ଲାଞ୍ଜିଗଡ଼: କଳାହାଣ୍ଡି ଜିଲ୍ଲା ଲାଞ୍ଜିଗଡ଼ ଥାନା ଅଞ୍ଚଳରେ ଜଣେ ଯୁବକ ନିଶା ଖାଇ ବିଶାଳ ତେନ୍ତୁଳି ଗଛ ଉପରେ ଚଡି ତୁମୁଳକାଣ୍ଡ କରିଥିବା ଦେଖିବାକୁ ମିଳିଛି। ଖବର ପାଇଁ ଲାଞ୍ଜିଗଡ଼ ପୋଲିସ ଓ ଅଗ୍ନିଶମ ବିଭାଗ ଘଟଣାସ୍ଥଳରେ ପହଞ୍ଚି ଯୁବକଙ୍କୁ ଉଦ୍ଧାର କରି ପରିବାରଙ୍କୁ ହସ୍ତାନ୍ତର କରିଛନ୍ତି। ଆଜିକୁ ଦୁଇ ବର୍ଷ ହେଲା କଳାହାଣ୍ଡି ଜିଲ୍ଲା ଲାଞ୍ଜିଗଡ଼ ବ୍ଳକ ବିଜେପୁର ଥାନା ପାହାଡ଼ପଦର ପଞ୍ଚାୟତ କାଞ୍ଚନମୁଖି ଗାଁର ଦାନା ମାଝୀଙ୍କ ପୁଅ ମାଲି ମାଝୀ (୩୦)ଓ ତାଙ୍କ ପତ୍ନୀ ତୁଳସୀ ମାଝୀ ଓ ବଡ ଭାଇ ଶୁକ୍ରୁ ମାଝୀ ଲାଞ୍ଜିଗଡ଼ ଆସି କଲୋନୀ ପଡ଼ାରେ ରହି ମିସ୍ତ୍ରୀ କାମ କରି ରହି ଆସୁଥିଲେ। ଆଜି ଅପରାହ୍ନ ୧ ସମୟରେ ମାଲି ମାଝୀ ପ୍ରବଳ ନିଶା ଖାଇ ଘର ନିକଟରେ ଥିବା ଏକ ବିଶାଳ ତେନ୍ତୁଳି ଗଛ ଉପରେ ଚଡି ଓଲ୍ଲାଇ ନପାରି ଏପାଖ ସେପାଖ ହୋଇ ଚିତ୍କାର କରି ତୁମୁଳକାଣ୍ଡ ଘଟାଇ ଥିବା ଦେଖିବାକୁ ମିଳିଥିଲେ। ଏହା ଜାଣିପାରି ଭାଇ ଶୁକ୍ରୁ ଗଛ ଚଡି ପ୍ରାୟ ୩୦ ଫୁଟ ଉଚ୍ଚତା ଉପରେ ଭାଇ ମାଲିକୁ ନିଜ ଗାମୁଛାରେ ଗଛ ଡାହିରେ ବାନ୍ଧି ରଖିଥିଲା। ଘଟଣାଟି ପଡ଼ାବାସୀ ଜାଣିବା ପରେ ପୋଲିସ ଓ ଅଗ୍ନିଶମ ବିଭାଗକୁ ଖବର ଦେଇଥିଲେ। ଲାଞ୍ଜିଗଡ଼ ପୋଲିସ ପକ୍ଷରୁ ଏଏସଆଇ ମାଝୀ ଗମାଙ୍ଗ ଓ ଅଗ୍ନିଶମ ବିଭାଗ ଘଟଣାସ୍ଥଳରେ ପହଞ୍ଚି ନିଶୁଣି ଓ ରଶି ସାହାଯ୍ୟରେ ମାଲିକୁ ଗଛ ଉପରୁ ଉଦ୍ଧାର କରି ପରିବାର ଲୋକଙ୍କୁ ହସ୍ତାନ୍ତର କରିଥିଲେ।
Comments are closed.