ସମାଜ ଡିଜିଟାଲ ଡେସ୍କ: ବାଂଲାଦେଶରେ ହିନ୍ଦୁମାନଙ୍କ ଉପରେ ହେଉଥିବା ଅତ୍ୟାଚାର ପ୍ରଭାବ ସେଠାକାର ବ୍ୟବସାୟୀଙ୍କ ଉପରେ ପଡ଼ିଛି। ଯାହାଫଳରେ ବାଂଲାଦେଶୀ ବ୍ୟବସାୟୀମାନଙ୍କୁ ପଶ୍ଚିମବଙ୍ଗ ଆସି ବେପାରବଣିଜ କରିବାକୁ ବାରଣ କରାଯାଇଛି। ମଙ୍ଗଳବାରଠାରୁ ସଲ୍ଟ ଲେକ ସେଣ୍ଟ୍ରାଲ ପାର୍କ ମେଳା ପଡ଼ିଆରେ ମଙ୍ଗଳବାରଠାରୁ ବିଧାନନଗର ମେଳା ଉତ୍ସବ ଆରମ୍ଭ ହେବାକୁ ଯାଉଛି। ଏହା ଏକ ବଡ଼ ମେଳା। ଏଠାକୁ ବିଭିନ୍ନ ରାଜ୍ୟ ସମେତ ବାଂଲାଦେଶର ବ୍ୟବସାୟୀମାନେ ଆସି ବେପାର କରନ୍ତି। କିନ୍ତୁ ସାମ୍ପ୍ରତିକ ପରିସ୍ଥିତିରେ ବାଂଲାଦେଶୀ ବ୍ୟବସାୟୀମାନଙ୍କୁ ମେଳାକୁ ନ ଆସିବାକୁ ଅନୁରୋଧ କରାଯାଇଛି। ସେମାନେ ମେଳାରେ ଷ୍ଟଲ ଖୋଲିବାକୁ ଅଗ୍ରିମ ଦେଇଥିଲେ। ହେଲେ ମେଳା ଆୟୋଜକଙ୍କ ପକ୍ଷରୁ ବ୍ୟବସାୟୀମାନଙ୍କୁ ମେଳାକୁ ଆସିବାକୁ ବାରଣ କରାଯିବା ସହିତ ସେମାନଙ୍କ ଅଗ୍ରିମ ଅର୍ଥ ଫେରସ୍ତ କରିଦିଆଯିବ ବୋଲି କୁହାଯାଇଛି।
ବିଧାନନଗର ମହାନଗର ନିଗମ ପକ୍ଷରୁ ଏହି ମେଳା ଆୟୋଜନ କରାଯାଉଛି। ଆସନ୍ତା ଜାନୁୟାରୀ ୬ ପର୍ଯ୍ୟନ୍ତ ଏହି ଶୀତକାଳୀନ ମେଳା ଚାଲିବ। ୫୦୦ ଷ୍ଟଳ ମେଳାରେ ଅଂଶଗ୍ରହଣ କରିବେ। ତେବେ ବାଂଲାଦେଶରେ ହିନ୍ଦୁମାନଙ୍କ ଉପରେ ବଢ଼ୁଥିବା ଅତ୍ୟାଚାରକୁ ଦୃଷ୍ଟିରେ ରଖି ସେଠାକାର ବ୍ୟବସାୟୀ ଏଠାକୁ ଆସିଲେ ଅସନ୍ତୋଷ ବଢ଼ିବା ଆଶଙ୍କା ଥିବାରୁ ସେମାନଙ୍କୁ ମେଳାରେ ଭାଗନେବାକୁ ବାରଣ କରାଯାଇଥିବା ଜଣାପଡ଼ିଛି।
Comments are closed.