ସମ୍ବଲପୁର,: ସମ୍ବଲପୁର ମଣ୍ଡଳ କାରାଗାରରେ ଜମିଥିଲା ମାଦକଦ୍ରବ୍ୟର ଆସର। ଲୁଚାଚୋରାରେ କଏଦୀଙ୍କ ପାଖରେ ପହଞ୍ଚା ଯାଉଥିଲା ଗୁଟଖା, ସିଗାରେଟ, ବିଡି, ଗଞ୍ଜେଇ ଓ ଖଇନି। ଶୁକ୍ରବାର ଚଢ଼ାଉ ବେଳେ ଏହା ପଦାକୁ ଆସିଛି।
ଅପରାଧୀଙ୍କୁ ଦଣ୍ଡ ବିଧାନ ପରେ ଜେଲରେ ରଖାଯାଇଥାଏ। ହେଲେ ଜେଲ ଭିତରେ ସେମାନଙ୍କୁ ସ୍ଵତନ୍ତ୍ର ସୁବିଧା ଯୋଗାଇ ଦିଆଯାଉଛି। ଏମିତି କିଛି ଅଭିଯୋଗ ଆସିବା ପରେ ସମ୍ବଲପୁର ମଣ୍ଡଳ କାରାଗାରରେ ଶୁକ୍ରବାର ଭୋର ପ୍ରାୟ ୪ଟାରେ ଚଢ଼ାଉ କରିଥିଲା ପୁଲିସ। ଅତିରିକ୍ତ ଏସପି ଏବଂ ଏସଡିପିଓ ସଦଳବଳ ପୁଲିସ ଟିମ ସହିତ ମାଜିଷ୍ଟ୍ରେଟଙ୍କ ଉପସ୍ଥିତି ଓ ଅତିରିକ୍ତ ଏସପି ହରେଇ ପାଣ୍ଡେଙ୍କ ନେତୃତ୍ୱରେ ହୋଇଥିବା ଏହି ଚଢ଼ଉ ଅଭିଯାନରେ ସ୍ଥାନୀୟ ସଦର ଏସଡିପିଓ, ବୁର୍ଲା ଏସଡିପିଓ, ଧନୁପାଲି ଥାନାଧିକାରୀ ଙ୍କ ସମେତ ଆଖପାଖ ଥାନାର ୭ ଜଣ ଥାନାଧିକାରୀ, ୨ ପ୍ଲାଟୁନ ଫୋର୍ସ ଓ ମେଟାଲ ଡିଟେକ୍ଟର ଦଳ ସାମିଲ ରହିଥିଲେ । ସମ୍ବଲପୁର ମଣ୍ଡଳ କାରାଗାରରେ ୨୨ଟି ୱାର୍ଡ ଥିବାବେଳେ ସେଥିମଧ୍ୟରୁ ୧୮ଟି ୱାର୍ଡରେ ୫୭୬ ଜଣ କଏଦୀ ରହୁଛନ୍ତି । ସମସ୍ତ ଅନ୍ତେବାସୀ ମାନଙ୍କର ଆସବାପତ୍ର ଆଦି ଯାଞ୍ଚ କରାଯିବା ସମୟରେ ଏହି ମାଦକ ଦ୍ରବ୍ୟ ଗୁଡିକ ମିଳିଥିଲା । ଅନ୍ୟ ପକ୍ଷରେ ଏହି ଚଢ଼ଉ ସମୟରେ ଜବତ ହୋଇଥିବା ମାଦକ ଦ୍ରବ୍ୟ ଗୁଡିକ କିଭଳି ରୂପେ ଜେଲର ସୁରକ୍ଷାକୁ ଉଲ୍ଲଂଘନ କରି ପ୍ରବେଶ କରିଲା ତାହା ଏବେ ସବୁଠାରୁ ବଡ ପ୍ରଶ୍ନ ହୋଇଛି । ଏ ସମ୍ପର୍କରେ ଅତିରିକ୍ତ ଏସପି ଶ୍ରୀ ପାଣ୍ଡେ କହିଛନ୍ତି ଯେ, ଏହା ଏକ ଅଚାନକ ଚଢ଼ଉ ଥିଲା । ଚଢ଼ଉ ସମୟରେ ମିଳିଥିବା ମାଦକ ଦ୍ରବ୍ୟ ଗୁଡିକ କିଭଳି ରୂପେ ଭିତରକୁ ଗଲା ତାହା ଯାଞ୍ଚ କରାଯିବ ।
Comments are closed.