ଆଠଗଡ: ପବିତ୍ର ହେରାପଞ୍ଚମୀ ତିଥିରେ ପରମ୍ପରା ଆଧାରରେ ଆଜି (ଶନିବାର) ଅଭିମାନିନୀ ମହାଲକ୍ଷ୍ମୀ ଅଟ୍ଟାଳି ଜଗନ୍ନାଥଙ୍କ ରଥ ଭାଙ୍ଗି ମନ୍ଦିରକୁ ଫେରିଛନ୍ତି। ମହାଲକ୍ଷ୍ମୀଙ୍କୁ ସାଥିରେ ନନେଇ ବଡଭାଇ ବଳଭଦ୍ର ଓ ସାନ ଭଉଣୀ ସୁଭଦ୍ରାଙ୍କୁ ସାଥିରେ ଧରି ଶ୍ରୀ ଜଗନ୍ନାଥ ନବଦିନାତ୍ମକ ଶ୍ରୀଗୁଣ୍ଡିଚା ଯାତ୍ରା କରିଥିବାରୁ ରାଗ ଓ ଅଭିମାନ ଜର୍ଜରିତ ଶନିବାର ରାତିରେ ଗୁଣ୍ଡିଚାଘରକୁ ଯାଇ ଜଗନ୍ନାଥଙ୍କୁ ଭେଟି ଫେରିବା ବେଳେ ରଥ ଭାଙ୍ଗିଥିଲେ। ଅଟ୍ଟାଳି ଜଗନ୍ନାଥ ମନ୍ଦିରରୁ ଏକ ସୁସଜ୍ଜିତ ବିମାନରେ ବିରାଜମାନ ହୋଇ ଭବ୍ୟ ଶୋଭାଯାତ୍ରାରେ ଯଜ୍ଞନାରାୟଣ ମନ୍ଦିରସ୍ଥିତ ଗୁଣ୍ଡିଚା ଘରକୁ ଆସିଥିଲେ। ସେଠାରେ ପାରମ୍ପରିକ ପୂଜାର୍ଚ୍ଚନା ଓ ଲକ୍ଷ୍ମୀ ନାରାୟଣ ଭେଟ ନୀତି ସମ୍ପନ୍ନ ହୋଇଥିଲା।
ସ୍ୱମନ୍ଦିର ଫେରିବା ବାଟରେ ମହାଲକ୍ଷ୍ମୀ ଶ୍ରୀ ଜଗନ୍ନାଥଙ୍କ ରଥର ଗୋଟିଏ ଚକ ଭାଙ୍ଗିଥିଲେ ।ରାଜପୁରୋହିତ ସୁଶାନ୍ତ କୁମାର ମିଶ୍ର ଏହିସବୁ ନୀତିକାନ୍ତି ସମ୍ପନ୍ନ କରିଥିବାବେଳେ ତାଙ୍କୁ ଏଥିରେ ବଡପଣ୍ଡା ଶରତ କୁମାର ପଣ୍ଡା ଓ ସୁଶାନ୍ତ କୁମାର ପଣ୍ଡାଙ୍କ ସମେତ ଅନ୍ଯ ସେବାୟତ ସହଯୋଗ କରିଥିଲେ । ଏହି ଅପୂର୍ବ ଲକ୍ଷ୍ମୀନାରାୟଣ ଭେଟ ଓ ରଥ ଭଙ୍ଗା ନୀତି ଦେଖିବାକୁ ବହୁ ଶ୍ରଦ୍ଧାଳୁଙ୍କ ଉପସ୍ଥିତି ଦେଖିବାକୁ ମିଳିଥିଲା। ଦେବୋତ୍ତର ସହକାରୀ ନିର୍ବାହୀ ଅଧିକାରୀ ତଥା ତହସିଲଦାର ପ୍ରିୟବ୍ରତ ଦାସଙ୍କ ପ୍ରତ୍ୟକ୍ଷ ତତ୍ତ୍ବାବଧାନରେ ଅନୁଷ୍ଠିତ ଏହି କାର୍ଯ୍ୟକ୍ରମକୁ ଦେବୋତ୍ତର ସୁପରଭାଇଜର ଭବାନୀ ଶଙ୍କର ପଣ୍ଡା ପରିଚାଳନା କରିଥିଲେ।
