ସମ୍ବଲପୁର : ଅବକାରୀ ବିଭାଗର ଗୁଇନ୍ଦା ଦଳ ପକ୍ଷରୁ ନିୟମିତ ଚେକିଂ ଅଭିଯାନ ସମୟରେ ସୋମବାର ଏକ ପିକଅପ ସମେତ ଗଞ୍ଜେଇ ଜବତ କରାଯାଇଛି। ଅବକାରୀ ଗୁଇନ୍ଦା ବିଭାଗର ସୂଚନାନୁଯାୟୀ, ସକାଳ ସମୟରେ ଚେକିଂ ସମୟରେ ଶାସନ ଚେକ ଗେଟ ନିକଟରେ ବିଜୁ ଏକ୍ସପ୍ରେସ ୱେ ଦେଇ ଯାଉଥିବା ଏକ ପିକଅପକୁ ଅବକାରୀ ଦଳ ଅଟକାଇଥିଲା। ଉକ୍ତ ଗାଡିକୁ ଚେକିଂ ସମୟରେ ଗୁପ୍ତ ଚାମ୍ବରରେ ଲୁକ୍କାୟିତ ଭାବରେ ରଖାଯାଇ ଥିବା ୪ଟି ଜରି ବସ୍ତା ମଧ୍ୟରୁ ସମୁଦାୟ ୧ କୁଇଣ୍ଟାଲ ଗଞ୍ଜେଇ ଜବତ କରାଯାଇଥିଲା। ଗାଡି ଯୋଗେ ବେଆଇନ ଭାବରେ ଗଞ୍ଜେଇ ଚାଲାଣ ଅଭିଯୋଗରେ ପଶ୍ଚିମବଙ୍ଗ ରାଜୟର ମୁର୍ସିଦାବାଦ ଜିଲା ନିବାସୀ ବିଟ୍ଟୁ ସରକାରଙ୍କୁ ଅବକାରୀ ପୁଲିସ ଗିରଫ କରିଛି। ଅଭିଯୁକ୍ତ ନିକଟରୁ ଅବକାରୀ ପୁଲିସ ମୋବାଇଲ, ପିକଅପ ଗାଡି ଓ ଅନ୍ୟାନ୍ୟ ସାମଗ୍ରୀ ଜବତ କରିଛି। ଏହି ଗଞ୍ଜେଇ ଗୁଡିକୁ ଅବୈଧ୍ୟ ଭାବରେ ଚାଲାଣକାରୀ ବୌଦ୍ଧ ଜିଲାରୁ ଝାରଖଣ୍ଡ ରାଜ୍ୟର ରାଞ୍ଚି ଅଞ୍ଚଳକୁ ଚାଲାଣ କରୁଥିଲେ। ଜବତ ହୋଇଥିବା ଗଞ୍ଜେଇ, ଗାଡି ଓ ଅନ୍ୟାନ୍ୟ ସମାଗ୍ରୀ ଗୁଡିକର ଆନୁମାନିକ ମୂଲ୍ୟ ୧୮ ଲକ୍ଷ ଟଙ୍କାରୁ ଉର୍ଦ୍ଧ୍ୱ ହେବ। ଏ ସମ୍ପର୍କରେ ଏକ ମାମଲା ରୁଜୁ କରାଯାଇ ଅଭିଯୁକ୍ତ ମାନଙ୍କୁ ଅଦାଲତ ଚାଲାଣ କରାଯାଇଛି ବୋଲି ଡିଏସପି ବିପ୍ର ଚରଣ ମଣ୍ଡଳ କହିଛନ୍ତି।
Comments are closed.