ପିପିଲି : ପିପିଲିରେ ଏକ ନିର୍ବାଚନୀ ଶୋଭାଯାତ୍ରାରେ ଭୋଟ୍ ପ୍ରଚାର କରୁଥିବା ବେଳେ ପ୍ରଚାର ଗାଡି ଉପରେ ହଠାତ୍ ଅସୁସ୍ଥ ହୋଇ ପଡିଲେ ବିଜେଡିର ପୁରୀ ଲୋକସଭା ପ୍ରାର୍ଥୀ ଅରୂପ ପଟ୍ଟନାୟକ। ତାଙ୍କୁ ତୁରନ୍ତ ପିପିଲି ଡାକ୍ତରଖାନାକୁ ଅଣାଯାଇଥିବା ବେଳେ ପରେ ଭୁବନେଶ୍ୱରକୁ ନିଆଯାଇଥିବା ସୂଚନା ମିଳିଛି।
ଆସନ୍ତା ସାଧାରଣ ନିର୍ବାଚନ ପାଇଁ ପିପିଲି ବିଧାୟକ ରୁଦ୍ରପ୍ରତାପ ମହାରଥୀଙ୍କ ନେତୃତ୍ୱରେ ବିଜୁ ଜନତା ଦଳର ଏକ ବିଶାଳ ଶୋଭାଯାତ୍ରା ସୋମବାର ସକାଳେ ଉତ୍ତରାବଜାର ଠାରୁ ବାହାରି ପିପିଲି ବ୍ଲକର ବିଭିନ୍ନ ପଞ୍ଚାୟତ ପରିକ୍ରମା କରୁଥିବା ବେଳେ ଏହି ଅଘଟଣ ଘଟିଥିଲା। ବିଧାୟକ ଶ୍ରୀମହାରଥୀଙ୍କ ସହ ବିଜେଡିର ପୁରୀ ଲୋକସଭା ପ୍ରାର୍ଥୀ ଅରୂପ ପଟ୍ଟନାୟକ ଏକ ଖୋଲା ଜିପ୍ରେ (ପ୍ରଚାରଗାଡି)ରେ ଠିଆ ହୋଇ ଭୋଟ୍ ପ୍ରଚାର କରୁଥିବା ବେଳେ ସାଢେ ୧୦ଟା ସମୟରେ ପିପିଲି ହାଟଛକ ଠାରେ ଶ୍ରୀପଟ୍ଟନାୟକ ହଠାତ୍ ଅସୁସ୍ଥ ହୋଇପଡିଥିଲେ। ସେ ଧିରେ ଧିରେ ଗାଡି ମଧ୍ୟରେ ପଡିଯାଇ କିଛି ସମୟ ପାଇଁ ଅଚେତ୍ ହୋଇ ଯାଇଥିଲେ।
ଶ୍ରୀମହାରଥୀଙ୍କ ସମେତ ଗାଡିରେ ଥିବା ଅନ୍ୟ ନେତା ଓ କର୍ମୀମାନେ ତାଙ୍କ ମୁହଁରେ ପାଣି ଛିଞ୍ଚିବା ପରେ ତାଙ୍କ ଚେତା ଆସିଥିଲା। କର୍ମୀମାନେ ତାଙ୍କୁ ସଙ୍ଗେ ସଙ୍ଗେ ଅନ୍ୟ ଏକ ଗାଡିରେ ପିପିଲି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ଚିକିତ୍ସା ଲାଗି ନେଇଥିଲେ। ଡାକ୍ତରଖାନାରେ ଡ୍ୟୁଟିରେ ଥିବା ମହିଳା ଡାକ୍ତର ଜଣକ ତାଙ୍କର ସ୍ୱାସ୍ଥ୍ୟ ପରୀକ୍ଷା କରିଥିଲେ। ତାଙ୍କର ରକ୍ତଚାପ ନିମ୍ନ ହୋଇ ଥିବା ଜାଣି ଡାକ୍ତର ତାଙ୍କର ଆବଶ୍ୟକୀୟ ଚିକିତ୍ସା କରିଥିଲେ। ପିପିଲି ଡାକ୍ତରଖାନାରେ ସେ ସ୍ୱାଭାବିକ ଭାବେ କର୍ମୀଙ୍କ ସହ କଥାବାର୍ତ୍ତା ହୋଇଥିବା ବେଳେ ଚିକିତ୍ସା ପାଇଁ ଭୁବନେଶ୍ୱର ଆସିଥିବା ଜଣାପଡିଛି। ଅଂଶୁଘାତର ପ୍ରଭାବ ଯୋଗୁଁ ଶ୍ରୀପଟ୍ଟନାୟକ ଅସୁସ୍ଥ ହୋଇପଡିଥିବା କୁହାଯାଉଛି।
