ଶ୍ରୀଜଗନ୍ନାଥଙ୍କ ନିକଟରେ ସମର୍ପଣ ଭାବ  ରଖି କାର୍ଯ୍ୟ କଲେ ସଫଳତା ଓ ଆନନ୍ଦ ମିଳେ

ଆଠଗଡ: ପବିତ୍ର ଘୋଷଯାତ୍ରା ଅବସରରେ ଶ୍ରୀ ଜଗନ୍ନାଥ ସେବା ସଂସ୍ଥା ଆନୁକୂଲ୍ୟରେ ଆୟୋଜିତ ୪୫ତମ ଭଜନ ସମାରୋହ ଉଦଘାଟିତ ହୋଇଯାଇଛି । ସ୍ଥାନୀୟ ବିଧାୟକ ତଥା ପୂର୍ବତନ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ଵାଇଁ ଏଥିରେ ମୁଖ୍ୟ ଅତିଥି ଭାବେ ଯୋଗଦେଇ ଶ୍ରୀ ଜଗନ୍ନାଥଙ୍କ ପ୍ରତିମା ସମ୍ମୁଖରେ ପ୍ରଦୀପ ପ୍ରଜ୍ବଳନ କରି ଆଠଦିନ ବ୍ୟାପୀ ଚାଲିବାକୁ ଥିବା ଏହି ଭଜନ ଓ ପ୍ରବଚନ କାର୍ଯ୍ୟ ୟକ୍ରମକୁ ଉଦଘାଟନ କରିଥିଲେ ।

ସେବା ସଂସ୍ଥାର ଉପସଭାପତି ତଥା ଓକିଲ ସଂଘର ପୂର୍ବତନ ସଭାପତି ଜଗଦାନନ୍ଦ ତ୍ରିପାଠୀଙ୍କ ପୌରୋହିତ୍ୟରେ ଅନୁଷ୍ଠିତ ଏହି କାର୍ଯ୍ୟକ୍ରମର ସମ୍ମାନିତ ଅତିଥି ଭାବେ ଏନଏସି ଅଧ୍ୟକ୍ଷା ସସ୍ମିତା ରାଉତ ଯୋଗ ଦେଇଥିଲେ । ସଂପାଦକ ପାର୍ଥସାରଥି ପଟ୍ଟନାୟକଙ୍କ ସଂଯୋଜନାରେ ଅନୁଷ୍ଠିତ ଏହି ସମାରୋହରେ ଉଦବୋଧନ ଦେଇ ବିଧାୟକ ଶ୍ରୀ ସ୍ଵାଇଁ ଜଗନ୍ନାଥ ସଂସ୍କୃତି, ପରମ୍ପରା ଓ ବଡ ଠାକୁରଙ୍କ ମାନବୀୟ ଲୀଳାଖେଳା ବିଶ୍ୱରେ ଅନନ୍ୟ ଏବଂ ବିଶ୍ବନିୟନ୍ତା ଶ୍ରୀ ଜଗନ୍ନାଥଙ୍କ ନିକଟରେ ସମର୍ପଣ ଭାବ  ରଖି କାର୍ଯ୍ୟ କଲେ ସଫଳତା ଓ ଆନନ୍ଦ ମିଳେ ବୋଲି ମତପ୍ରକାଶ କରିଥିଲେ ।

ନଗରପାଳ ଶ୍ରୀମତି ରାଉତ ଜଗନ୍ନାଥ ସେବା ସଂସ୍ଥାର ଦୀର୍ଘ ୪୫ ବର୍ଷ ଧରି ଆଠଗଡ ରଥଯାତ୍ରା ସମୟରେ ଏପରି ଭଜନ ସମାରୋହ ଆୟୋଜନ କରି ଏକ ଭକ୍ତିମୟ ପରିବେଶ ସୃଷ୍ଟି କରୁଥିବାରୁ   ସଂସ୍ଥାର ଉଦ୍ୟୋକ୍ତାଙ୍କୁ ଧନ୍ୟବାଦ ଜଣାଇଥିଲେ । ପ୍ରଥମ ସନ୍ଧ୍ୟାରେ ଓଡିଶାର ସୁପ୍ରସିଦ୍ଧ ଗାୟକ ଶ୍ରୀ ଚରଣ ଓ ତାଙ୍କ ସାଥୀଗଣ ଉଚ୍ଚକୋଟୀର ଭଜନ ପରିବେଷଣ କରି ଉପସ୍ଥିତ ଶହ ଶହ ଶ୍ରୋତାଙ୍କ ମନ ମୋହିଥିଲେ ।

ଏହି ଅବସରରେ  ରାଷ୍ଟ୍ରପତି ପୁରସ୍କାରପ୍ରାପ୍ତ ସ୍ୱର୍ଗତ ପ୍ରଧାନଶିକ୍ଷକ ଭୁବନାନନ୍ଦ ପଟ୍ଟନାୟକଙ୍କ ସହଧର୍ମିଣୀ ମୈଥିଳି ପଟ୍ଟନାୟକଙ୍କ ଦ୍ବାରା ପ୍ରଦତ୍ତ ୧୦ ହଜାର ଟଙ୍କାର ଏକ ଚେକ୍ ଶ୍ରୀ ଚରଣଙ୍କୁ ମୁଖ୍ଯଅତିଥି ଶ୍ରୀ ସ୍ୱାଇଁ ପ୍ରଦାନ କରିଥିଲେ । ପ୍ରତିବର୍ଷ ପରି ଚଳିତବର୍ଷ ମଧ୍ଯ ଜଗନ୍ନାଥ ସେବା ସଂସ୍ଥା ପକ୍ଷରୁ ରଥ ଗୁଣ୍ଡିଚା ମନ୍ଦିର ନିକଟରେ ପହଞ୍ଚିବା ପରେ ପ୍ରାୟ ୧୦ ହଜାର ଶ୍ରଦ୍ଧାଳୁଙ୍କ ପାଇଁ ଅଧରପଣା ଓ ଆନନ୍ଦ ବଜାରରେ ପ୍ରସାଦ ବ୍ୟବସ୍ଥା କରାଯାଇଥିଲା । କାର୍ଯ୍ୟକ୍ରମ ପରିଚାଳନାରେ ସଂସ୍ଥାର ବରିଷ୍ଠ ସଦସ୍ୟ ରାଧାନାଥ ଦାସ, ବିରଞ୍ଚି ନାରାୟଣ ବେଜ, ବିପିନ ବିହାରୀ ପଟ୍ଟନାୟକ, ମହେଶ ପ୍ରସାଦ ବାରିକ, ସହସମ୍ପାଦକ ଅଜୟ ଦାସ, ହରପ୍ରସାଦ ବାରିକ, ସୁଶୀଲ ମହାରଣା ପ୍ରଦୀମ କୁମାର ଦାସ, ସୋମୁ ହରିଚନ୍ଦନ ସହଯୋଗ କରିଥିଲେ ।