ସମ୍ବଲପୁର: ସମ୍ବଲପୁରର ସ୍ପର୍ଶକାତର ଥାନା ରୂପେ ପରିଚିତ ଧନୁପାଲି ଥାନାଞ୍ଚଳର ନିବାସୀ ମାନେ ବେଆଇନ ନିଶା କାରବାର ବନ୍ଦ କରିବାକୁ ଦାବି କରିଛନ୍ତି। ଶନିବାର ପୂର୍ବାହ୍ନରେ ଏହି ମର୍ମରେ ଅଞ୍ଚଳବାସୀ ମାନେ ଧନୁପାଲି ଥାନାକୁ ଆସି ସୁନାପାଲିରୁ ଭୁତାପଡ଼ା ପର୍ଯ୍ୟନ୍ତ ଥିବା ଅଞ୍ଚଳରେ ବେଆଇନ ନିଶା କାରବାର ଜୋରସୋରରେ ଚାଲୁଥିବା ବେଳେ ଏହାକୁ ବନ୍ଦ କରିବାକୁ ସେମାନେ ଦାବି କରିଛନ୍ତି। ଅଞ୍ଚଳବାସୀ ମାନେ ଥାନାରେ ଅଭିଯୋଗ କରିଛନ୍ତି ଯେ, ବହୁ ଦିନ ହେବ ସୁନାପାଲି ରୁ ଭୁତାପଡ଼ା ପର୍ଯ୍ୟନ୍ତ ଅଞ୍ଚଳରେ ବେଆଇନ ଭାବରେ ନିଶା କାରବାର ଅହେତୁକ ବୃଦ୍ଧି ପାଇଥିବା ବେଳେ କିଛି ଅସାମାଜିକ ବ୍ୟକ୍ତି ନିୟମ ଉଲ୍ଲଂଘନ କରି ବ୍ରାଉନସୁଗାର, ଗଞ୍ଜେଇ ଓ ନିଶା କଫ ସିରପ କାରବାରକୁ ଖୋଲାଖୋଲି ଭାବରେ କରୁଛନ୍ତି। ଫଳରେ ଅଞ୍ଚଳରେ ବିଭିନ୍ନ ସମୟରେ ଅପରାଧିକ ଗତିବିଧି, ଅନେକ ସମୟରେ ପରିବେଶ ଅଶାନ୍ତ ଓ ଯୁବପିଢ଼ି ପଥଭ୍ରଷ୍ଟ ହେଉଥିବାରୁ ଲୋକେ ଏହାକୁ ବିରୋଧ କରିଲେ ନିଶା କାରବାରୀ ମାନେ ଖୋଲାଖୋଲି ଭାବରେ ଧମକ ଚମକ ଦେଉଛନ୍ତି। ଏହି ଘଟଣାକୁ ନେଇ ପୂର୍ବରୁ ପୁଲିସକୁ ସୂଚନା ଦିଆଯାଇଥିବା ବେଳେ ଏ ପର୍ଯ୍ୟନ୍ତ କୌଣସି ସୁଫଳ ମିଳିନାହିଁ। ଏଣୁ ଅଞ୍ଚଳବାସୀ ଥାନାଧିକାରୀଙ୍କୁ ସାକ୍ଷାତ କରି ବେଆଇନ ନିଶା କାରବାର ଉପରେ ଆଇନ ଅନୁଯାୟୀ କଡା କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି କରିଛନ୍ତି।
Comments are closed.