ଅଯୋଧ୍ୟା: ପ୍ରଭୁ ଶ୍ରୀରାମଙ୍କ ଅଯୋଧ୍ୟା ଆଜି ପୁରା ନବବଧୂ ଭଳି ସଜେଇ ହୋଇଛି । କାରଣ ନିଜ ଜନ୍ମସ୍ଥାନକୁ ଆଜି ଆସୁଛନ୍ତି ରାମଲାଲା । ରାମ ମନ୍ଦିର ଉଦଘାଟନ ସହିତ ରାମଲାଲାଙ୍କ ପ୍ରାଣ ପ୍ରତିଷ୍ଠା କରାଯିବ । ରାମଭକ୍ତଙ୍କ ୫୦୦ ବର୍ଷର ଅପେକ୍ଷାର ଅନ୍ତ ହେବାକୁ ଯାଉଥିବାରୁ ପୁରା ଅଯୋଧ୍ୟା ନଗରୀ ସହ ସାରା ଦେଶ ଉତ୍ସାହିତ ରହିଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମୁଖ୍ୟ ଯଜମାନ ହୋଇ ରାମ ମନ୍ଦିରର ଉଦଘାଟନ କରିବେ । ପ୍ରାଣ ପ୍ରତିଷ୍ଠା କାର୍ଯ୍ୟକ୍ରମ ପୂର୍ବରୁ ଗତ ୧୬ତାରିଖରୁ ସ୍ୱତନ୍ତ୍ର ପୂଜାର୍ଚ୍ଚନା କରାଯାଉଛି ।
ପ୍ରାଣ ପ୍ରତିଷ୍ଠା ସମାରୋହର ସମସ୍ତ ରୀତିନୀତି ୧୨୧ ଆଚାର୍ୟ୍ୟଙ୍କ ଦ୍ୱାରା ସମନ୍ୱିତ, ସମର୍ଥିତ ଏବଂ ମାର୍ଗଦର୍ଶନ କରାଯିବ । ବାରାଣାସୀର ଗଣେଶ ଶାସ୍ତ୍ରୀ ଦ୍ରାବିଡ ସମସ୍ତ ପ୍ରକ୍ରିୟା ଉପରେ ନଜର ରଖିବେ । ସଂଯୋଜନା କରିବେ ଏବଂ ମାର୍ଗଦର୍ଶନ କରିବେ ଓ କାଶୀ ଲକ୍ଷ୍ମୀକାନ୍ତ ଦୀକ୍ଷିତ ମୁଖ୍ୟ ଆଚାର୍ୟ୍ୟ ହେବେ। ଏହି ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ଆରଏସଏସ ମୁଖ୍ୟ ମୋହନ ଭାଗବତ, ଉତ୍ତରପ୍ରଦେଶ ରାଜ୍ୟପାଳ ଆନନ୍ଦୀବନ ପଟେଲ, ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଏବଂ ଅନ୍ୟ ମାନ୍ୟଗଣ୍ୟ ବ୍ୟକ୍ତି ଯୋଗଦେବେ।
ପ୍ରାଣ ପ୍ରତିଷ୍ଠା ସମାରୋହରେ ସାମିଲ ହେବାକୁ ଭିଆଇପି ମାନେ ଅଯୋଧ୍ୟାରେ ପହଂଚିବା ଆରମ୍ଭ କରିଛନ୍ତି । ହାଇଦ୍ରାବାଦରୁ ଅଭିନେତା ରାମଚରଣ ଓ ଚିରଞ୍ଜିବୀ ଅଯୋଧ୍ୟା ଅଭିମୁଖେ ଯାତ୍ରା କରୁଛନ୍ତି । ଅଭିନେତା ରାମ ଚରଣ କରିଛନ୍ତି ଯେ ଏହା ବହୁତ ଲମ୍ବା ସମୟର ଅପେକ୍ଷା ଥିଲା । ଏହି ଉତ୍ସବରେ ସାମିଲ ହେଉଥିବାରୁ ନିଜକୁ ଗରବାନ୍ୱିତ ଅନୁଭବ କରୁଛୁ । ଚିରଞ୍ଜିବୀ କହିଛନ୍ତି ଯେ ଏହି କାର୍ଯ୍ୟକ୍ରମ ମନକୁ ଆନନ୍ଦିତ କରୁଛି, ଏହା ଏକ ବିରଳ ସୁଯୋଗ । ଅନୁଭବ ହେଉଛି ଯେ ମୋର ପ୍ରଭୁ ହନୁମାନ ବ୍ୟକ୍ତିଗତ ଭାବରେ ମୋତେ ନିମନ୍ତ୍ରଣ କରିଛନ୍ତି ଏହାର ସାକ୍ଷୀ ହେଉଥିବାରୁ ଆମେ ଭାଗ୍ୟବାନ । ସୁପରଷ୍ଟାର ଅମିତାଭ ବଚ୍ଚନ ଅଯୋଧ୍ୟା ଅଭିମୁଖେ ଯାତ୍ରା କରିଛନ୍ତି। ବିଗ୍ ବି ରାମ ମନ୍ଦିର କାର୍ୟ୍ୟକ୍ରମରେ ଯୋଗଦେବେ । ରାମ ମନ୍ଦିର ସମାରୋହ ପାଇଁ ଅଯୋଧ୍ୟାରେ ପହଞ୍ଚିଥିବା ଅନୁପମ ଖେର ହନୁମାନଗରୀରେ ପହଞ୍ଚି ହନୁମାନଙ୍କ ଦର୍ଶନ କରିଥିଲେ।
