ମଣିପୁର ବିସ୍ଥାପିତଙ୍କ ଲାଗି କେନ୍ଦ୍ର ସରକାରଙ୍କ ୧୦୧ କୋଟିର ସହାୟତା ଘୋଷଣା

ନୂଆଦିଲ୍ଲୀ : ମଣିପୁରରେ ସୃଷ୍ଟ ହିଂସାରେ ଯେଉଁମାନେ ବିସ୍ଥାପିତ ହୋଇଛନ୍ତି ସେମାନଙ୍କ ନିମନ୍ତେ ୧୦୧.୭୫ କୋଟି ଟଙ୍କାର ସହାୟତା ରାଶି ଘୋଷଣା କରିଛନ୍ତି କେନ୍ଦ୍ର ସରକାର। କେନ୍ଦ୍ର ଗୃହ ମନ୍ତ୍ରୀ ଅମିତ ଶାହାଙ୍କ ନିର୍ଦେଶକ୍ରମେ ଏହି ସହାୟତା ରାଶି ଘୋଷଣା କରାଯାଇଥିବା ଗୁରୁବାର ସୂଚନା ଦେଇଛନ୍ତି ମଣିପୁର ସରକାରଙ୍କ ସୁରକ୍ଷା ପରାମର୍ଶଦାତା କୁଲଦୀପ ସିଂହ।
ମଣିପୁରରେ ବର୍ତ୍ତମାନ ସ୍ଥିତି ଶାନ୍ତିପୂର୍ଣ୍ଣ ରହିଛି ଏବଂ ଗତ ୪୮ ଘଣ୍ଟା ମଧ୍ୟରେ କୌଣସି ସ୍ଥାନରେ ହିଂସା ହୋଇନଥିବା କୁଲଦୀପ ସୂଚନା ଦେଇଥିଲେ। ସେହିପରି ଗତ ୨୪ ଘଣ୍ଟା ମଧ୍ୟରେ ପୂର୍ବ ଇମ୍ପାଲ୍‌ ଜିଲାରୁ ୨୭ଟି ବନ୍ଧୁକ, ୨୪୫ଟି ଗୁଳି ଓ ୪୧ଟି ବୋମା ଜବତ କରାଯାଇଥିବା ସେ କହିଥିଲେ। ସେହିପରି ବିଷ୍ଣୁପୁର ଜିଲାରୁ ଗୋଟିଏ ବନ୍ଧୁକ ଓ ଦୁଇଟି ବୋମା ଜବତ ହୋଇଥିବା ସେ ସୂଚନା ଦେଇଥିଲେ। ବର୍ତ୍ତମାନ ସୁଦ୍ଧା ମୋଟ୍‌ ୮୯୬ଟି ବନ୍ଧୁକ, ୧୧ ହଜାରରୁ ଅଧିକ ଗୁଳି ଓ ୨୦୦ଟି ବୋମା ଜବତ କରାଯଇଥିବା ସେ କହିଥିଲେ।
ମଣିପୁରର ସ୍ଥିତି ଶାନ୍ତିପୂର୍ଣ୍ଣ ରହିଥିବାରୁ ୫ଟି ଜିଲାରେ ୧୨ ଘଣ୍ଟା ଓ ଅନ୍ୟ କେତେକ ଜିଲାରେ ୮ରୁ ୧୦ ଘଣ୍ଟା ସାନ୍ଧ୍ୟ ଆଇନ କୋହଳ କରାଯାଇଛି। ୬ଟି ଜିଲାରେ ସାନ୍ଧ୍ୟ ଆଇନକୁ ଉଠାଇ ଦିଆଯାଇଛି। ସେହିପରି ଜାତୀୟ ରାଜପଥରେ ଗାଡ଼ିମୋଟର ଚଳାଚଳ ସ୍ବାଭାବିକ ରହିଛି। ଦଙ୍ଗାଗ୍ରସ୍ତ ଅଞ୍ଚଳକୁ ବରିଷ୍ଠ ଅଧିକାରୀମାନେ ଯାଇ ସେଠାକାର ସ୍ଥିତି ଅନୁଧ୍ୟାନ କରୁଛନ୍ତି। ସେସବୁ ଅଞ୍ଚଳରେ କଡ଼ା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି। ସେହିପରି ମଣିପୁରର ମନ୍ତ୍ରୀ ଓ ବିଧାୟକମାନେ ବିଭିନ୍ନ ଅଞ୍ଚଳ ବୁଲିବା ସହ ଶାନ୍ତି ବଜାୟ ରଖିବାକୁ ଲୋକଙ୍କୁ ପରାମର୍ଶ ଦେଉଛନ୍ତି। ସୁରକ୍ଷାକର୍ମୀଙ୍କ ତତ୍ତ୍ବାବଧାନରେ ବିଭିନ୍ନ ଗାଁ ଓ ସହରରେ ଜନସାଧାରଣଙ୍କୁ ନେଇ ବୈଠକ ଅନୁଷ୍ଠିତ ହେଉଛି।