ଲାଞ୍ଜିଗଡ: କଳାହାଣ୍ଡି ଜିଲା ଲାଞ୍ଜିଗଡ଼ଠାରୁ କଟକ ଯାଉଥିବା ଏକସରକାରୀ(ଓଏସଆରଟିସି)ବସ ନମ୍ବର(ଓଡ଼-୦୫ବିସି-୪୧୭୨)ରୁ ୧୪୦ କିଲୋ ତମ୍ବା ପୁଲିସ ଜବତ କରିଛି। ଲାଞ୍ଜିଗଡ ଥାନା ପକ୍ଷରୁ ଏହି ବସର ଡ୍ରାଇଭର ଓ କଣ୍ଡକ୍ଟର ସମେତ ବସଟିକୁ ଲାଞ୍ଜିଗଡ ଥାନାରେ ଅଟକ ରଖାଯାଇଛି। ଫଳରେ ପୂର୍ବରୁ ବସରେ ଟିକଟ କଟିଥିବା ଯାତ୍ରୀ ଅସୁବିଧାର ସମ୍ମୁଖୀନ ହୋଇଥିବା ସୂଚନା ମିଳିଛି।
ସୂଚନାନୁସାରେ ଆଜି କୌଣସି ସୂତ୍ରରୁ ଖବର ପାଇ ଲାଞ୍ଜିଗଡ ପୁଲିସ ଥାନା ଅଧିକାରୀ ବିଜୟଲକ୍ଷ୍ମୀ ହିକକା ନିଜ ଟିମ ଲାଞ୍ଜିଗଡ଼-କଟକ ଯାଉଥିବା ସରକାରୀ ବସ ରହିଥିବା ସ୍ଥାନକୁ ଯାଇ ଚଢ଼ାଉ କରିଥିଲେ। ଚଢ଼ାଉ ସମୟରେ ବସ ଡିକିରୁ ପ୍ରାୟ ୧୪୦ କିଲୋ ତମ୍ବା ଜବତ କରିଥିଲା।ଏହାପରେ ବସଟିକୁ ଜବତ କରି ଥାନାକୁ ଆଣି ତଦନ୍ତ କରୁଥିବା ଜଣାପଡିଛି I ତମ୍ବା ବସ୍ତା ପଠାଉଥିବା ମୁଖ୍ୟ ଆସାମୀ ବର୍ତ୍ତମାନ ଫେରାର ଥିବାବେଳେ ବସର ୨ ଜଣ ଡ୍ରାଇଭର ଏବଂ କଣ୍ଡକ୍ଟରକୁ ଥାନାରେ ଅଟକ ରଖି ତଦନ୍ତ ଜାରି ରହିଥିବା ଥାନାଧିକାରୀ ବିଜୟଲକ୍ଷ୍ମୀ ହିକକା ସୂଚନା ଦେଇଛନ୍ତି।
