ଭାରତ ସହ ସମ୍ପର୍କ ସୁଧାରିବାକୁ ଜିନ୍‌ପିଙ୍ଗ ଆଗ୍ରହୀ

ବେଜିଂ : ଭାରତ ସହିତ ଦ୍ବିପାକ୍ଷିକ ସମ୍ପର୍କରେ ଲାଗି ରହିଥିବା ତିକ୍ତତାକୁ ସୁଧାରିବା ଲାଗି ଚୀନ ରାଷ୍ଟ୍ରପତି ସି ଜିନ୍‌ପିଙ୍ଗ ଆଗ୍ରହ ପ୍ରକାଶ କରିଛନ୍ତି। ଦୁଇଦେଶର କୂଟନୈତିକ ସମ୍ପର୍କର ୭୫ବର୍ଷ ପୂରଣ ଅବସରରେ ମଙ୍ଗଳବାର ଭାରତର ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ନିକଟକୁ ପଠାଇଥିବା ଶୁଭେଚ୍ଛା ବାର୍ତ୍ତାରେ ଜିନପିଙ୍ଗ କହିଛନ୍ତି ଭାରତ-ଚୀନ ସମ୍ପର୍କ ହାତୀ-ଡ୍ରାଗନ ଲଢେଇରୁ ଉପରକୁ ଉଠିବା ଦରକାର। ସେ କହିଛନ୍ତି ଯେ ଭାରତ ଓ ଚୀନ ସମ୍ପର୍କରେ ଉନ୍ନତି ଆସିବା ସହିତ ଆନ୍ତର୍ଜାତିକ ବ୍ୟାପାରରେ ପରସ୍ପରର ସହଯୋଗ କରିବା ଦରକାର। ୨୦୨୦ରେ ପୂର୍ବ ଲଦାଖର ଗଲୱାନ ଉପତ୍ୟକାରେ ଦୁଇଦେଶର ସୈନିକଙ୍କ ମଧ୍ୟରେ ସଂଘର୍ଷ ପରେ ଭାରତ ସମ୍ପର୍କକୁ ସୁଧାରିବା ଦିଗରେ ପ୍ରୟାସ ଚଳାଇଥିବାବେଳେ ଜିନ୍‌ପିଙ୍ଗ ଏପରି ଆଗ୍ରହ ପ୍ରକାଶ କରିଛନ୍ତି। ଜିନପିଙ୍ଗ କହିଛନ୍ତି ଯେ ପଡୋଶୀମାନେ ସର୍ବଦା ଶାନ୍ତିପୂର୍ଣ୍ଣ ସହାବସ୍ଥାନ ନିମନ୍ତେ ରାସ୍ତା ବାହାର କରିବା ଦରକାର। ତେଣୁ ଆନ୍ତର୍ଜାତିକ ବ୍ୟାପାରରେ ଭାରତ ସହିତ ଚୀନ ଯୋଗାଯୋଗ ଓ ସମନ୍ବୟକୁ ମଜଭୁତ କରିବାକୁ ଚାହେଁ ବୋଲି ସେ କହିଛନ୍ତି। ଏହା ସହିତ ସୀମାନ୍ତ ଅଞ୍ଚଳରେ ଶାନ୍ତି ବଜାୟ ରଖିବା ଲାଗି ଦୁଇଦେଶ ମିଳିତ ଭାବେ କାମ କରିବା ଦରକାର। ଭାରତ ଓ ଚୀନ କୂଟନୈତିକ ସମ୍ପର୍କର ୭୫ତମ ବାର୍ଷିକ ଅବସରରେ ଦୁଇ ରାଷ୍ଟ୍ର ପରସ୍ପରକୁ ଅଭିନନ୍ଦନ ଜଣାଇଛନ୍ତି। ଦୁଇଦେଶର ରାଷ୍ଟ୍ରପତି ଓ ପ୍ରଧାନମନ୍ତ୍ରୀ ପରସ୍ପରକୁ ଅଭିନନ୍ଦନ ବାର୍ତ୍ତା ପଠାଇଛନ୍ତି। ଏହି ଅବସରରେ ଚୀନ ବୈଦେଶିକ ମନ୍ତ୍ରଣାଳୟ ମୁଖପାତ୍ର ଗୌ ଜିଆକୁନ କହିଛନ୍ତି ଯେ ଦୁଇଦେଶର ପ୍ରାଚୀନ ସଭ୍ୟତା ରହିଥିବାବେଳେ ବିଶ୍ବର ପ୍ରମୁଖ ବିକାଶଶୀଳ ରାଷ୍ଟ୍ର। ତେଣୁ ଦୁଇଦେଶ ବିଭିନ୍ନ କ୍ଷେତ୍ରରେ ପରସ୍ପରର ସହଭାଗୀ ହେବା ଦରକାର। ଦୁଇଦେଶ ମଧ୍ୟରେ ରହିଥିବା ସୀମା ବିବାଦକୁ ଆପୋସ ଆଲୋଚନା ଦ୍ବାରା ସମାଧାନ କରିବା ଦରକାର।