ହାଇଦରାବାଦ : ତେଲଙ୍ଗାନା ବିଧାନସଭା ନିର୍ବାଚନ ନିମନ୍ତେ ଗୁରୁବାର ଭୋଟ ଗ୍ରହଣ ହେବ । ରାଜ୍ୟର ୧୧୯ଟି ବିଧାନସଭା ଆସନ ଲାଗି ଏହି ଭୋଟ ଗ୍ରହଣ ହେବ। ଏଥିପାଇଁ ନିର୍ବାଚନ ଆୟୋଗଙ୍କ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି। ରାଜ୍ୟରେ ଶାସକ ଭାରତ ରାଷ୍ଟ୍ର ସମିତି (ବିଆରଏସ୍) ସହିତ ବିଜେପି ଓ କଂଗ୍ରେସ ମଧ୍ୟରେ ତ୍ରିପାକ୍ଷିକ ଲଢେଇ ହେଉଛି। ବିଆରଏସ୍ କ୍ରମାଗତ ତୃତୀୟ ଥର ପାଇଁ କ୍ଷମତା ଦଖଲ କରିବାକୁ ଲକ୍ଷ୍ୟ ରଖିଥିବାବେଳେ କଂଗ୍ରେସ ଓ ବିଜେପି ପ୍ରଥମ କରି ରାଜ୍ୟରେ କ୍ଷମତା ଦଖଲ ଲାଗି ଉଦ୍ୟମ କରିଛନ୍ତି। ଏହି ନିର୍ବାଚନରେ ରାଜ୍ୟର ୨୨୯୦ଜଣ ପ୍ରାର୍ଥୀ ପ୍ରତିଦ୍ବନ୍ଦ୍ବିତା କରୁଛନ୍ତି। ରାଜ୍ୟର ୩.୨୬ କୋଟି ଭୋଟର ଏହି ପ୍ରାର୍ଥୀଙ୍କ ଭାଗ୍ୟ ନିର୍ଦ୍ଧାରଣ କରିବେ। ମତଦାନ ନିମନ୍ତେ ରାଜ୍ୟରେ ୩୫,୬୫୫ଟି ମତଦାନ କେନ୍ଦ୍ର ଖୋଲାଯାଇଛି। ରାଜ୍ୟର ୧୦୬ଟି ବିଧାନସଭା କ୍ଷେତ୍ରରେ ସକାଳ ୭ଟାରୁ ୫ଟା ପର୍ଯ୍ୟନ୍ତ ଭୋଟଗ୍ରହଣ ହେବ। ଅବଶିଷ୍ଟ ୧୩ଟି ନକ୍ସଲ ପ୍ରଭାବିତ ବିଧାନସଭା କ୍ଷେତ୍ରରେ ସକାଳ ୭ଟାରୁ ୪ଟା ପର୍ଯ୍ୟନ୍ତ ଭୋଟଗ୍ରହଣ ହେବ।
ବିଧାନସଭା ନିର୍ବାଚନ ମତଦାନର ଦିନକ ପୂର୍ବରୁ ନିର୍ବାଚନ ଆୟୋଗ ହାଇଦରାବାଦର ୩ଜଣ ପୁଲିସ ଅଧିକାରୀଙ୍କୁ ନିଲମ୍ବନ କରିଛନ୍ତି। ବୁଧବାର ନିଲମ୍ବିତ ପୁଲିସ କର୍ମଚାରୀ ହେଲେ ହାଇଦରାବାଦ ସେଣ୍ଟ୍ରାଲ ଜୋନ୍ ଡିସିପି ଏମ ଭେଙ୍କଟେଶ୍ବରଲୁ, ଚିକାଡପାଲ୍ଲି ଏସିପି ଏ ୟାଦଗିରି ଓ ମୁର୍ସିଦାବାଦ ଇନ୍ସପେକ୍ଟର ଜାହାଙ୍ଗିର ଯାଦବ। ଏହି ତିନି ପୁଲିସ ଅଧିକାରୀ ନିର୍ବାଚନ ସମୟରେ ପକ୍ଷପାତ ନୀତି ଆପଣାଇଥିବା ନେଇ ସ୍ବତନ୍ତ୍ର ପର୍ଯ୍ୟବେକ୍ଷକଙ୍କ ପକ୍ଷରୁ ରିପୋର୍ଟ ଦିଆଯାଇଥିଲା। ନିର୍ବାଚନ ସମୟରେ ଜବତ ହୋଇଥିବା ୧୮ଲକ୍ଷ ଟଙ୍କାକୁ ନେଇ ଏହି ପୁଲିସ ଅଧିକାରୀମାନେ ପକ୍ଷପାତ ନୀତି ଆପଣାଇଥିବା ଅଭିଯୋଗ ହୋଇଥିଲା। ଡିସେମ୍ବର ୩ରେ ତେଲଙ୍ଗାନା ସହିତ ରାଜସ୍ଥାନ, ଛତିଶଗଡ, ମଧ୍ୟପ୍ରଦେଶ ଓ ମିଜୋରାମ ବିଧାନସଭା ନିର୍ବାଚନର ଭୋଟ ଗଣତି ହେବ।
Comments are closed.