ପିପିଲି: ପିପିଲିରେ ନିର୍ବାଚନ ଡ୍ୟୁଟି କରୁଥିବା ବେଳେ ଗୀତାଞ୍ଜଳୀ ପ୍ରଧାନ (୩୦) ନାମ୍ନି ମହିଳା କନେଷ୍ଟବଳ ବିଦ୍ୟୁତ୍ ଆଘାତରେ ଗୁରୁତର ଭାବେ ଆହତ ହୋଇଛନ୍ତି। ତାଙ୍କୁ ପ୍ରଥମେ ପିପିଲି ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଥିବା ବେଳେ ପ୍ରାଥମିକ ଚିକିତ୍ସା ପରେ ସେଠାରୁ ଭୁବନେଶ୍ୱର ସ୍ଥିତ କ୍ୟାପିଟାଲ ହସ୍ପିଟାଲ ଓ ପରେ ଏକ ଘରୋଇ ଡାକ୍ତରଖାନାରେ ଭର୍ତ୍ତି କରାଯାଇଛି। ସେ ନିର୍ବାଚନ ପରିଚାଳନା ପାଇଁ ପୁରୀ ପୁଲିସ ଆର୍ଓରୁ ପିପିଲିକୁ ଆସିଥିଲେ। ତାଙ୍କ ଘର କଣାସ ଅଞ୍ଚଳରେ ହୋଇଥିବା ସୂଚନା ମିଳିଛି।
ସୂଚନା ଅନୁଯାୟୀ, ପିପିଲି ପୌରାଞ୍ଚଳର ୧୬ନଂ ୱାର୍ଡ଼ ଅନ୍ତର୍ଗତ ଜୟପୁରଶାସନ ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟରେ ଥିବା ମତଦାନ କେନ୍ଦ୍ରରେ ନିର୍ବାଚନ ପରିଚାଳନା ଓ ଶାନ୍ତିଶୃଙ୍ଖଳା କାର୍ଯ୍ୟରେ ଗୀତାଞ୍ଜଳୀ ନିୟୋଜିତ ଥିଲେ। ଅପରାହ୍ନ ପ୍ରାୟ ସାଢେ ୫ଟା ସମୟରେ ଉକ୍ତ ବିଦ୍ୟାଳୟ ପରିସରରେ ଥିବା ବାଥରୁମକୁ ସେ ପରିସ୍ରା କରିବାକୁ ଯାଇଥିବା ବେଳେ ଏହି ଅଘଟଣ ଘଟିଥିଲା। ଉକ୍ତ ବାଥରୁମ ମଧ୍ୟକୁ ଅସ୍ଥାୟୀ ଭାବେ ସଂଯୋଗ ହୋଇଥିବା ବିଦ୍ୟୁତ ତାର ଛିଣ୍ଡି ଲୁହା କବାଟରେ ଲାଗିଯାଇଥିବା ବେଳେ ଗୀତାଞ୍ଜଳୀ ଉକ୍ତ ଲୁହା କବାଟର ସଂସ୍ପର୍ଶରେ ଆସିବାରୁ ତାଙ୍କୁ ବିଦ୍ୟୁତ ଆଘାତ ଲାଗିଥିଲା ଓ ସେ ସେଠାରେ ଛିଟିକି ପଡ଼ିଥିଲେ। ସ୍ଥାନୀୟ ଲୋକଙ୍କ ସହଯୋଗରେ ପିପିଲି ଥାନା ଏସ୍ଆଇ ମମତା ବିଶ୍ୱାଳ ତୁରନ୍ତ ତାଙ୍କୁ ପିପିଲି ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଚିକିତ୍ସା ଲାଗି ଭର୍ତ୍ତି କରିଥିଲେ। ତେବେ ସେଠାରୁ ତାଙ୍କୁ ସଙ୍କଟାପନ୍ନ ଅବସ୍ଥାରେ ଭୁବନେଶ୍ୱରକୁ ସ୍ଥାନାନ୍ତର କରାଯାଇଥିଲା। ବାଥ୍ରୁମ୍ରେ ବିଦ୍ୟୁତ୍ ବଲ୍ବ ଲଗାଇବା ପାଇଁ ଏଭଳି ଦାୟିତ୍ୱହିନତା ଓ ଖାମ୍ଖିଆଲି କାର୍ଯ୍ୟ ଯୋଗୁଁ ଏହି ଅଘଟଣ ଘଟିଥିବା କୁହାଯାଉଛି।
