ନୂଆଦିଲ୍ଲୀ: ପାଞ୍ଚ ଥରର ଆଇପିଏଲ ଚମ୍ପିଆନ ମୁମ୍ବଇ ଇଣ୍ଡିଆନ୍ସ ଚଳିତ ସଂସ୍କରଣରେ ଏପର୍ଯ୍ୟନ୍ତ ଖାତା ଖୋଲିନାହିଁ। ୨୦୨୪ ଆଇପିଏଲରେ ମୁମ୍ବଇ ଇଣ୍ଡିଆନ୍ସର ନେତୃତ୍ୱ ରୋହିତ ଶର୍ମାଙ୍କ ବଦଳରେ ହାର୍ଦ୍ଦିକ ପାଣ୍ଡ୍ୟା ନେଇଛନ୍ତି। ତିନୋଟି ମ୍ୟାଚରେ ଲଗାତାର ପରାଜିତ ହେବା ପରେ ଶେଷରେ ହାର୍ଦ୍ଦିକ ପାଣ୍ଡ୍ୟା ମହାଦେବଙ୍କ ଶରଣରେ ପଶିଛନ୍ତି। ରବିବାର ଦିନ ମୁମ୍ବଇ ଇଣ୍ଡିଆନ୍ସ ଓ ଦିଲ୍ଲୀ କ୍ୟାପିଟାଲ୍ସ ମଧ୍ୟରେ ମ୍ୟାଚ ଅନୁଷ୍ଠିତ ହେବ। ଏହା ପୂର୍ବରୁ କ୍ୟାପଟେନ ହାର୍ଦ୍ଦିକ ପାଣ୍ଡ୍ୟା ମହାଦେବଙ୍କ ପୂଜାର୍ଚ୍ଚନା କରିଛନ୍ତି। ଶୁକ୍ରବାର ପ୍ରସିଦ୍ଧ ସୋମନାଥ ମନ୍ଦିରରେ ପୂଜାର୍ଚ୍ଚନା କରିଥିଲେ ହାର୍ଦ୍ଦିକ ପାଣ୍ଡ୍ୟା। ଏଠାରେ ମହାଦେବଙ୍କ ଆରାଧନା କରିବା ସହ ଜଳାଭିଷେକ କରି ପୂଜାପାଠ କରିଥିଲେ।
ହାର୍ଦ୍ଦିକ କ୍ୟାପଟେନ ହେବା ଦିନଠାରୁ ଲଗାତାର ସମାଲୋଚନାର ଶିକାର ହେଉଛନ୍ତି। କ୍ରିକେଟ ପଡିଆରେ ମୁମ୍ବଇ ଇଣ୍ଡିଆନ୍ସ ତିନି ଥର ପରାଜିତ ହେବାରୁ ପ୍ରଶଂସକମାନେ ତାଙ୍କୁ ଗାଳି ଦେବା ସହିତ ପାଣ୍ଡ୍ୟା ଗୋ-ବ୍ୟାକ୍ ନାରା ଦେଉଛନ୍ତି।
