୍ରାପଡ଼ା।
ଆହୁରି ୪ ଦିନ କାଳବୈଶାଖୀ, ତାତିରୁ ମିଳିବ ଆଶ୍ବସ୍ତି pic.twitter.com/S3ueAHi0Q4
— Samaja Live (@samajalive) March 21, 2025
ଅନ୍ୟପକ୍ଷରେ ମାର୍ଚ୍ଚ ୨୨ ଶନିବାର ପାଇଁ ମୟୂରଭଞ୍ଜ, ବାଲେଶ୍ବର, ଭଦ୍ରକ ଓ କେନ୍ଦୁଝର ଜିଲ୍ଲାରେ ବର୍ଷା, ଘଡ଼ଘଡ଼ି ତଥା ପବନ ପାଇଁ ଅରେଞ୍ଜ ୱାର୍ଣ୍ଣିଂ ଜାରି କରାଯାଇଛି। ମାର୍ଚ୍ଚ ୨୪ ତାରିଖ ପରେ ଅର୍ଥାତ ୨୫ ତାରିଖରୁ ପାଗ ମୂଖ୍ୟତ ଶୁଖିଲା ରହିବ। ତେବେ ୨୨ରୁ ୨୪ ତାରିଖ ମଧ୍ୟରେ ୩ରୁ ୫ ଡିଗ୍ରୀ ପର୍ଯ୍ୟନ୍ତ ଦିନ ତାପମାତ୍ରା ହ୍ରାସ ପାଇବାର ସମ୍ଭାବନା ରହିଛି।
