ସମ୍ବଲପୁର: ରାଜ୍ୟର ବରିଷ୍ଠ ତଥା ପଶ୍ଚିମ ଓଡ଼ିଶାର ପ୍ରଥମ ଫଟୋ ସାମ୍ବାଦିକ ଦେବଦତ୍ତ ପଣ୍ଡାଙ୍କୁ ରବିବାର ସମ୍ବଲପୁର ଜିଲା ସାମ୍ବାଦିକ ସଂଘ ପକ୍ଷରୁ ସମ୍ବର୍ଦ୍ଧିତ କରାଯାଇଛି। ଦେବଦତ୍ତ ଛାତ୍ର ଜୀବନରୁ ଫଟୋଗ୍ରାଫୀ ପ୍ରତି ଆକର୍ଷିତ ହୋଇଥିଲେ। ଉଚ୍ଚ ଶିକ୍ଷିତ ହେବାସତ୍ତ୍ୱେ ସେ ଅନ୍ୟ ବୃତ୍ତିକୁ ନ ବାଛି ଫଟୋ ସାମ୍ବାଦିକତାକୁ ନିଜର ପେଷା ଭାବେ ଗ୍ରହଣ କରିଥିଲେ। ବିଭିନ୍ନ ଖବରକାଗଜ ତଥା ଓଡ଼ିଶା ଏବଂ କେନ୍ଦ୍ର ସରକାରଙ୍କ ପାଇଁ ସେ ଫଟୋ ପ୍ରେରଣ କରି ଉଚ୍ଚ ପ୍ରଶଂସିତ ହୋଇପାରିଥିଲେ। ଫଟୋ ସାମ୍ବାଦିକ ଭାବରେ ତାଙ୍କର ଅବଦାନ ଅତୁଳନୀୟ ବୋଲି ସମ୍ବଲପୁର ଜିଲା ସାମ୍ବାଦିକ ସଂଘର ସଭାପତି ସୁବାଷ ପାଣିଗ୍ରାହୀ କହିଛନ୍ତି। ସଂଘର ଏକ ପ୍ରତିନିଧି ଦଳ ଦେବଦତ୍ତ ପଣ୍ଡାଙ୍କ ଫାଟକସ୍ଥିତ ବାସଭବନକୁ ଯାଇ ତାଙ୍କର ଅବଦାନକୁ ସ୍ମରଣ କରିଥିଲେ। ତାଙ୍କୁ ଉପଢୌକନ ପୁଷ୍ପଗୁଚ୍ଛ ଏବଂ ମାନପତ୍ର ଦେଇ ସମ୍ବର୍ଦ୍ଧିତ କରାଯାଇଥିଲା। ଏହି ଅବସରରେ ଦେବଦତ୍ତ ପଣ୍ଡା ସମ୍ବଲପୁର ଜିଲା ସାମ୍ବାଦିକ ସଂଘକୁ କୃତଜ୍ଞତା ଜଣାଇବାସହ ତାଙ୍କ ସମୟର ଅଭିଜ୍ଞତା ବଖାଣିଥିଲେ। ସେ ସମୟରେ ଜଣେ ଫଟୋ ସାମ୍ବାଦିକ ହେବା ବଡ ଗୌରବର ବିଷୟ ରହିଥିଲା ବୋଲି ପ୍ରକାଶ କରିଥିଲେ। ଏହି ଅବସରରେ ସଂଘର ସାଧାରଣ ସମ୍ପାଦକ ଶଙ୍କର ବେହେରା, ବରିଷ୍ଠ ଖବରଦାତା ଶିବଶଙ୍କର ନନ୍ଦ, ପ୍ରୀୟ ରଞ୍ଜନ ବାବୁ ପ୍ରମୁଖ ଉପସ୍ଥିତ ଥିଲେ।
Popular Categories
Previous article
Next article