କଲମପୁର: କଲମପୁର ବ୍ଲକର ବଲାଗାଁରେ ରବିବାର ଘଟିଛି ଏକ ଦୁଃଖଦ ଘଟଣା। ନାଗସାପ କାମୁଡ଼ାରେ ଜଣେ ବାଳକଙ୍କ ମୃତ୍ୟୁ ଘଟିଛି। ଜଣେ ୧୧ ବର୍ଷିୟ ବାଳକ ଧାନ ଅମଳ ହୋଇ ସାରିଥିବା ଏକ ଜମିରେ କିଛି ଧାନ ସଂଗ୍ରହ କରୁଥିବାବେଳେ ଏକ ନାଗ ସାପ ତାଙ୍କୁ କାମୁଡି ଦେଇଥିଲା। ଯାହା ଫଳରେ ବାଳକ ଜଣକ ଗୁରୁତର ହୋଇପଡ଼ିଥିଲେ। ପରିବାର ଲୋକ ଗୁରୁତର ବାଳକଙ୍କୁ ଉଦ୍ଧାର କରି ଅପରାହ୍ନ ୩ଟା ବେଳେ ଚିକିତ୍ସା ପାଇଁ କଲମପୁର ଗୋଷ୍ଠି ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତ କରିଥିଲେ। କିନ୍ତୁ ଚିକିତ୍ସାଧିନ ଅବସ୍ଥାରେ ବାଳକଙ୍କ ମୃତ୍ୟୁ ଘଟିଥିବା ଜଣାପଡ଼ିଛି।
ସୂଚନା ଅନୁସାରେ, ବଲାଗାଁର ଗରିବ ନାଏକଙ୍କ ୧୧ ବର୍ଷିୟ ପୁଅ ହିମାଂଶୁ ଗାଁର ଧାନ ଅମଳ ସରିଥିବା ଜମିରେ କିଛି ଧାନ ସଂଗ୍ରହ କରୁଥିଲେ। ଏହି ସମୟରେ ମୂଷାଗାତ ନିକଟରେ ପଡ଼ିଥିବା ଧାନକୁ କାଢୁଥିବା ବେଳେ ସେଠାରେ ଥିବା ନାଗ ସାପ ହିମାଂଶୁଙ୍କୁ ଚୋଟ ପରେ ଚୋଟ ମାରିଥିଲା। ଫଳରେ ବାଳକ ଜଣକ ଗୁରୁତର ହୋଇ ପଡ଼ିଥିଲେ। ଗୁରୁତର ଅବସ୍ଥାରେ ଚିକିତ୍ସା ପାଇଁ ତାଙ୍କୁ କଲମପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା। ମାତ୍ର ଚିକିତ୍ସାଧିନ ଅବସ୍ଥାରେ ବାଳକଙ୍କ ମୃତ୍ୟୁ ଘଟିଛି। ଏନେଇ କଲମପୁର ପୁଲିସକୁ ସୂଚନା ଦିଆଯାଇଛି। ପୁଲିସ ଏକ ଅପମୃତ୍ୟୁ ମାମଲା ରୁଜୁ କରିଛି। ସବଇନ୍ସପେକ୍ଟର ଡୋଳାମଣି ବିଶି ଘଟଣା ସ୍ଥଳରେ ପହଞ୍ଚି ସରଜମିନ ତଦନ୍ତ କରି ବ୍ୟବଚ୍ଛେଦ ପାଇଁ ଜୟପାଟଣା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ପଠାଇଥିଲେ।
