ସମାଜ ଡିଜିଟାଲ ଡେସ୍କ: ଅଷ୍ଟ୍ରେଲିଆର ପର୍ଥରେ ଅନୁଷ୍ଠିତ ୩ୟ ଦିନିକିଆରେ ପାକିସ୍ତାନ ଦଳ ଘରୋଇ ଦଳକୁ ପରାଜିତ କରିବା ସହିତ ୩ ମ୍ୟାଚ ବିଶିଷ୍ଟ ଶୃଙ୍ଖଳରେ ୨-୧ରେ ବିଜୟୀ ହୋଇଛି। ଦୀର୍ଘ ୨୨ ବର୍ଷ ପରେ ପାକିସ୍ତାନ ଦଳ ଏହି ସଫଳତା ହାସଲ କରିବା ସହିତ ନୂଆ ଇତିହାସ ରଚିଛି। ୩ୟ ଦିନିକିଆରେ ଭ୍ରମଣକାରୀ ପାକିସ୍ତାନ ଟିମକୁ ବିଜୟ ପାଇଁ ୧୪୧ ରନ ଆବଶ୍ୟକ ଥିଲା, ଯାହାକୁ ଦଳ ୨୬.୫ ଓଭରରେ ୨ ଉଇକେଟ ବିନିମୟରେ ପୂରଣ କରିନେଇଥିଲା। ପାକିସ୍ତାନୀ ବୋଲର ହରିସ ରଉଫ ଉଭୟ ପ୍ଲେୟର ଅଫ ଦ ମ୍ୟାଚ ଏବଂ ପ୍ଲେୟର ଅଫ ଦ ସିରିଜ ବିବେଚିତ ହୋଇଛନ୍ତି।
ଏହି ସିରିଜର ପ୍ରଥମ ମ୍ୟାଚକୁ ଅଷ୍ଟ୍ରେଲିଆ ଜିତି ନେଇଥିଲା। ୨ୟ ମ୍ୟାଚରେ ପାକିସ୍ତାନ ବିଜୟୀ ହୋଇଥିଲା। ସିରିଜ ଜିତିବା ପାଇଁ ଉଭୟ ଦଳକୁ ଶେଷ ମ୍ୟାଚରେ ବିଜୟ ଆବଶ୍ୟକ ଥିବାବେଳେ ପାକିସ୍ତାନ ବାଜି ମାରିନେଇଛି। ୨୦୦୨ ମସିହାରେ ପାକିସ୍ତାନ ଦଳ ଓ୍ବାକର ୟୁନୁସଙ୍କ ନେତୃତ୍ଵରେ ଅଷ୍ଟ୍ରେଲିଆ ମାଟିରେ ଦିନିକିଆ ସିରିଜ ବିଜୟୀ ହୋଇଥିଲା। ଏହା ପରଠାରୁ ଦଳ ଅଷ୍ଟ୍ରେଲିଆରେ ଦିନିକିଆ ସିରିଜ ଜିତିପାରି ନ ଥିଲା।
