ନୂଆଦିଲ୍ଲୀ: ଚକୋଲେଟ ତିଆରି ପାଇଁ ବ୍ୟବହାର ହେଉଥିବା କଞ୍ଚାମାଲ କୋକୋଆ ଉତ୍ପାଦନ ହ୍ରାସ ପାଇଥିବାରୁ ଚକୋଲେଟ ଦାମ୍ ବଢ଼ିବା ନେଇ ଆଶା କରାଯାଉଛି। କୋକୋଆ ପଶ୍ଚିମ ଆଫ୍ରିକୀୟ ଅଞ୍ଚଳରେ ସର୍ବାଧିକ ଉତ୍ପାଦନ ହେଉଥିବା ବେଳେ ପ୍ରଥମ ଥର ପାଇଁ ଉତ୍ପାଦନ ହ୍ରାସ ପାଇଛି। ଫଳରେ ଆନ୍ତର୍ଜାତିକ ସ୍ତରରେ କୋକୋଆ ମୂଲ୍ୟ ପ୍ରାୟ ତିନିଗୁଣା ବଢ଼ିଛି।
ମାର୍ଚ୍ଚରେ ପ୍ରଥମ ଥର ପାଇଁ କୋକୋଆ ମୂଲ୍ୟ ଟନ୍ ପ୍ରତି ସର୍ବାଧିକ ୧୦ ହଜାର ଡଲାର ଟପିଛି। ତେଣୁ କୋକୋଆର ଆଗାମୀ ଉତ୍ପାଦନ ପର୍ଯ୍ୟନ୍ତ ମୂଲ୍ୟ କମିବା ଆଶା ନାହିଁ। ତେବେ କ୍ୟାଡ୍ବରୀ ନିର୍ମାତା ମୋନ୍ଡେଲେଜ୍, ନେଷ୍ଟଲି ଇଣ୍ଡିଆ, ହାର୍ସେ ଏବଂ ପାର୍ଲେ ଭଳି ଅଗ୍ରଣୀ ଚକୋଲେଟ କମ୍ପାନୀ ପକ୍ଷରୁ କୁହାଯାଇଛି ଯେ କୋକୋଆ ଉତ୍ପାଦନ ହ୍ରାସ ପାଇଥିଲେ ହେଁ ଏହା ଏତେ କମ୍ ହୋଇନାହିଁ ଯେ ମୂଲ୍ୟ ଏତେ ବୃଦ୍ଧି ପାଇବ। ବଜାରରେ କୋକୋଆର କୃତ୍ରିମ ଅଭାବ ସୃଷ୍ଟି କରାଯାଇ କଳାବଜାରୀ କରାଯାଉଛି ବୋଲି ପାର୍ଲେର ଉପାଧ୍ୟକ୍ଷ ମୟଙ୍କ ଶାହ କହିଛନ୍ତି। ଗତ ୬୦ ବର୍ଷ ମଧ୍ୟରେ ଏଭଳି ବଜାର ସଙ୍କଟ ପ୍ରଥମ ଥର ପାଇଁ ହୋଇଛି।
ଗତ ବର୍ଷ ଉତ୍ପାଦନ ୭୪ ହଜାର ଟନ୍ କମ୍ ହୋଇଥିବା ବେଳେ ୨୦୨୩-୨୪ରେ ୩.୭୪ ଲକ୍ଷ ଟନ୍ କମ୍ ଉତ୍ପାଦନ ହୋଇଛି। ତେବେ ମେ ପରେ ଚକୋଲେଟ ଦାମ୍ ବଢ଼ିବା ନେଇ ଚିନ୍ତା କରାଯାଉଥିବା ପାର୍ଲେର ଶ୍ରୀ ଶାହ କହିଛନ୍ତି।
Comments are closed.