ସମାଜ ଡିଜିଟାଲ ଡେସ୍କ: ଚଳଚ୍ଚିତ୍ର ନିର୍ମାତା ରାମ ଗୋପାଳ ବର୍ମା ଏବେ ଗିରଫଦାରୀ ଏଡ଼ାଇବାକୁ ପ୍ରାଣପଣେ ଉଦ୍ୟମ ଜାରି ରଖିଛନ୍ତି। ମୁଖ୍ୟମନ୍ତ୍ରୀ ଏନ. ଚନ୍ଦ୍ରବାବୁ ନାଇଡ଼ୁ ଏବଂ ଅନ୍ୟ ରାଜନୈତିକ ନେତାଙ୍କ ବିଷୟରେ ଆପତ୍ତିଜନକ ପୋଷ୍ଟ କାରଣରୁ ପୁଲିସ ଲଗାତର ଭାବେ ତାଙ୍କୁ ଖୋଜୁଛି। ଇତି ମଧ୍ୟରେ ଏକ ଭିଡିଓ ବାର୍ତ୍ତା ଜାରି କରି ସେ ନିଜ ମତ ପ୍ରକାଶ କରିଛନ୍ତି। ଏହି ବାର୍ତ୍ତାରେ ସେ ତାଙ୍କ ପୋଷ୍ଟ କାରଣରୁ ତାଙ୍କ ବିରୋଧରେ ଦାଖଲ ହୋଇଥିବା ଅଭିଯୋଗ ଏବଂ ମାମଲା ସମ୍ପର୍କରେ ପ୍ରଶ୍ନ ଉଠାଇଛନ୍ତି।
ଏକ ଅଜ୍ଞାତ ସ୍ଥାନରୁ ଜାରି କରାଯାଇଥିବା ଭିଡିଓ ବାର୍ତ୍ତାରେ ରାମ ଗୋପାଳ ବର୍ମା କହିଛନ୍ତି ଯେ, ‘‘ଅଦାଲତରେ ଏହି ମାମଲା କିପରି ଗ୍ରହଣ କରାଯିବ ମୁଁ ଜାଣେ ନାହିଁ, କିନ୍ତୁ ଶେଷରେ ଏହା ଦେଶର ଆଇନ, ଯାହାକୁ ମୁଁ ନାଗରିକ ଭାବରେ ପାଳନ କରିବି।’’ ସେ କହିଛନ୍ତି ଯେ ଏହି ମାମଲାଗୁଡ଼ିକର କୌଣସି ଠୋସ୍ ଆଧାର ନାହିଁ। ଭିଡିଓ ବାର୍ତ୍ତାରେ ରାମ ଗୋପାଳ ବର୍ମା ଏହା ମଧ୍ୟ ପ୍ରକାଶ କରିଛନ୍ତି ଯେ, ଆନ୍ଧ୍ରପ୍ରଦେଶ ପୁଲିସ ପକ୍ଷରୁ ତାଙ୍କୁ ଏକ ନୋଟିସ୍ ମିଳିଛି। ସେ କହିଛନ୍ତି, ତାଙ୍କର ବୃତ୍ତିଗତ ପ୍ରତିଶ୍ରୁତି ଯୋଗୁ ସେ ପଚରାଉଚରାରେ ସହଯୋଗ କରିପାରୁ ନାହିନ୍ତି, ତେଣୁ ସେ ଅତିରିକ୍ତ ସମୟ ମାଗିଛନ୍ତି।
ରାମ ଗୋପାଳ ବର୍ମାଙ୍କ ଜାମିନ ଆବେଦନ ଉପରେ ହାଇକୋର୍ଟ ଶୁଣାଣି ନଭେମ୍ବର ୨୭ ପର୍ଯ୍ୟନ୍ତ ସ୍ଥଗିତ ରଖିଛନ୍ତି। ଏହା ପୂର୍ବରୁ ସେ କୋଏମ୍ବାଟୁର ପଳାଇଥିବା ଖବର ଆସିଥିଲା, କିନ୍ତୁ ନିକଟରେ ମିଳିଥିବା ସୂଚନା ଅନୁଯାୟୀ, ସେ ଜଣେ ଲୋକପ୍ରିୟ ଚଳଚ୍ଚିତ୍ର ତାରକାଙ୍କ ଫାର୍ମହାଉସରେ ଶରଣ ନେଇଛନ୍ତି।
