କେନ୍ଦୁଝରଗଡ଼: ବିଭିନ୍ନ ସମୟରେ ଚୋରି ଓ ହଜି ଯାଇଥିବା ୩୦ଟି ମୂଲ୍ୟବାନ ମୋବାଇଲକୁ କେନ୍ଦୁଝର ସାଇବର ପୁଲିସ ପକ୍ଷରୁ ଉଦ୍ଧାର ପରେ ଗୁରୁବାର ମାଲିକଙ୍କୁ ହସ୍ତାନ୍ତର କରାଯାଇଛି। କେନ୍ଦୁଝର ସାଇବର ସେଲ୍ ଓ ସାଇବର ଥାନା ପୁଲିସ ପକ୍ଷରୁ ଏକ ସ୍ୱତନ୍ତ୍ର ଅଭିଯାନ ମାଧ୍ୟମରେ ବିଭିନ୍ନ ସ୍ଥାନରୁ ଚୋରି ହୋଇଥିବା ଓ ହଜି ଯାଇଥିବା ୩୦ଟି ମୋବାଇଲକୁ ଉଦ୍ଧାର କରାଯାଇଛି। ଉପଯୁକ୍ତ ପ୍ରମାଣପତ୍ର ଦାଖଲ ପରେ ଗୁରୁବାର ଉଦ୍ଧାର ମୋବାଇଲକୁ ସମ୍ପୃକ୍ତ ମାଲିକଙ୍କୁ ଫେରସ୍ତ କରାଯାଇଛି। ଜିଲା ପୁଲିସ ମୁଖ୍ୟାଳୟରେ ଆଜି ମଧ୍ୟାହ୍ନରେ ଆୟୋଜିତ ଏକ ସ୍ୱତନ୍ତ୍ର କାର୍ଯ୍ୟକ୍ରମରେ ଆରକ୍ଷୀ ଅଧିକ୍ଷକ ନିତିନ କୁଶଲକର ଚୋରି ଓ ହଜି ଯାଇଥିବା ମୋବାଇଲ ଉଦ୍ଧାର ସମ୍ପର୍କରେ ସୂଚନା ପ୍ରଦାନ କରିବା ସହ ଆବଶ୍ୟକ ପ୍ରମାଣପତ୍ର ଦାଖଲ ପରେ ଉଦ୍ଧାର ମୋବାଇଲକୁ ସମ୍ପୃକ୍ତ ବ୍ୟକ୍ତିବିଶେଷଙ୍କୁ ଏସ୍ପି ପ୍ରଦାନ କରିଛନ୍ତି। ତେବେ ୩୦ଟି ମୋବାଇଲ ଉଦ୍ଧାର ଘଟଣାରେ ପୁଲିସ କାହାରିକୁ ଗିରଫ କରିବାକୁ ସକ୍ଷମ ହୋଇ ନ ଥିବାବେଳେ ଅଧିକ ତଦନ୍ତ ଜାରି ରହିଛି ବୋଲି ଆରକ୍ଷୀ ଅଧିକ୍ଷକ କୁଶଲକର ଗଣମାଧ୍ୟମ ପ୍ରତିନିଧିଙ୍କ ପ୍ରଶ୍ନରେ ଏହା କହିଛନ୍ତି। ଏଥିସହ ପୁଲିସ ପକ୍ଷରୁ ଏଭଳି ଅଭିଯାନ ଆଗକୁ ମଧ୍ୟ ଜାରି ରହିବା ସହ ପୁଲିସ ଜନସାଧାରଣଙ୍କ ଅଧିକ ଆସ୍ଥାଭାଜନ ନେଇ ତା’ର ଉଦ୍ୟମ ଜାରି ରଖିବ ବୋଲି ଆରକ୍ଷୀ ଅଧିକ୍ଷକ କହିଛନ୍ତି।
Comments are closed.