ଗୋପାଳପୁର: ଗୋପାଳପୁର ଥାନା ଅନ୍ତର୍ଗତ ନାରାୟଣପୁର ହରିଜନ ସାହିରେ ରହୁଥିବା ଜନୈକ ମହିଳାଙ୍କ ଘରେ କିଛି ମହିଳା ସଂଘବଦ୍ଧ ଭାବେ ପଶି ଆକ୍ରମଣ କରିବା ସହ ଲୁଟ କରିଥିବା ନେଇ ଥାନାରେ ଲିଖିତ ଅଭିଯୋଗ କରାଯାଇଛି। ଅଭିଯୋଗ ଅନୁଯାୟୀ ହରିଜନ ସାହିରେ ରହୁଥିବା ତ୍ରିବେଣୀ ପଟ୍ଟନାୟକଙ୍କ ଘରେ ଅଚାନକ ଦିନ ପ୍ରାୟ ସାଢ଼େ ଗୋଟାଏ ବେଳେ ପି ଦମୟନ୍ତୀ ରେଡ୍ଡୀଙ୍କ ସହ ପ୍ରାୟ ୧୫ ଜଣ ମହିଳା ପଶିବା ସହ ବ୍ୟାଙ୍କ ଖାତା ମାଗିଥିଲେ।
ଏହା ପରେ ଉକ୍ତ ମହିଳାମାନେ ତ୍ରିବେଣୀଙ୍କୁ ଆକ୍ରମଣ କରିବା ସହ ତାଙ୍କ ଘରର ଆଲମିରା ଭିତରେ ଥିବା ଏକ ବ୍ୟାଗ ସହ ସେଥିରେ ଥିବା ଏକ ବ୍ୟାଙ୍କ ଚେକ ବୁକ୍ ଓ ୩ହଜାର ଟଙ୍କା ସହ ସୁନା ଅଳଙ୍କାର ଲୁଟ କରି ନେଇଯାଇଥିଲେ।ଏହାର ପ୍ରତିବାଦ କରିବାରୁ ସେମାନେ ତ୍ରିବେଣୀଙ୍କ ମୋବାଇଲ ସହ ଘରର ଆସବାବପତ୍ର ଗୁଡ଼ିକୁ ଫୋପାଡି ଦେଇଥିଲେ। ଥାନାରେ ଘଟଣା ନେଇ ଜଣାଇଥିଲେ ତାଙ୍କୁ ଜୀବନରେ ମାରିଦେବାକୁ ମଧ୍ୟ ଧମକ ଦେଇଥିବା ନେଇ ଗୋପାଳପୁର ଥାନାରେ ତ୍ରିବେଣୀଙ୍କ ପକ୍ଷରୁ ସଲିଖିତ ଅଭିଯୋଗ କରାଯାଇଛି।
ଅଭିଯୋଗକୁ ଭିତ୍ତି କରି ପୁଲିସ ପକ୍ଷରୁ ମୋକଦ୍ଦମା ରୁଜ୍ଜୁ ସହ ତଦନ୍ତ ଚଳାଇଥିବା ଜଣାପଡ଼ିଛି। ଅନ୍ୟପଟେ ଦମୟନ୍ତୀଙ୍କ ସହ ଯୋଗାଯୋଗ ସମ୍ଭବ ହୋଇ ପାରିନଥିବାରୁ ଦମୟନ୍ତୀ ୟଙ୍କ ପ୍ରତିକ୍ରିୟା ମିଳିପାରିନାହିଁ।
Comments are closed.