ସମାଜ ଡିଜିଟାଲ ଡେସ୍କ: କଟକ ପରମହଂସ କାଠଯୋଡ଼ି ନଦୀ ପଠାରୁ ମହିଳାଙ୍କ ମୃତଦେହ ମିଳିବା ଘଟଣାରେ ଗିରଫ ହୋଇଛି ଅଭିଯୁକ୍ତ ସ୍ଵାମୀ। ଏକ ଟେଲର ଷ୍ଟିକରରୁ ଅଭିଯୁକ୍ତ ପାଖରେ ପହଞ୍ଚିବାରେ ସଫଳ ହୋଇଛି ପୁଲିସ। ମୃତ ମହିଳାଙ୍କ ସ୍ଵାମୀଙ୍କୁ ପୁଲିସ ଗୁଜରାଟରୁ ଗିରଫ କରିଛି। ଏଥିସହ ମୃତ ମହିଳାଙ୍କ ଘର କେନ୍ଦ୍ରାପଡ଼ା ବୋଲି ଜଣାପଡ଼ିଛି।
ସୂଚନାଯୋଗ୍ୟ, ଗତ ଶୁକ୍ରବାର କଟକ ସଦର ପରମହଂସ କାଠଯୋଡ଼ି ନଦୀପଠାରୁ ଜଣେ ମହିଳାଙ୍କ ମୃତଦେହ ଉଦ୍ଧାର ହୋଇଥିଲା। ତାଙ୍କୁ ଅତ୍ୟନ୍ତ ବୀଭତ୍ସ ଭାବେ ହତ୍ୟା କରାଯାଇଥିଲା। ମହିଳାଙ୍କ ପରିଚୟ ଲୁଚାଇବାକୁ ତାଙ୍କ ମୁହଁକୁ ନଷ୍ଟ କରି ଦେଇଥିଲା ଅଭିଯୁକ୍ତ, ଯାହା ପୁଲିସ ପାଇଁ ଚ୍ୟାଲେଞ୍ଜ ସୃଷ୍ଟି କରିଥିଲା। ଘଟଣା ସ୍ଥଳରୁ ଜବତ ହୋଇଥିବା ସାର୍ଟପ୍ୟାଣ୍ଟରେ ଲାଗିଥିବା ଟେଲର ଷ୍ଟିକର ହିଁ ପୁଲିସକୁ ଅଭିଯୁକ୍ତ ପାଖରେ ପହଞ୍ଚାଇଛି। ଷ୍ଟିକର ଦେଖି ପୁଲିସ ଟେଲର ଦୋକାନରେ ପହଞ୍ଚିଥିଲା। ଏହାପରେ ସେଠାରୁ ଅଭିଯୁକ୍ତ ସ୍ବାମୀ ପାଖରେ ପହଞ୍ଚିଥିଲା। ସ୍ତ୍ରୀକୁ ହତ୍ୟା କରିବା ପରେ ଗୁଜରାଟରେ ଆତ୍ମଗୋପନ କରିଥିଲା ସ୍ଵାମୀ।
