ହରଭଙ୍ଗା: ବୌଦ୍ଧ ଜିଲ୍ଲା ହରଭଙ୍ଗା ଅଞ୍ଚଳରେ ବେଆଇନ ବାଲି, ପଥର ଭଳି ଖଣିଜସମ୍ପଦ ଚୋରାଚାଲାଣ ବୃଦ୍ଧି ପାଉଥିବା ଅଭିଯୋଗ ହେଉଛି । ବର୍ଷାଦିନ ଆସିବାରୁ ଆଗୁଆ ବାଲି ସାଇତି ରଖିବା ଉଦ୍ଦେଶ୍ୟରେ ପ୍ରତ୍ୟେକ ବାଲି ଘାଟରୁ ଦୈନିକ ଶହ ଶହ ଟ୍ରିପ ବାଲି ଚାଲାଣ ଦିନରାତି ଚାଲିଛି । ବେଫିକର ଭାବେ ୧୦ଟନରୁ ଅଧିକ ପରିମାଣର ବାଲି ଭାରୀଯାନ ସାହାଯ୍ୟରେ ଚାଲାଣ ଯୋଗୁଁ ମହାଦନୀ ସଂଯୋଗୀକରଣ ରାସ୍ତା ଅବସ୍ଥା ଶୋଚନୀୟ ହୋଇପଡିଛି । ଏଥିସହ ପୂର୍ତ୍ତ ବିଭାଗ ରାସ୍ତା ନଷ୍ଟ ହେବା ସହିତ ଭାରିଯାନ ପରିବହନ ସମୟରେ ରାସ୍ତାକଡ ଘରଦ୍ୱାର ଦୋହଲି ପଡୁଥିବା ଅଭିଯୋଗ ହେଉଛି । ଏଭଳି ବେନିୟମ ଭାବେ ଓଭରଲୋଡିଂ ବାଲି ଚାଲାଣ ହେଉଥିବାବେଳେ ପରିବହନ ବିଭାଗର କୁମ୍ଭକର୍ଣ୍ଣ ନିଦ୍ରା ଅଂଚଳବାସୀଙ୍କ ମଧ୍ୟରେ ଅସନ୍ତୋଷର କାରଣ ସାଜିଛି ।
ପ୍ରକାଶ ଯେ, ହରଭଙ୍ଗା ତହସିଲ ଅଧିନରେ ଥିବା ବିଭିନ୍ନ ବାଲି ଏବଂ ପଥର ଖାଦାନ ଖଣି ବିଭାଗକୁ ହସ୍ତାନ୍ତର ପରେ ବି ବିନା କାଗଜ କଲମରେ ସରକାରୀ ନିୟମକୁ ଖୋଲାଖୋଲି ଉଲ୍ଲଂଘନ କରି ଲଘୁଖଣିଜ ସମ୍ପଦ ଉତ୍ତୋଳନ କରାଯାଉଥିବା ଅଭିଯୋଗ ହେଉଛି । ଯାହାଫଳରେ ସରକାରଙ୍କ କୋଟି କୋଟି ଟଙ୍କା ରାଜସ୍ୱ ହାନୀ ଘଟିବା ସହିତ ଳଘୁଖଣିଜ ସମ୍ପଦ ଖାଦାନଗୁଡିକର ପରିଚାଳନା ସଠିକ ଢଙ୍ଗରେ ତଦାରଖ କରାଯିବା ବଦଳରେ ଖଣି ବିଭାଗ ଏବଂ ଲିଜଧାରୀ ମଧୁଚନ୍ଦ୍ରିକାରେ ବ୍ୟାପକ ହରିଲୁଟ ଚାଲିଥିବା ଅଭିଯୋଗ ଉଠୁଛି । ଏଭଳି ଅବ୍ୟବସ୍ଥା ଯୋଗୁଁ ଲିଜ୍ଧାରୀ ଖଣି ନିୟମ ଅନୁପାଳନ କରିବା ପରିବର୍ତେ ବିନା ସୂଚନାଫଳକ, ତାରବାଡ କିମ୍ବା ପରିବେଶ ମଞ୍ଜୁରୀ ସମ୍ପର୍କିତ କୌଣସି ସୂଚନାଫଳକ ନ ଲଗାଇ ସାଧାରଣ ଲୋକଙ୍କୁ ଅନ୍ଧାରରେ ରଖି ବେନିୟମ ଭାବେ ବାଲି ଉତ୍ତୋଳନ କରୁଥିବା ଦେଖିବାକୁ ମିଳିଛି । ଏଭଳି ବେନିୟମ ବାଲି/ପଥର ଉତ୍ତୋଳନ ଉପରେ ଖଣି ବିଭାଗ କାର୍ଯ୍ୟାନୁଷ୍ଠାନ ପରିବର୍ତ୍ତେ ହାତ ଉପରେ ହାତ ବାନ୍ଧି ବସିବା ଘଟଣା ଖଣିଜ ସମ୍ପଦ ଲୁଟ ପାଇଁ ବେଶ ସୁଯୋଗ ସୃଷ୍ଟି କରିଛି । ମେସିନ ସାହାଯ୍ୟରେ ଗଭୀର ବାଲି ଖନନ ଯୋଗୁଁ ଜୈବ ବିବିଧତା ନଷ୍ଟ ହେବା ସହିତ ଜଳଚର ପ୍ରାଣୀଙ୍କ ଆଶ୍ରୟ ସ୍ଥଳୀ ନଷ୍ଟ ହେବାକୁ ବସିଛି । ଏହା ସହିତ ବନ୍ୟାପ୍ଳାବିତ ଅଞ୍ଚଳରେ ଏଭଳି ବେନିୟମ ବାଲି ଉତୋଳନ ଯୋଗୁଁ ମହାନଦୀ ଗାଁମୁହାଁ ହୋଇ ଧନ ଜୀବନକୁ ବିପଦରେ ପକାଇବା ଯଥେଷ୍ଟ ଆଶଙ୍କା ପ୍ରକାଶ ପାଇଛି । ବାଲି ଏବଂ ପଥର ଖାଦାନଗୁଡିକରୁ ବାର୍ଷିକ କେତେ ପରିମାଣର ଲଘୁଖଣିଜ ସମ୍ପଦ ଉତ୍ତୋଳନ ହେଉଛି ଏମ.ଜି.କ୍ୟୁ ସମ୍ପର୍କିତ ସୂଚନାକୁ ଅନ୍ଧାରରେ ରଖି ନିର୍ଦ୍ଦିଷ୍ଟ ଏରିଆରୁ ବାଲି/ପଥର ଉତୋଳନ କରାଯିବା ପରିବର୍ତ୍ତେ ମନଇଛା ଏରିଆ ବାହାରୁ ଖଣିଜ ସମ୍ପଦ ଉତୋଳନ କରାଯାଉଥିବା ନଜରକୁ ଆସିଛି । ପ୍ରତି ୬ମାସରେ ଥରେ ଅର୍ଥାତ୍ ବର୍ଷା ପୂର୍ବରୁ ଏବଂ ବର୍ଷା ପରେ ବାଲି/ପଥର ଉତ୍ତୋଳନର ଆକଳନ କରାଯାଉନଥିବା ଖଣି ବିଭାଗର ପାରିବା ପଣିଆ ଉପରେ ପ୍ରଶ୍ନଚିହ୍ନ ଛିଡ଼ା କରିଛି। ଏ ଦିଗରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାନଗଲେ ଆଗକୁ ସମ୍ପୃକ୍ତ ଅଂଚଳବାସୀ ଆନ୍ଦୋଳନାତ୍ମକ ପନ୍ଥା ଅବଲମ୍ବନ ପାଇଁ ଧମକ ଦେଇଛନ୍ତି । ଏ ଦିଗରେ ଉଭୟ ଖଣି ଏବଂ ପରିବହନ ବିଭାଗ ଦୃଷ୍ଟି ଦେବାକୁ ଦାବି ଉଠୁଛି ।
