କଲ୍ୟାଣସିଂହପୁର: ରାୟଗଡା ଜିଲା କଲ୍ୟାଣସିଂହପୁର ବ୍ଲକର ଦାନୁସାହିରେ ଥିବା ମାଆ ଗୃହ କେବଳ କାଗଜ ପତ୍ରରେ ଚାଲିଥିବା ଅଭିଯୋଗ ହେଉଛି । ବ୍ଲକରେ ମାଝୀଗୁଡା ଓ କଲ୍ୟାଣସିଂହପୁର ଦୁଇଟି ସ୍ଥାନରେ ମାଆ ଗୃହ କାର୍ଯ୍ୟକାରୀ ହେଉଛି । ଉକ୍ତ ମାଆ ଗୃହ ବ୍ଲକର ୯ଟି ପଞ୍ଚାୟତର ଗର୍ଭବତୀମାନଙ୍କୁ ଗର୍ଭ ଯନ୍ତ୍ରଣା ହେବା ପରଠାରୁ ଆଣି ମାଆ ଗୃହରେ ରଖି ସେମାନଙ୍କୁ ଉତ୍ତମ ଚିକିତ୍ସା ଓ ସୁଷମ ଖାଦ୍ୟ ଦେବା ମାଆ ଗୃହର ଦାୟିତ୍ୱ ରହିଛି । କିନ୍ତୁ ଏଠାରେ ଓଲଟା ଦେଖିବାକୁ ମିଳୁଛି । ଦୁର୍ଗମ ଅଞ୍ଚଳ ହେଉ ବା ଅନ୍ୟ ଦୂରଦୂରାନ୍ତର ଅଞ୍ଚଳର ଗର୍ଭବତୀମାନେ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ଚିକିତ୍ସା ପାଇଁ ଆସୁଥିବା ବେଳେ ମାଆ ଗୃହ ପରିଚାଳିକା କଳାବତୀ ନାଇଡୁ ଉକ୍ତ ଖବର ପାଇ ସାଥିରେ ଥିବା କର୍ମୀମାନଙ୍କୁ ସ୍ୱାସ୍ଥ୍ୟକେନ୍ଦ୍ରକୁ ପଠାଇ ତାଙ୍କର ସମ୍ପୂର୍ଣ୍ଣ ବିବରଣୀ ନେଇ ନିଜ ଖାତାରେ ଉଲ୍ଲେଖ କରି ଉପରିସ୍ଥ ଅଧିକାରୀଙ୍କୁ ରିପୋର୍ଟ ଦେଉଛନ୍ତି । ଆସିଥିବା ଗର୍ଭବତୀମାନେ ସ୍ୱାସ୍ଥ୍ୟକେନ୍ଦ୍ରରେ ଚିକିତ୍ସା ହୋଇ ଘରକୁ ଫେରି ଯାଉଛନ୍ତି। ଗର୍ଭବତୀଙ୍କୁ ମାଆ ଗୃହକୁ ନେଇ ନିୟମ ଅନୁଯାୟୀ ଖାଦ୍ୟ ନ ଦେଇ ସେମାନଙ୍କୁ ମାନସିକ ଯନ୍ତ୍ରଣା ଦେଉଥିବା ଯୋଗୁଁ ମାଆ ଗୃହ ଛାଡି ଲୁଚି ଚାଲିଯାଉଥିବା ଅଭିଯୋଗ ହେଉଛି । ଗର୍ଭବତୀଙ୍କୁ ବାର ଅନୁସାରେ ସକାଳ, ମଧ୍ୟାହ୍ନ, ଅପରାହ୍ନ ଓ ରାତିରେ କ’ଣ କ’ଣ ଖାଇବା ଦିଆଯିବ, ତା’ର ତାଲିକା ପ୍ରସ୍ତୁତ କରି କାନ୍ଥରେ ଟଙ୍ଗା ଯାଉଛି କିନ୍ତୁ ରୋଗୀକୁ କିଛି ଦିଆଯାଉ ନଥିବା ଅଭିଯୋଗ ହୋଇଛି । ଗୁରୁବାର ଦିନ ମାଆ ଗୃହରେ ୮ଜଣ ଗର୍ଭବତୀ ରହିଥିବା ସୂଚନା ମିଳିଥିଲା । ଏହାକୁ ନେଇ କିଛି ପ୍ରତିନିଧି ମାଆ ଗୃହକୁ ଯାଇ ଦେଖିବା ବେଳେ ଜଣେ ହେଲେ ରୋଗୀ ନ ଥିବା ଦେଖିଥିଲେ । ଏ ବିଷୟରେ ମାଆ ଗୃହ ପରିଚାଳିକାଙ୍କୁ ପଚାରିବାରୁ ବର୍ତ୍ତମାନ ସେମାନେ ବୁଲିବାକୁ ଯାଇଛନ୍ତି ବୋଲି କହିଥିଲେ । ପୁଣି ୭ଟା ସମୟରେ ଯାଇ ପଚାରିବାରୁ ୮ଟି ବେଡ୍ରେ ୯ଜଣ ଗର୍ଭବତୀ ଅଛନ୍ତି, ଚିକିତ୍ସା ପାଇଁ ସ୍ୱାସ୍ଥ୍ୟକେନ୍ଦ୍ରକୁ ୩ଜଣଙ୍କୁ ନିଆଯାଇଛି ଓ ଦୁଇ ଜଣଙ୍କୁ ତାଙ୍କ ସ୍ୱାମୀମାନେ ଆସି ନେଇଗଲେ ବୋଲି କହିଥିଲେ ।
ଅନ୍ୟପଟେ ସ୍ୱାସ୍ଥ୍ୟକେନ୍ଦ୍ରକୁ କୌଣସି ଗର୍ଭବତୀ ଚିକିତ୍ସା ପାଇଁ ଆସିନଥିବା ସ୍ୱାସ୍ଥ୍ୟକେନ୍ଦ୍ର ପକ୍ଷରୁ ଜଣାପଡ଼ିଛି । ସ୍ୱାସ୍ଥ୍ୟକେନ୍ଦ୍ରରୁ ମାଆ ଗୃହ ପରିଚାଳନା ଅଧିକାରିଣୀଙ୍କୁ ପଚାରିବାରୁ ତାଙ୍କ ସ୍ୱାମୀମାନେ ଆସି ଗର୍ଭବତୀମାନଙ୍କୁ ନେଇଯାଇଥିବା କହିଥିଲେ । ଗୋଟିଏ ଭୁଲକୁ ଲୁଚାଇବା ପାଇଁ ବହୁତଗୁଡିଏ ମିଛ କହି ଚାଲିଛନ୍ତି ମାଆ ଗୃହ ଅଧିକାରିଣୀ । ଏ ବିଷୟରେ ଭାରପ୍ରାପ୍ତ ଡାକ୍ତର ସୌମ୍ୟରଞ୍ଜନ ଜେନାଙ୍କୁ ପଚାରିବାରୁ ମାଆ ଗୃହରୁ ଗୋଟିଏ ବି ରୋଗୀ ଆସିନଥିବା କହିଥିଲେ ।
Comments are closed.