ସାକ୍ଷୀଗୋପାଳ: ସତ୍ୟବାଦୀ ବିଧାନସଭା ଆସନରୁ ବିଜୁ ଜନତା ଦଳ ତରଫରୁ ବିଧାୟକ ପ୍ରାର୍ଥୀ ହୋଇଥିବା ସଞ୍ଜୟ ଦାସବର୍ମା ଆଜି ଏକ ସାମ୍ବାଦିକ ସମ୍ମିଳନୀରେ ସତ୍ୟବାଦୀର ଜନସାଧାରଣ ମୋତେ ଆଶୀର୍ବାଦ କରିବେ ଓ ସେବା କରିବାର ସୁଯୋଗ ଦେବେ ବୋଲି ଆଶା ପ୍ରକାଶ କରିଥିଲେ।
ସେ ସଂସ୍କୃତି ସମ୍ପନ୍ନ, ଐତିହାସିକ ଓ ପୌରାଣିକ ପୃଷ୍ଠଭୂମି ରହିଥିବା ସତ୍ୟବାଦୀର ବିକାଶକୁ ଆହୁରି ଆଗକୁ ନେବା ଓ ଆହୁରି ଗତି ଦେବା ନିମନ୍ତେ ସତ୍ୟବାଦୀ ବାସୀଙ୍କର ସହଯୋଗ, ଶୁଭେଚ୍ଛା ଓ ଆଶୀର୍ବାଦ କାମନା କରିଥିଲେ। ଏହି ଅବସରରେ ପୁରୀ ଲୋକସଭା ଆସନରୁ ସାଂସଦ ପ୍ରାର୍ଥୀ ଅରୂପ କୁମାର ପଟ୍ଟନାୟକଙ୍କୁ ସାଂସଦ ଭାବରେ ଓ ଶ୍ରୀ ଦାସବର୍ମାଙ୍କୁ ସତ୍ୟବାଦୀ ବିଧାନସଭା ଆସନରୁ ବିଧାୟକ ରୂପେ ଆଶୀର୍ବାଦ କରି ନିର୍ବାଚିତ କରିବା ନିମନ୍ତେ ସମସ୍ତଙ୍କର ସହଯୋଗ କାମନା କରିଥିଲେ।
ଏହି ଅବସରରେ ଉପସ୍ଥିତ ଗଣମାଧ୍ୟମ ପ୍ରତିନିଧି ଅଶୋକ ବେହେରା ସତ୍ୟବାଦୀର ମୁଖ୍ୟ ଅର୍ଥକାରୀ ଫସଲ ଓ ଓଡ଼ିଶାର ନାରିକେଳ ରାଜଧାନୀ ରୂପେ ପରିଚିତ ସାକ୍ଷୀଗୋପାଳରେ ଉଜୁଡି ଯାଇଥିବା ନଡ଼ିଆ ଚାଷ, ବନ୍ଦ ରହିଥିବା ଆଞ୍ଚଳିକ ନାରିକେଳ ଗବେଷଣା କେନ୍ଦ୍ର ଓ କୃତ୍ରିମ କୀଟ ପ୍ରଜଜନ କେନ୍ଦ୍ର ସମ୍ପର୍କରେ ସୂଚନା ପ୍ରଦାନ କରିଥିଲେ। ଏ ସମ୍ପର୍କରେ ଶ୍ରୀ ଦାସବର୍ମା କହିଥିଲେ, ବର୍ତ୍ତମାନ ନିର୍ବାଚନ ଆଚରଣ ଵିଧି ରହିଛି। ନିର୍ବାଚନ ପରେ ଜନସାଧାରଣଙ୍କ ଆଶୀର୍ବାଦରେ ସତ୍ୟବାଦୀ ସମସ୍ୟାର ସମାଧାନ ସହିତ ବିକାଶ ପ୍ରକ୍ରିୟା ତ୍ୱରାନ୍ୱିତ ହେବ ବୋଲି ସୂଚନା ପ୍ରଦାନ କରିଥିଲେ।
