ରେଙ୍ଗାଲିକ୍ୟାମ୍ପ: ଅତାବିରା ମିନକେତନ ନଗର ,ୱାର୍ଡ ନଂ ୭ରେ ରହନ୍ତି ଏକା ମେହେର ଓ ପତ୍ନୀ ମମତା ମେହେରଙ୍କ ଏକମାତ୍ର ଝିଅ ସୋନିଆ, ଯିଏ କି ଜନ୍ମରୁ ଶତ ପ୍ରତିଶତ ଶାରୀରିକ ଓ ମାନସିକ ଅକ୍ଷମ। ଏକା ମେହେର ମିଠା ଦୋକାନରେ କାମ କରି ଯାହା ରୋଜଗାର କରନ୍ତି ସେଥିରେ ପରିବାରର ଗୁଜୁରାଣ ମେଣ୍ଟେ। ଝିଅ ପାଇଁ ପତି ପତ୍ନୀଙ୍କ ମନରେ ସବୁବେଳେ ଦୁଃଖ। ମମତାଙ୍କ ରାସନ୍ କାର୍ଡ ବ୍ୟତୀତ ଅନ୍ୟ କୌଣସି ସରକାରୀ ସହାୟତା ମିଳୁନି ପରିବାରଙ୍କୁ। ଏ ନେଇ ଗତ ୧୪ ତାରିଖରେ ସମାଜ ଖବର କାଗଜରେ ଏକ ଖବର ପ୍ରକାଶିତ ହୋଇଥିଲା। ସେହି ଦିନ ଉକ୍ତ ଖବରକୁ ମୁଖ୍ୟମନ୍ତ୍ରୀଙ୍କ ନିକଟକୁ ଟ୍ୱିଟ କରିଥିଲେ ଜିଲ୍ଲାର ତିନି ଜଣ ଯୁବକଯୁବତୀ ରମେଶ ମେହେର, ଦିପା ବାରିକ୍ ଓ ମନୋଜ କନ୍ଧେର।
ଫଳରେ ସେହି ୧୪ ତାରିଖ ଦିନ ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶ କ୍ରମେ ଏନଏସି କର୍ତ୍ତୃପକ୍ଷ ପରିବାରକୁ ଫୋନ ମାଧ୍ୟମରେ ଡକାଇ ସ୍ଵାଧୀନତା ଦିବସ (ଅଗଷ୍ଟ ୧୫) ଅବସରରେ ସୋନିଆଙ୍କୁ ଏକ ହୂଇଲ୍ ଚେୟାର ପ୍ରଦାନ କରିଥିଲେ। ଏହା ବ୍ୟତୀତ ସରକାରୀ ନିୟମ ବିଧିରେ ଯାହା ସବୁ ସମ୍ଭବ, ସେହି ସବୁ ସରକାରୀ ସହାୟତା ଯୋଗାଇ ଦିଆଯିବ ବୋଲି ଏନଏସି ଅଧ୍ୟକ୍ଷ ବନମାଳୀ ବରିହା, କାଉନସିଲର ବିଲସ ଯୋନପୁରୀ ତଥା ଏନଏସିର କର୍ତ୍ତୃପକ୍ଷ ପରିବାର ବର୍ଗଙ୍କୁ ପ୍ରତିଶ୍ରୁତି ଦେଇଛନ୍ତି। ଏହି ପ୍ରତିଶ୍ରୁତି ପରେ ସୋନିଆଙ୍କ ପିତାମାତା ମନରେ କିଛିଟା ଆଶ୍ଵସ୍ଥି ଅନୁଭବ କରୁଛନ୍ତି। ତେବେ ଆଗକୁ ଦେଖାଯାଉ ସୋନିଆଙ୍କ ପାଇଁ ମିଳିଥିବା ପ୍ରତିଶ୍ରୁତି ପାଳନ ହେଉଛି ନା ପ୍ରତିଶ୍ରୁତିରେ ହିଁ ରହିଯାଉଛି।
