ବାଙ୍କୀ: ବାଙ୍କୀ ବ୍ଲକ ସହଗାଁ ଗୋପାଳପୁର ନିଟକ ମହାନଦୀରେ ହୁଲି ଡଙ୍ଗା ବୁଡ଼ି ଯିବାରୁ ଜଣେ ନିଖୋଜ ହୋଇଛନ୍ତି। ୪ଜଣ ସାଙ୍ଗ ହୁଲି ଡଙ୍ଗାରେ ମହାନଦୀ ବୁଲିବାକୁ ଯାଇଥିବାବେଳେ ଜଣେ ପାଣିକୁ ଖସି ପଡ଼ିଥିଲେ। ବୁଡ଼ିଥିବା ସାଙ୍ଗଙ୍କୁ ଅନ୍ୟସାଙ୍ଗମାନେ ଉଦ୍ଧାର କରୁଥିବାବେଳେ ବୁଡ଼ିଗଲା ହୁଲି ଡଙ୍ଗା। ୩ଜଣ ସୁରକ୍ଷିତ ଉଦ୍ଧାର ହୋଇଥିବାବେଳେ ଜଣଙ୍କର ଏଯାଏଁ ପତ୍ତା ମିଳିନାହିଁ। ସ୍ଥାନୀୟ ଲୋକଙ୍କ ସହାୟତାରେ ଅଗ୍ନିଶମବାହିନୀର ଖୋଜାଖୋଜି ଜାରି ରହିଛି।
ମଳିଥିବା ସୂଚନା ଅନୁଯାୟୀ କଟକ ବାଙ୍କୀ ଥାନା ସହଗାଁ ଗୋପାଳପୁର ଗାଁ ନିକଟରେ ଏକ ହୁଲି ଡଙ୍ଗା ବୁଡ଼ି ଯିବାରୁ ଜଣେ ନିଖୋଜ ହୋଇ ଯାଇଛନ୍ତି। ନିଖୋଜ ଯୁବକ ଜଣଙ୍କ ଢେଙ୍କାନାଳ ଜିଲା ସପ୍ତଶଯ୍ୟା ଅଞ୍ଚଳର ବୋଲି ଜଣାପଡ଼ିଛି। ସେ ଗୋପାଳପୁର ସ୍ଥିତ ତାଙ୍କର ଜଣେ ବନ୍ଧୁଙ୍କ ଘରକୁ ବୁଲିବାକୁ ଯାଇଥିଲେ। ଆଜି ସେ କିଛି ସାଙ୍ଗଙ୍କ ସହିତ ହୁଲି ଡଙ୍ଗାରେ ମହାନଦୀ ବୁଲିବାକୁ ଯାଇଥିଲେ। ତେବେ କୌଣସି କାରଣରୁ ସେ ଡଙ୍ଗାରୁ ଖସିପଡ଼ିଥିଲେ। ତାଙ୍କୁ ଉଦ୍ଧାର କରିବାକୁ ଉଦ୍ୟମ ବେଳେ ହୁଲି ଡଙ୍ଗାଟି ବୁଡ଼ି ଯାଇଥିଲା। ଅନ୍ୟସାଙ୍ଗମାନଙ୍କୁ ପାଣିରୁ ଉଦ୍ଧାର କରାଯାଇଥିବାବେଳେ ତାଙ୍କୁ ଉଦ୍ଧାର କରାଯାଇପାରିନଥିଲା ଓ ସେ ନିଖୋଜ ହୋଇଯାଇଥିଲେ। ଖବର ପାଇ ପୁଲିସ ଓ ଅଗ୍ନିଶମବାହିନୀ ଘଟଣାସ୍ଥଳରେ ପହଞ୍ଚି ସ୍ଥାନୀୟ ଲୋକଙ୍କ ସହାୟତାରେ ଖୋଜାଖୋଜି ଜାରି ରଖିଛି।
