ଗୋପାଳପୁର: ବ୍ରହ୍ମପୁର ବିଶ୍ଵବିଦ୍ୟାଳୟ ସାମ୍ବାଦିକ ଗଣ ଯୋଗାଯୋଗ ବିଭାଗରେ ଆଜି ଜାତୀୟ ପତାକା ଦିବସ ପାଳନ ଅବସରରେ ପୁଣିଥରେ ଭଞ୍ଜବାଣୀ ରେଡ଼ିଓ ଆରମ୍ଭ ହୋଇଛି। ବିଶ୍ଵବିଦ୍ୟାଳୟ କୁଳପତି ପ୍ରଫେସର ଗୀତାଞ୍ଜଳି ଦାଶ ପକ୍ଷରୁ ଦୁଇ ବର୍ଷ ହେଲା ବନ୍ଦ ରହିଥିବା ଭଞ୍ଜବାଣୀ ରେଡ଼ିଓକୁ ପୁନଃବାର ଆରମ୍ଭ କରିବାକୁ ପରାମର୍ଶ ଦେଇଥିଲେ। ଆବଶ୍ୟକ ବେଳେ ସମସ୍ତ ସହଯୋଗ କରିବେ ବୋଲି କହିଥିଲେ। ଓଡିଶାର ପ୍ରଥମ ସାମ୍ବାଦିକ ଗଣ ଯୋଗାଯୋଗ ବିଭାଗ ତଥା ବିଭାଗର ସ୍ବର୍ଣ୍ଣ ଜୟନ୍ତୀକୁ ନଜରରେ ରଖି ବିଭାଗୀୟ ମୁଖ୍ୟ ଡ଼. ବନ୍ଦିତା ପଣ୍ଡା ଆଜି ଭଞ୍ଜବାଣୀ ପୁଣିଥରେ ଆରମ୍ଭ କରିଥିଲେ। ଆଜି ଆରମ୍ଭରୁ ବନ୍ଦେ ମାତରଂ ଗାନ କରି ଏହାର ଆରମ୍ଭ ହୋଇଥିଲା। ଆଜିର ଖବର ପାଠିକା ସାଇନି କର୍ମକାର ଖବର ପାଠ କରିଥିଲେ। ଏହାର ବାର୍ତ୍ତା ଶୁଣିବା ପାଇଁ ବିଭାଗ, ପିଜି କାଉନସିଲ ଅଫିସ ଏବଂ ପ୍ରଶାସନିକ କୋଠାରେ ସ୍ପିକର ଖଞ୍ଜା ଯାଇଛି। ଆଗାମୀ ଦିନରେ ନାଲକୋ ଗେଟ, ଲାଇବ୍ରେରୀ, ଛାତ୍ର, ଛାତ୍ରୀ ନିବାସରେ ବାର୍ତ୍ତା ଶୁଣିବା ପାଇଁ ସ୍ପିକର ଖଞ୍ଜା ଯିବ ବୋଲି କୁଳପତି ପ୍ରଫେସର ଦାଶ କହିଛନ୍ତି। ଆଜିର କାର୍ଯ୍ୟକ୍ରମରେ ଡ଼. ଚିନୁ ବହିଦାର, ଡ଼. ମିହିର ତ୍ରିପାଠୀ, ସହଯୋଗୀ ଦୀପିକା ମଣ୍ଡଳ ଉପସ୍ଥିତ ଥିବା ବେଳେ ବିଭାଗର ପ୍ରଫେସର ଗଣେଶ ସେଠୀ, ଡ଼. ଜୟନ୍ତ ପଣ୍ଡା, ଅଗ୍ନ୍ନି ବେହେରା ପ୍ରମୁଖ ସହଯୋଗ କରିଥିଲେ। ଏହି କାର୍ଯ୍ୟକ୍ରମ ପ୍ରତ୍ୟେକ ଦିନ ଚାଲୁ ରହିବ ବୋଲି ବିଭାଗୀୟ ମୁଖ୍ୟ ଡ଼. ପଣ୍ଡା କହିଛନ୍ତି।
Comments are closed.