ନାରାୟଣପାଟଣା: କୋରାପୁଟ ଜିଲା ନାରାୟଣପାଟଣା ବ୍ଲକ ଅନ୍ତର୍ଗତ ତଳଗୁମାଣ୍ଡି ପଞ୍ଚାୟତ ଭିତରପଡ଼ା ନିକଟରେ ରାସ୍ତା କାର୍ଯ୍ୟରେ ନିୟୋଜିତ ଏକ କମ୍ପାନୀର ଜେସିବି ମେସିନ୍କୁ କେହି ଦୁର୍ବୃତ୍ତ ପୋଡ଼ି ଦେଇଥିବା ଅଭିଯୋଗ ହୋଇଛି। ଉକ୍ତ କାମ ପାଇଁ ବ୍ୟବହୃତ ଆଉ କେତୋଟି ମେସିନ୍କୁ ମଧ୍ୟ ଭାଙ୍ଗି ନଷ୍ଟ କରିଛନ୍ତି।
ଭିତରପଡ଼ା ନିକଟ କର୍ଣ୍ଣକୋଣ୍ଡା ପାହାଡ଼ରେ ବକ୍ସାଇଟ ଖଣିର ମାନ ଓ ପରିମାଣ ପରୀକ୍ଷା ପାଇଁ ରାସ୍ତା ନିର୍ମାଣ କରାଯାଉଛି। ସେହି ରାସ୍ତାରେ କମ୍ପାନୀର ଜେସିବି ମେସିନ ନିୟୋଜିତ ହୋଇଥିଲା। ଉକ୍ତ ପାହାଡ଼ର ୯ ହେକ୍ଟର ପରିମାଣ ଜମିରେ ଥିବା ବକ୍ସାଇଟ ପାଇଁ ମରିଚମାଳ ଗଁାରେ ଓଡ଼ିଶା ମିନେରାଲ ଏକ୍ସପ୍ଲରେସନ ଲିମିଟେଡ ଦ୍ୱାରା ପରୀକ୍ଷଣ ପାଇଁ ଗତ ଫେବୃଆରୀରେ ପ୍ରଶାସନ ପକ୍ଷରୁ ଏକ ଜନଶୁଣାଣି ହୋଇଥିଲା।
ସେତେବେଳେ ଏହାକୁ ଅଞ୍ଚଳବାସୀ ବିରୋଧ କରିଥିଲେ। ପୁଣି ସହମତି ପ୍ରକାଶ ପାଇବା ପରେ ପରୀକ୍ଷଣ ମେସିନଗୁଡ଼ିକ ଉକ୍ତ ପାହାଡ଼ ଉପରକୁ ନେବା ପାଇଁ ଗତ ୩ ମାସ ହେବ ରାସ୍ତା ନିର୍ମାଣ କାମ ଆରମ୍ଭ କରାଯାଉଛି। ୫୦ ପ୍ରତିଶତ କାମ ହୋଇଛି। ଶନିବାର ସନ୍ଧ୍ୟା ୭ଟା ସମୟରେ ରାସ୍ତାରେ ନିୟୋଜିତ ଜେସିବି ମେସିନକୁ ଦୁର୍ବୃତ୍ତମାନେ ନିଅଁା ଲଗାଇ ଜାଳି ଦେଇଛନ୍ତି।
ଗୋଟିଏ ଜେସିବି ମେସିନ ପ୍ରାୟ ପୋଡ଼ି ହୋଇଯାଇଛି। ସନ୍ଧ୍ୟା ୬ଟାରେ କାମ ସାରି ପାହାଡ଼ ତଳକୁ ଓହ୍ଲାଇବା ପରେ ଦୁର୍ବୃତ୍ତମାନେ ଏପରି କାଣ୍ଡ ଘଟାଇଛନ୍ତି ବୋଲି ଜେସିବି ଚାଳକ ରତ୍ନ ଗୌଡ଼ କହିଛନ୍ତି। ଏନେଇ ଥାନାରେ ଏତଲା ଦିଆଯିବ ବୋଲି ଉକ୍ତ କମ୍ପାନୀର କର୍ତ୍ତୃପକ୍ଷ କହିଛନ୍ତି।
Comments are closed.