ନାକଟିଦେଉଳ: ଘର ଭିତରେ ଶୋଇଥିବାବେଳେ ବିଷାକ୍ତ ଚିତି ସାପ ଦଂଶନରେ ଜଣେ ଯୁବତୀଙ୍କର ମୃତ୍ୟୁ ଘଟିଛି। ମୃତ ଯୁବତୀ ଜଣଙ୍କର ନାମ ରଚନା ମହାକୁଡ଼ ବୋଲି ଜଣାପଡିଛି। ତାଙ୍କ ଘର ଦେବଗଡ଼ ଜିଲ୍ଲା ରିଆମାଳ ଥାନା ଅନ୍ତର୍ଗତ ଟୁହିଲାମାଳ ଗାଁରେ। ମିଳିଥିବା ସୂଚନା ଅନୁସାରେ ରଚନା ମହାକୁଡ଼ ଶନିବାର ରାତିରେ ଖିଆପିଆ ସାରି ଘର ଭିତରେ ଶୋଇଥିଲେ। ବିଳମ୍ବିତ ରାତିରେ ଏକ ବିଷାକ୍ତ ଚିତି ସାପ ତାଙ୍କ ହାତ ପାପୁଲିକୁ ଚୋଟ ମାରିଥିଲା । ସାପ କାମୁଡିବା ଜାଣିବା ପରେ ସେ ପାଟି କରିବାରୁ ପରିବାର ଲୋକେ ଉଠି ପଡି ତାଙ୍କ ପାଖକୁ ଆସିଥିବାବେଳେ ଉକ୍ତ ସାପ ଟି ଖଟ ଉପରେ ଥିବା ଦେଖିବାକୁ ପାଇଥିଲେ । ପରେ ଗୁରୁତର ଅବସ୍ଥାରେ ତୁରନ୍ତ ଆହତ ରଚନା କୁ ଆମ୍ବୁଲାନ୍ସ ଯୋଗେ ନାକଟିଦେଉଳ ଡାକ୍ତରଖାନାକୁ ଆଣିଥିଲେ। ହେଲେ ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ। ଖବର ପାଇ ପୁଲିସ୍ ଡାକ୍ତରଖାନାରେ ପହଞ୍ଚି ମୃତଦେହକୁ ଜବତ କରିବା ସହ ବ୍ୟବଚ୍ଛେଦ ପାଇଁ ରେଢ଼ାଖୋଲ ଡାକ୍ତରଖାନାକୁ ପଠାଇ ଥିବା ଜଣାପଡିଛି । ମୃତ ଯୁବତୀର ପରିବାର ଗରିବ ଶ୍ରେଣୀର ହୋଇଥିବାରୁ ଶୀଘ୍ର ସରକାରୀ କ୍ଷତିପୂରଣ ଯୋଗାଇ ଦେବାକୁ ଦାବୀ ହୋଇଛି ।
Comments are closed.