ଅବିଶ୍ରାନ୍ତ ବର୍ଷା, ହରଭଙ୍ଗାର ବିଭିନ୍ନ ଅଞ୍ଚଳ ଜଳମଗ୍ନ

ହରଭଙ୍ଗା : ଲଘୁଚାପ ପ୍ରଭାବରେ ବୌଦ୍ଧ ଜିଲାରେ ଗତ ମଙ୍ଗଳବାର ମଧ୍ୟାହ୍ନ ସମୟରୁ ଏପର୍ଯ୍ୟନ୍ତ ଦୀର୍ଘ ୪୮ଘଣ୍ଟା ଧରି ଲଗାଣ ବର୍ଷା ଲାଗି ରହିଛି । ଜିଲାରେ ୬୯୪.୬ ମିମି ବର୍ଷା ହୋଇଥିବା ରେକର୍ଡରୁ ଜଣାପଡିଛି । ସେଥିରୁ ବୌଦ୍ଧରେ ସର୍ବାଧିକ ୩୯୦.୦୬ମିମି, କଣ୍ଟାମଳ ୧୬୦.୦୬ମିମି ଏବଂ ହରଭଙ୍ଗା ବ୍ଲକରେ ୧୪୩.୦୪ମିମି ବର୍ଷା ହୋଇଥିବା ରେକର୍ଡରୁ ଜଣାପଡିଛି । ବର୍ଷା ପ୍ରଭାବରେ ଖୋର୍ଦ୍ଧା -ବଲାଙ୍ଗୀର ଜାତୀୟ ରାଜପଥର ମୁରଶୁଣ୍ଡି, ଖୁଣ୍ଟବନ୍ଧ ରାସ୍ତାରେ ବନ୍ୟା ପାଣି ଚାଲୁଥିବାରୁ ଯାତାୟାତ ବାଧାପ୍ରାପ୍ତ ହୋଇଛି । ସେହିପରି ଲଣ୍ଡିବନ୍ଧ ବିଦ୍ୟୁତ ଗ୍ରୀଡ଼ରେ ୪ ଫୁଟ ପାଣି ଯୋଗୁଁ ଗତକାଲି ଠାରୁ ହରଭଙ୍ଗା ବ୍ଲକରେ ବିଦ୍ୟୁତ ସରବରାହ ବାଧାପ୍ରାପ୍ତ ହୋଇଛି ।

ଵର୍ତମାନ ହରଭଙ୍ଗା -ଛତ୍ରଙ୍ଗ ପୂର୍ତ୍ତ ରାସ୍ତାର ଶଗଡିଆ ପୋଲ ଉପରେ ବନ୍ୟା ପାଣି ଯୋଗୁଁ ଏହି ରାସ୍ତାରେ ଯାତାୟାତ ବାଧାପ୍ରାପ୍ତ ହୋଇଛି । ଅନ୍ୟପଟେ ମହାନଦୀରେ ଜଳସ୍ତର ବୃଦ୍ଧିକୁ ଦୃଷ୍ଟିରେ ରଖି ବନ୍ୟା ଆଶଙ୍କା ପ୍ରକାଶ ପାଇଛି । ଏହାକୁ ଦୃଷ୍ଟିରେ ରଖି ବ୍ଲକ ପ୍ରଶାସନ ପକ୍ଷରୁ ତଳିଆ ଅଞ୍ଚଳ କୋଡାସିଙ୍ଗା ଭଳି ଗ୍ରାମରେ ପ୍ରଶାସନିକ ଟିମ ପକ୍ଷରୁ ଜଳ ଓ ପରିମଳ ଯନ୍ତ୍ରୀ ପ୍ରଦୀପ କୁମାର ଜେନା, ପିଈଓ ଶ୍ରୀକାନ୍ତ ପ୍ରଧାନ, ହରଭଙ୍ଗା ସରପଞ୍ଚ ପ୍ରତିନିଧି ପ୍ରକାଶ ବେହେରା ପ୍ରମୁଖ କୋଡାଶିଙ୍ଗା, ଅତଳସରା, କୁଶଙ୍ଗ, କୁମାରୀ ଭଳି ବନ୍ୟା ପ୍ରଭାବିତ ଗାଁ ଗୁଡିକରେ ପହଞ୍ଚି ଆଗୁଆ ସ୍ଥିତି ପରଖିଥିବା ଜଣାପଡିଛି ।

ବନ୍ୟାକୁ ଦୃଷ୍ଟିରେ ରଖି ବୌଦ୍ଧ ଉପଜିଲ୍ଲାପାଳ ରବିନ୍ଦ୍ର ନାଥ କହଁର, ହରଭଙ୍ଗା ଅତିରିକ୍ତ ତହସିଲଦାର ବିଶ୍ୱଜିତ ପ୍ରଧାନ ପ୍ରମୁଖ ହରଭଙ୍ଗା ବନ୍ୟା ଆଶ୍ରୟ ସ୍ଥଳରେ ପହଞ୍ଚି ପ୍ରାକ ପ୍ରସ୍ତୁତି ଉପରେ ସ୍ଥାନୀୟ ସରପଞ୍ଚଙ୍କ ସହିତ ଆଲୋଚନା କରିଥିବା ଜଣାପଡିଛି।