ସରପଞ୍ଚଙ୍କ ଘର ଉପରକୁ ବୋମାମାଡ

ସୁଆଣ୍ଡୋ : ପୁରୀଜିଲା ଡେଲାଙ୍ଗ ଥାନା ଚାଇଁପୁର ସରପଞ୍ଚ ପ୍ରଦ୍ୟୁମ୍ନ ପରିଡାଙ୍କ ଘର ଉପରକୁ ବୁଧବାର ବିଳମ୍ବିତ ରାତିରେ ବୋମାମାଡ ହୋଇଥିବା ଥାନାରେ ଅଭିଯୋଗ ହୋଇଛି। ଘଟଣାରୁ ପ୍ରକାଶ ସରପଞ୍ଚଙ୍କ ପରିବାର ରାତିରେ ଘରେ ଶୋଇଥିବା ବେଳେ କୌଣସି ଦୁର୍ବୃତ ଘର କାନ୍ଥକୁ ଲଗାତର ପାଞ୍ଚଟି ବୋମାମାଡ କରି ଫେରାର ହୋଇ ଯାଇଛନ୍ତି । ଶ୍ରୀ ପରିଡା ଡେଲାଙ୍ଗ ଥାନାକୁ ଫୋନ୍ ଯୋଗେ ରାତିରେ ଘଟଣା ସମ୍ପର୍କରେ ଜଣାଇଥିଲେ । ଖବରପାଇ ସଙ୍ଗେ ସଙ୍ଗେ ଡେଲାଙ୍ଗ ଥାନା ଆଇଆଇସି ଅସିତ କୁମାର ମହାନ୍ତିଙ୍କ ସହିତ ହରିରାଜପୁର ଫାଣ୍ଡି ଅଧିକାରୀ ପ୍ରକାଶ ମଲ୍ଲିକ ସଦଳବଳେ ଘଟଣା ସ୍ଥଳରେ ପହଞ୍ଚି ଥିଲେ । ଘଟଣା ସ୍ଥଳରୁ ଫୁଟିଥିବା ବୋମାର ଛିଣ୍ଡା ସୁତୁଲି ଗୋଡି ଆଦି ଜବତ କରି ବୋମାମାଡରେ କ୍ଷତିଗ୍ରସ୍ତ ହୋଇଥିବା କାନ୍ଥର ପଲସ୍ତରା ଛାଡି ଯାଇଥିବା ଦେଖିଥିଲେ । ଏହି ଘଟଣା ପରେ ଶ୍ରୀ ପରିଡାଙ୍କ ପରିବାର ଭୟଭୀତ ହୋଇ ପଡିଛନ୍ତି । ପୋଲିସ ଉକ୍ତ ଘଟଣାକୁ ଗମ୍ଭୀରତାର ସହ ତଦନ୍ତ ଆରମ୍ଭ କରିଛନ୍ତି ବୋଲି ଜଣାପଡ଼ିଛି ।