ଆଠଗଡ: ଆଠଗଡ ଗୋପବନ୍ଧୁ ବିଜ୍ଞାନ ମହାବିଦ୍ୟାଳୟର ଦୁଇ ଜଣ କର୍ମଚାରୀଙ୍କ ନାମରେ ଥାନାରେ ଅଭିଯୋଗ ଆଣିଛନ୍ତି ଜନୈକ ଅଧ୍ୟାପିକା। ଶୁକ୍ରବାର ରାତିରେ ଅଧ୍ୟାପିକା ବୀରକିଶୋରପୁର ଠାରେ ରହୁଥିବା ବାସଭବନରେ ଦୁଇ ଜଣ କର୍ମଚାରୀ ଜଣେ କିରାଣୀ ଓ ଜଣେ ଲାବୋରେଟାରୀ ଆସିଷ୍ଟାଣ୍ତ ପହଞ୍ଚି ଗାଳିଗୁଲଜ ଓ ଧମକ ଚମକ ଦେଇଥିବା ନେଇ ସେ ଅଭିଯୋଗ କରିଛନ୍ତି। ପୁଲିସ ଅଭିଯୋଗ ପରେ ୨୮୯/୨୪ ରେ ମାମଲା ରୁଜୁ କରି ତଦନ୍ତ ଜାରି ରଖିଛି।
ଏ ବିଷୟରେ ଆଇଆଇସି ଅନିରୁଦ୍ଧ ମୁଦୁଲିଙ୍କୁ ଯୋଗାଯୋଗ କରିବାରେ ଗତ ଅଗଷ୍ଟ ୧୫ ତାରିଖରେ କଲେଜରେ କୌଣସି କାରଣରୁ ସଂପୃକ୍ତ ଅଧ୍ୟାପିକା ଓ କର୍ମଚାରୀମାନଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା ଏବଂ ପରବର୍ତ୍ତୀ ସମୟରେ ହୋଇଥିବା ଘଟଣାର ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ପ୍ରକାଶ କରିଛନ୍ତି। ଅନ୍ୟ ପକ୍ଷରେ କଲେଜ ଘଟଣା ଥାନାରେ ପହଞ୍ଚିବା ନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି। ଗତ କିଛିଦିନ ହେଲାଣି ବିଭିନ୍ନ କାରଣରୁ କଲେଜର ବାତାବରଣ ଖରାପ ହୋଇଥିବାରୁ ତାହା ଶିକ୍ଷାଦାନ ଉପରେ ମଧ୍ଯ ପ୍ରଭାବ ପକାଉଥିବା ଅଭିଯୋଗ ହେଉଛି ।
କଲେଜ ଅଧ୍ୟକ୍ଷ ଓ ପରିଚାଳନା କମିଟିର ସଭାପତି ତଥା ଉପଜିଲ୍ଲାପାଳ ତୁରନ୍ତ କଲେଜର ବିବାଦର ସମାଧାନ ଦିଗରେ ପଦକ୍ଷେପ ନେଇ କଲେଜରେ ଏକ ସୁସ୍ଥ ଶୈକ୍ଷିକ ବାତାବରଣ ସୃଷ୍ଟି କରିବା ପାଇଁ ଦାବି ଆଠଗଡବାସୀଙ୍କ ପକ୍ଷରୁ ଦାବି ହେଉଛି।
Comments are closed.