କଳାପଥର : ବାଙ୍କୀ କଟକ ଜିଲ୍ଲାର ଏକ ପ୍ରମୁଖ ଉପଖଣ୍ଡ ହୋଇଥିଲା ବେଳେ ସ୍ୱାସ୍ଥ୍ୟ ସେବାରେ ଉନ୍ନତି ପାଇଁ ବାଙ୍କୀ ଉପଖଣ୍ଡ ଚିକିତ୍ସାଳୟ ପ୍ରତିଷ୍ଠା କରାଯାଇଥିଲା । କିନ୍ତୁ ବର୍ତ୍ତମାନ ପରିସ୍ଥିତିରେ ନାହିଁ ନାହିଁରେ ଚାଲିଛି ଏହି ସରକାରୀ ଅନୁଷ୍ଠାନଟି। ବାଙ୍କୀ ଉପଖଣ୍ଡ ବ୍ୟତୀତ ଆଖପାଖ ଅଞ୍ଚଳର ପ୍ରାୟ ୫୦ହଜାରରୁ ଅଧିକ ଜନସାଧାରଣ ମୁଖ୍ୟତଃ ଏହି ଚିକିତ୍ସାଳୟ ଉପରେ ନିର୍ଭର କରୁଥିବା ବେଳେ ଏହି ଚିକିତ୍ସାଳୟ ସେବା ଯୋଗାଇବାରେ ଫେଲ୍ ମାରିଛି । ନିୟମିତ ଭାବେ କାର୍ଯ୍ୟରତ ଥିବା ଡାକ୍ତରମାନେ ବିଳମ୍ବରେ ଆସୁଥିବାରୁ ରୋଗୀ ମାନେ ବାହାରେ ଅପେକ୍ଷା କରି କଲବଲ ହେଉଥିବା ବାରମ୍ବାର ଅଭିଯୋଗ ହେଉଛି। ମେଡିସିନ୍ ରିପ୍ରେଜେଣ୍ଟିଭ୍ ଏବଂ ପାଥୋଲାବ୍ ଦଣ୍ଡିଆମାନଙ୍କ ପାଦୁର୍ଭାବ ଚିକିତ୍ସାଳୟ ପରିସର ମଧ୍ୟରେ ବଢ଼ୁଥିବା ବେଳେ କର୍ତ୍ତୃପକ୍ଷଙ୍କ କାର୍ଯ୍ୟାନୁଷ୍ଠାନ ଶୂନ ପରି ମନେହୁଏ। କର୍ତ୍ତୃପକ୍ଷଙ୍କ ତରଫରୁ ନାମକୁ ମାତ୍ର ପୂର୍ବରୁ ବାରଣ ସଦୃଶ ଏକ କାଗଜ ଛପାଯାଇ କାନ୍ଥରେ ମରାଯାଇଥିଲେ ମଧ୍ୟ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉନାହିଁ। ମେଜର ଓଟି କାର୍ଯ୍ୟକ୍ଷମ ଥିବା ବେଳେ ଆନେସ୍ଥେସିଆ ଡାକ୍ତର ନଥିବା ହେତୁ କୌଣସି ପ୍ରକାର ଅସ୍ତ୍ରୋପ୍ରଚାର ହେଉନଥିବା ଜଣାଯାଇଛି। ଫଳରେ ଯନ୍ତ୍ରାଂଶଗୁଡ଼ିକ ଖତ ଖାଇବାକୁ ବସିଥିବା ଦେଖାଯାଇଛି। ବାଙ୍କୀ ଉପଖଣ୍ଡ ମୁଖ୍ୟ ଚିକିତ୍ସାଳୟ ୯୦ ଶଯ୍ୟା ବିଶିଷ୍ଟ ହୋଇଥିବା ବେଳେ ଶଯ୍ୟା ଗୁଡିକ ଖାଲି ପଡୁଥିବା ଦେଖିବାକୁ ମିଳୁଛି। ଡାକ୍ତର ଅଭାବଜନିତ ସମସ୍ୟା ଚିକିତ୍ସାଳୟଟିରେ ଦେଖିବାକୁ ମିଳୁଥିବା ବେଳେ ସରକାରୀ କାଗଜ କଲମରେ ଡାକ୍ତର ପୂରଣ ହୋଇଥିବା ସୂଚନା ମିଳିଛି।
ପ୍ରାପ୍ତ ସୂଚନା ଅନୁଯାୟୀ ୧୪ଗୋଟି ପୋଷ୍ଟ ଏଠାରେ ରହିଥିବା ବେଳେ ଡାକ୍ତର ଅଭାବ ଦେଖାଦେଇଛି। ସୂଚନା ଥାଉକି ସବ୍ଡ଼ିଭିଜନ୍ ହସ୍ପିଟାଲରେ ଚିକିତ୍ସା ସେବା ବ୍ୟାହତ ହେଉଥିବା ବେଳେ ଦୁଇ ବର୍ଷରୁ ଉଦ୍ଧ୍ୱର୍ ହେବ ବାଙ୍କୀ ଚିକିତ୍ସାଳୟରେ କାର୍ଯ୍ୟରତ ଥିବା ଜଣେ ଡାକ୍ତରଙ୍କୁ କଳାପଥର ଡାକ୍ତରଖାନାକୁ ଡେପୁଟେସନରେ ପଠାଯାଇଅଛି। ଏକ ସବଡିଭିଜନସ୍ତରୀୟ ମେଡିକାଲରେ ଜଣେ ଭେଷଜ ଡାକ୍ତର ନରହିବା ଏକ ଦୁର୍ଭାଗ୍ୟଜନକ ବିଷୟ ।