ପୁରୀ: ଗୁଣ୍ଡିଚା ମନ୍ଦିରରେ ମହାପ୍ରଭୁଙ୍କ ଜନ୍ମବେଦୀ ଲୀଳା ଚାଲିଥିବାବେଳେ ସେଠୁ ବି ଆସୁଛି ନୀତିକାନ୍ତି ବିଳମ୍ବର ଖବର। ଶୁକ୍ରବାର ସକାଳ ଧୂପ ମଧ୍ୟାହ୍ନ ୧୨ଟା ୪୫ରେ ସମ୍ପନ୍ନ ହୋଇଥିବାବେଳେ ଅପରାହ୍ନ ୩ଟା ପରେ ପ୍ରଥମ ଭୋଗ ମଣ୍ଡପ ଶେଷ ହୋଇଛି। ଫଳରେ ମହାପ୍ରସାଦ ବାହାରିବା ବେଳକୁ ଅପରାହ୍ନ ୪ଟା ବାଜି ଯାଇଥିଲା। ସେହିପରି ମଧ୍ୟାହ୍ନ ଧୂପ ଶେଷ ହେବା ବେଳକୁ ରାତି ୮ଟା ୪୦ ହୋଇଯାଇଥିଲା। ଏବଂ ଦ୍ଵିତୀୟ ଭୋଗ ମଣ୍ଡପ ବାହାରିବା ବେଳକୁ ରାତି ୧୦ଟା ପରେ ବାଜିଥିଲା। ଏଭଳି ହେବାରୁ ବରାଦି ଅବଢା ଆଉ ବିକ୍ରି ହୋଇପାରିନଥିଲା। ଫଳରେ ବହୁ ଭୋଗ ରହିଯାଇଥିବା ଅଭିଯୋଗ କରିଛନ୍ତି ସୁଆର ସେବକ। ରାତ୍ର ପହୁଡ, ଦ୍ଵାରଫିଟା ଆଦି ନୀତି ବିଳମ୍ବଠାରୁ ଠାକୁରଙ୍କ ଭୋଗ ବାହାରିବାରେ ବିଳମ୍ବ ଘଟୁଥିବା ଅଭିଯୋଗ ହୋଇଛି। ସେପଟେ ଆଜି ବି ନୀତିକାନ୍ତି ବିଳମ୍ବ ରେ ହୋଇଛି। ମଙ୍ଗଳ ଆଳତିଠାରୁ ଗୋପାଳ ବଲ୍ଲଭ ନୀତି ବିଳମ୍ବରେ ଅନୁଷ୍ଠିତ ହୋଇଛି। ଫଳରେ ଦୂର ଦୂରାନ୍ତରେ ଆସିଥିବା ଶ୍ରଦ୍ଧାଳୁମାନେ ହଇରାଣ ହେଉଛନ୍ତି। ନୀତି ବିଳମ୍ବ ଯୋଗୁଁ ଦର୍ଶନରେ ବିଳମ୍ବ ଘଟିଛି। ଆଉ ଦର୍ଶନ ବିଳମ୍ବ ଯୋଗୁଁ ଭିଡ ମଧ୍ୟ ବଢିଛି। ଏପରିକି ଗୁଣ୍ଡିଚା ମନ୍ଦିର ବାହାରୁ ବଳଗଣ୍ଡି ଛକ ଯାଏଁ ଲମ୍ବା ଧାଡି ଲାଗିଥିବା ଦେଖିବାକୁ ମିଳିଛି। ନୀତିକାନ୍ତିରେ ବିଳମ୍ବ ଯୋଗୁଁ ଆଜି ମଧ୍ୟ ବିଳମ୍ବରେ ବାହାରିପାରେ ମହାପ୍ରସାଦ।
Comments are closed.