ନୂଆଦିଲ୍ଲୀ: ଆନ୍ଧ୍ରପ୍ରଦେଶ କ୍ରିକେଟ ଦଳ ତରଫରୁ ଭବିଷ୍ୟତରେ କୌଣସି ମ୍ୟାଚ୍ ଖେଳିବେ ନାହିଁ ବୋଲି କହିଛନ୍ତି ବ୍ୟାଟସମ୍ୟାନ ହନୁମା ବିହାରୀ। ଚଳିତ ରଣଜୀ ସିଜିନରେ ଆନ୍ଧ୍ରପ୍ରଦେଶ ଦଳ କ୍ବାର୍ଟର ଫାଇନାଲରେ ମଧ୍ୟପ୍ରଦେଶଠାରୁ ୪ ରନ୍ରେ ପରାସ୍ତ ହୋଇଛି। ସୋମବାର ଏହି ମ୍ୟାଚ ଶେଷ ହେବା ପରେ ସାମାଜିକ ଗଣମାଧ୍ୟମରେ ଏକ ବାର୍ତ୍ତା ଛାଡ଼ି ହନୁମା ଆଗାମୀ ଦିନରେ ଆନ୍ଧ୍ର ତରଫରୁ ଖେଳିବେ ନାହିଁ ବୋଲି ଦର୍ଶାଇଛନ୍ତି।
ହନୁମା ଚଳିତ ରଣଜୀ ସିଜିନ୍ର ପ୍ରଥମ ମ୍ୟାଚ୍ରେ ଆନ୍ଧ୍ରପ୍ରଦେଶ ଦଳର ନେତୃତ୍ବ ନେଇଥିଲେ। ତେବେ ଏହାପରେ ସେ ଅଧିନାୟକ ପଦ ଛାଡ଼ି ଦେଇଥିଲେ। ବ୍ୟକ୍ତିଗତ କାରଣରୁ ଅଧିନାୟକ ପଦ ଛାଡ଼ିଥିବା ସେତେବେଳେ ହନୁମା ଗଣମାଧ୍ୟମକୁ ସୂଚନା ଦେଇଥିଲେ। ତେବେ ତାଙ୍କୁ ଅଧିନାୟକ ପଦ ଛାଡ଼ିବାକୁ ଆନ୍ଧ୍ରପ୍ରଦେଶ କ୍ରିକେଟ ଆସୋସିଏସନ ତରଫରୁ ବାଧ୍ୟ କରାଯାଇଥିଲା ବୋଲି ହନୁମା ଦର୍ଶାଇଛନ୍ତି। ଦଳର ଜଣେ ଖେଳାଳିଙ୍କ ଉପରେ ସେ ବିରକ୍ତି ପ୍ରକାଶ କରିଥିଲେ। ସେହି ଖେଳାଳିଜଣଙ୍କ ବାପା ଜଣେ ରାଜନେତା ହୋଇଥିବାରୁ ତାଙ୍କ ଚାପରେ ଆନ୍ଧ୍ରପ୍ରଦେଶ କ୍ରିକେଟ୍ ଆସୋସିଏସନ ତରଫରୁ ଅଧିନାୟକ ପଦ ଛାଡ଼ିବାକୁ କୁହାଯାଇଥିଲା ବୋଲି ହନୁମା ସ୍ପଷ୍ଟ କରି ଦେଇଛନ୍ତି। ଆନ୍ଧ୍ରପ୍ରଦେଶ କ୍ରିକେଟ୍ ଆସୋସିଏସନର ପଦାଧିକାରୀ ମନମୁଖୀ କାରବାର ଚଳାଇଛନ୍ତି ଏବଂ ବହୁ ପ୍ରସଙ୍ଗରେ ସେମାନଙ୍କ କଥା ମାନିବାକୁ କ୍ରିକେଟରଙ୍କ ଉପରେ ଚାପ ପକାଉଥିବା ହନୁମା ଅଭିଯୋଗ କରିଛନ୍ତି। ଆନ୍ଧ୍ରପ୍ରଦେଶ କ୍ରିକେଟ ଦଳକୁ ସେ ବହୁତ ଭଲ ପାଆନ୍ତି ତେବେ କ୍ରିକେଟ୍ ଆସୋସିଏସନ ପଦାଧିକାରୀଙ୍କ କାର୍ଯ୍ୟକଳାପ ଯୋଗୁଁ ତାଙ୍କର ଆତ୍ମସମ୍ମାନ କ୍ଷୁଣ୍ଣ ହୋଇଥିବାରୁ ଏହି ଦଳ ତରଫରୁ ପୁନର୍ବାର ଖେଳିବେ ନାହିଁ ବୋଲି ହନୁମା ଘୋଷଣା କରିଛନ୍ତି।
