୯ମାସର ଗର୍ଭବତୀ ବଧୂକୁ ହତ୍ୟା ଅଭିଯୋଗ, ଶ୍ୱଶୁର ବିଚିତ୍ର ଓ ସ୍ୱାମୀ ପ୍ରଶାନ୍ତ ଥାନାରେ ଅଟକ

ଆଠଗଡ: ଆଠଗଡ ଥାନା ଅନ୍ତର୍ଗତ ଜେନାପଦା ପଞ୍ଚାୟତ ଅଧିନ ଜେନାପଦାଦେଶ ଗ୍ରାମରେ ଜଣେ ୯ମାସର ଗର୍ଭବତୀ ବୋହୂକୁ ଶ୍ୱଶୁର ଘର ଲୋକ ମାରି ଟାଙ୍ଗି ଦେଇଥିବା ଆଠଗଡ ଥାନାରେ ଅଭିଯୋଗ ହୋଇଛି। ପ୍ରକାଶ ଯୋଗ୍ୟ ୨୦୨୨ମସିହା ଏପ୍ରିଲ ୨୫ତାରିଖରେ ଖୁଣ୍ଟୁକଟା ପଞ୍ଚାୟତ ଅନ୍ତର୍ଗତ ରାଧାମୋହନପୁର ଗ୍ରାମର ନିରଞ୍ଜନ ରାଉତଙ୍କ ଝିଅ ପୂଣ୍ଣିମା(୨୦)ଙ୍କ ସହିତ ଜେନାପଦା ଗ୍ରାମର ବିଚିତ୍ର ରାଉତଙ୍କ ପୁଅ ପ୍ରଶାନ୍ତ ରାଉତଙ୍କର ବୈଦିକ ରୀତିରେ ବିବାହ ହୋଇଥିଲା। ବିବାହ ସମୟରେ ଯୌତୁକ ବାବଦକୁ ୫୦ହଜାର ଟଙ୍କା, ସୁନା ଚେନ, ମୁଦି, ଟିଭି, ଫ୍ରିଜ, ଆଲମିରା ସହିତ ଅନ୍ୟାନ୍ୟ ଆସବାବପତ୍ର ଦିଆଯାଇଥିଲା। ତେବେ ବିବାହର କିଛିଦିନ ପରେ ଅଧିକ ଯୌତୁକ ଦାବି କରି ଶାଶୁଘର ଲୋକେ ପୂର୍ଣ୍ଣିମାଙ୍କୁ ବାରମ୍ବାର ନିର୍ଯ୍ୟାତନା ଦେଇଆସୁଥିବା ସେ ନିଜ ବାପାମାଆଙ୍କୁ ଜଣାଇଥିଲେ। ତେବେ ରବିବାର ପୂଣ୍ଣିମା ଏକ କୋଠରୀରେ ବେକରେ ଲୁଗା ବାନ୍ଧି ଝୁଲିପଡିଥିବା ଦେଖିବାକୁ ମିଳିଥିଲା। ଶ୍ୱଶୁରଘର ଲୋକ ତାଙ୍କୁ ମାରି ଟାଙ୍ଗି ଦେଇଥିବା ପୂଣ୍ଣିମାଙ୍କର ବାପା ଆଠଗଡ ଥାନାରେ ଅଭିଯୋଗ କରିଥିଲେ। ଅଭିଯୋଗ ପାଇବା ପରେ ଆଇଆଇସି ଅନିରୁଦ୍ଧ ମୁଦୁଲି ଅନ୍ୟ ପୁଲିସ ଅଧିକାରୀଙ୍କ ସହ ଘଟଣାସ୍ଥଳକୁ ଯାଇ ତଦନ୍ତ କରିବା ସହ ଶ୍ୱଶୁର ବିଚିତ୍ର ଓ ସ୍ୱାମୀ ପ୍ରଶାନ୍ତଙ୍କୁ ଥାନାକୁ ଆଣି ଅଟକ ରଖିଥିବା ଜଣାପଡିଛି। ଆସନ୍ତାକାଲି ମୃତଦେହ ବ୍ୟବଚ୍ଛେଦ ପରେ ପ୍ରକୃତ ମୃତ୍ୟୁର କାରଣ ଜଣାପଡିବା ସହ ତଦନ୍ତ ପ୍ରକ୍ରିୟା ଆଗେଇବ ବୋଲି ତଦନ୍ତକାରୀ ଅଧିକାରୀ ଉପନିରୀକ୍ଷକ ବିଶ୍ୱଜିତ୍‍ ଜେନା ପ୍ରକାଶ କରିଛନ୍ତି।