ଭବାନୀପାଟଣା: ଜୟପାଟଣା ବ୍ଲକ ମହକୁମାଠାରୁ ପ୍ରାୟ ୨ କିମି ଦୂରରେ ଅବସ୍ଥିତ ଚିର୍କା ଗାଁର କୁସୁମଖୁଣ୍ଟିପଡ଼ା। ଜୟପାଟଣା ପଂଚାୟତର ୧୩ ନମ୍ୱର ୱାର୍ଡ ଭାବେ ପରିଗଣିତ ଏହି ପଡ଼ାରେ ଏବେ ଜଳକଷ୍ଟ ଦେଖା ଦେଇଛି। ପ୍ରାୟ ୧୨୦ ଜନସଂଖ୍ୟା ବିଶିଷ୍ଟ ଏହି ପଡ଼ାବାସୀଙ୍କ ପାଇଁ ଦୁଇଟି ନଳକୂପ ରହିଛି। ଗୋଟିଏ ନଳକୂପ ଶୁଖି ଯାଇଥିବାବେଳେ ଅନ୍ୟଟିରୁ ମଇଳା ପାଣି ବାହାରୁଛି। ଦୁର୍ଗନ୍ଧ ବାହାରୁଥିବା ଏହି ପାଣିକୁ ବ୍ୟବହାର କରିବାକୁ ଲୋକେ ବାଧ୍ୟ ହେଉଛନ୍ତି।
ଅନ୍ୟପକ୍ଷରେ ଜନସ୍ବାସ୍ଥ୍ୟ ବିଭାଗ ଜାଣି ମଧ୍ୟ ଅଜଣା ସାଜିଛି। ପଡ଼ାକୁ ବିଳମ୍ବରେ ବିଜୁଳି ସଂଯୋଗ ହେଲା। ଆଜି ମଧ୍ୟ ସବୁଦିନିଆ ପକ୍କା ରାସ୍ତା ଖଣ୍ଡେ ନାହିଁ। ଏସବୁ ବିଷୟରେ ବ୍ଲକ ଅଫିସରେ ଏକାଧିକ ବାର ଦାବି ସତ୍ବେ କିଛି ପଦକ୍ଷେପ ନିଆଯାଉ ନାହିଁ। ବ୍ଲକ ମହକୁମାଠାରୁ ମାତ୍ର ଦୁଇ କିମି ଦୂରରେ ଥିବା ଲୋକଙ୍କୁ ଯଦି ବିଶୁଦ୍ଧ ପାନୀୟ ଜଳ ମୁନ୍ଦାଏ ମିଳୁନି ତେବେ ଆଭ୍ୟନ୍ତରୀଣ ଅଞ୍ଚଳରେ ବସବାସ କରୁଥିବା ଲୋକଙ୍କ ଅବସ୍ଥା କିଭଳି ଥିବ ତାହା ଅନୁମାନ କରାଯାଇପାରେ।
