ଡେସ୍କ: ଜଷ୍ଟିସ୍ ରିତୁ ରାଜ ଅୱସ୍ଥି ଲୋକପାଳଙ୍କ ବିଚାର ବିଭାଗୀୟ ସଦସ୍ୟ ଭାବେ ଶପଥ ନେଇଛନ୍ତି। ଭାରତର ଲୋକପାଳଙ୍କ ନେତୃତ୍ୱରେ ଜଷ୍ଟିସ୍ ଏଏମ୍ ଖାନୱିଲକର ଶପଥ ପାଠ କରାଇଥିଲେ। ପଙ୍କଜ କୁମାର ଓ ଅଜୟ ତିର୍କୀ ଲୋକପାଳ ସଦସ୍ୟ ଭାବେ ଶପଥ ନେଇଛନ୍ତି। ଆଜି ନୂଆଦିଲ୍ଲୀସ୍ଥିତ ଭାରତୀୟ ଲୋକପାଳ କାର୍ଯ୍ୟାଳୟରେ ଏହି ଶପଥ ଗ୍ରହଣ ଉତ୍ସବ ଅନୁଷ୍ଠିତ ହୋଇଥିଲା।
ଦୁଇ ଜଣ ବିଚାର ବିଭାଗୀୟ ସଦସ୍ୟ ଜଷ୍ଟିସ୍ ପିକେ ମହାନ୍ତି ଓ ଅଭିଳାଷା କୁମାରୀ ଏବଂ ତିନି ଜଣ ସଦସ୍ୟ ଡିକେ ଜୈନ, ଅର୍ଚ୍ଚନା ରାମସୁନ୍ଦରମ୍ ଏବଂ ମହେନ୍ଦ୍ର ସିଂହ ଚଳିତ ବର୍ଷ ୨୬ ମାର୍ଚ୍ଚରେ ଲୋକପାଳରେ ସେମାନଙ୍କ କାର୍ଯ୍ୟକାଳ ଶେଷ କରିଛନ୍ତି।
ଜଷ୍ଟିସ୍ ରିତୁ ରାଜ ଅୱସ୍ଥି ଭାରତର ଲୋକପାଳର ନ୍ୟାୟିକ ସଦସ୍ୟ ଭାବରେ ଯୋଗ ଦେବା ପୂର୍ବରୁ ୨୨ତମ ଆଇନ ଆୟୋଗର ଅଧ୍ୟକ୍ଷ ଭାବରେ କାର୍ଯ୍ୟ କରୁଥିଲେ। ଏହା ପୂର୍ବରୁ ସେ କର୍ଣ୍ଣାଟକ ହାଇକୋର୍ଟର ମୁଖ୍ୟ ବିଚାରପତି ଥିଲେ। ପଙ୍କଜ କୁମାର ହେଉଛନ୍ତି ଗୁଜରାଟ କ୍ୟାଡରର ୧୯୮୬ ବ୍ୟାଚ୍ ଆଇଏଏସ୍ ଅଫିସର। ଭାରତର ଲୋକପାଳର ସଦସ୍ୟ ଭାବରେ ଯୋଗ ଦେବା ପୂର୍ବରୁ ସେ ଗୁଜରାଟର ମୁଖ୍ୟ ଶାସନ ସଚିବ ଥିଲେ। ଅଜୟ ତିର୍କୀ ମଧ୍ୟପ୍ରଦେଶ କ୍ୟାଡରର ୧୯୮୭ ବ୍ୟାଚ୍ ଆଇଏଏସ୍ ଅଫିସର। ଲୋକପାଳର ସଦସ୍ୟ ଭାବରେ ଯୋଗ ଦେବା ପୂର୍ବରୁ ସେ ଭାରତ ସରକାରଙ୍କ ଭୂ-ସମ୍ପଦ ବିଭାଗର ସଚିବ ଥିଲେ।
ଶପଥ ଗ୍ରହଣ ଉତ୍ସବରେ କେନ୍ଦ୍ରୀୟ ଭିଜିଲାନ୍ସ କମିଶନର ପ୍ରବୀଣ କୁମାର ଶ୍ରୀବାସ୍ତବ ଏବଂ ସିବିଆଇ ଓ ପ୍ରବର୍ତ୍ତନ ନିର୍ଦ୍ଦେଶାଳୟର ଅନ୍ୟ ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ।
