ରେଙ୍ଗାଲି: ଗତ କିଛିଦିନ ହେଲା ପ୍ରବଳ ବର୍ଷା ଓ ପବନ ଯୋଗୁଁ ରେଙ୍ଗାଲି ବ୍ଲକ ଅଞ୍ଚଳରେ ଚାଷ ହୋଇଥିବା ସଅଳ ଅମଳକ୍ଷମ ଧାନ କ୍ଷତିଗ୍ରସ୍ତ ହୋଇଥିବା ଦେଖିବାକୁ ମିଳିଛି। ବିଗତ ବର୍ଷମାନଙ୍କରେ କ୍ରମାଗତ ଅନିୟମିତ ଓ ସ୍ବଳ୍ପ ବୃଷ୍ଟିପାତ ଯୋଗୁଁ ଚାଷୀ ସଅଳ ଅମଳକ୍ଷମ ଧାନ ଚାଷକୁ ପ୍ରାଧାନ୍ୟ ଦେଇ ଚାଷ କରୁଛନ୍ତି। ସଂପ୍ରତି ସଅଳ ଅମଳକ୍ଷମ ଧାନ କ୍ଷୀର ଢୋକି ସାରି ପାକଳ ଅବସ୍ଥାରେ ଥିବା ବେଳେ ତୁହାକୁ ତୁହା ପ୍ରବଳ ବର୍ଷା ଓ ପବନ ଫଳରେ ଧାନ ଗଛ ଜମିରେ ଶୋଇ ପଡ଼ି ପାଣିରେ ତିନ୍ତୁଛି। ଏହି ଅବସ୍ଥା ଯୋଗୁଁ ଚାଷୀ ଘୋର କ୍ଷତିଗ୍ରସ୍ତ ହେଉଛନ୍ତି। ଏମିତି ବର୍ଷା ଲାଗିରହିଲେ ଧାନ ଫସଲ ପାଣିରେ ପଚି ସଢିଯିବାର ଆଶଙ୍କା ରହିଛି। ବର୍ଷା ଓ ପବନ ଫଳରେ ଏବେ ଯେଉଁ ଧାନ ଫସଲରେ ଫୁଲ ଧରିଛି ତାହା ପବନରେ ଝଡି ଯାଇ କ୍ଷତିଗ୍ରସ୍ତ ହୋଇଥିବା ଜଣାପଡିଛି। କ୍ଷୟକ୍ଷତିର ଆକଳନ କରାଯାଇ କ୍ଷତିଗ୍ରସ୍ତ ଚାଷୀଙ୍କୁ କ୍ଷତିପୂରଣ ଦେବାକୁ ଚାଷୀ ମହଲରେ ଦାବୀ ହେଉଛି।
Comments are closed.