କଟକ : ଭାରତୀୟ କ୍ରୀଡ଼ା ପ୍ରାଧିକରଣ (ସାଇ), ଭାରତୀୟ ବିଶ୍ବବିଦ୍ୟାଳୟ ସଂଘର ମିଳିତ ସହଯୋଗରେ ଉତ୍ତରପ୍ରଦେଶରେ ଚାଲିଥିବା ତୃତୀୟ ଖେଲୋ ଇଣ୍ଡିଆ ବିଶ୍ବବିଦ୍ୟାଳୟ କ୍ରୀଡ଼ାରେ କିଟ୍ ବିଶ୍ବବିଦ୍ୟାଳୟ ପୁରୁଷ ଓ ମହିଳା ରଗ୍ବୀ ଦଳ ସେମିଫାଇନାଲରେ ପହଞ୍ଚିଛନ୍ତି। ଗୁରୁବାର ପୁରୁଷ ରଗ୍ବୀର ୩ୟ ଲିଗ୍ ମ୍ୟାଚରେ କିଟ୍ ବିଶ୍ବବିଦ୍ୟାଳୟ ୪୦-୦ରେ ଶିବାଜୀ ବିଶ୍ବବିଦ୍ୟାଳୟ କୋହ୍ଲାପୁରକୁ ପରାସ୍ତ କରି କ୍ବାର୍ଟର ଫାଇନାଲରେ ପହଞ୍ଚିଥିଲା। କ୍ବାର୍ଟର ଫାଇନାଲରେ କିଟ୍ ୨୨-୫ରେ କାଲିକଟ୍ ବିଶ୍ବବିଦ୍ୟାଳୟକୁ ପରାସ୍ତ କରି ସେମିଫାଇନାଲରେ ପହଞ୍ଚିଛି। ସେମିଫାଇନାଲରେ କିଟ୍ ଲଭଲି ପ୍ରଫେସନାଲ ବିଶ୍ବବିଦ୍ୟାଳୟ ପଞ୍ଜାବକୁ ଭେଟିବ। ମହିଳା ବର୍ଗ ଶେଷ ଲିଗ୍ ମ୍ୟାଚରେ କିଟ୍ ବିଶ୍ବବିଦ୍ୟାଳୟ ୩୬-୫ରେ ଶିବାଜୀ ବିଶ୍ବବିଦ୍ୟାଳୟ କୋହ୍ଲାପୁରକୁ ପରାସ୍ତ କରି କ୍ବାର୍ଟର ଫାଇନାଲରେ ପହଞ୍ଚିଥିଲା। କ୍ବାର୍ଟର ଫାଇନାଲରେ ୨୦-୦ରେ କିସ୍ ବିଶ୍ବବିଦ୍ୟାଳୟକୁ ପରାସ୍ତ କରି ସେମିଫାଇନାଲରେ ପହଞ୍ଚିଛି। ସେମିଫାଇନାଲରେ କିଟ୍ ଶିବାଜୀ ବିଶ୍ବବିଦ୍ୟାଳୟ କୋହ୍ଲାପୁରକୁ ଭେଟିବ। ମହିଳା ଟେନିସରେ କିଟ୍ ୩-୦ରେ ମହର୍ଷୀ ଦୟାନନ୍ଦ ବିଶ୍ବବିଦ୍ୟାଳୟ ରୋହତକ୍କୁ ପରାସ୍ତ କରିଛି। ମହିଳା ଫୁଟବଲରେ ସମ୍ବଲପୁର ବିଶ୍ବବିଦ୍ୟାଳୟ ପ୍ରଥମ ମ୍ୟାଚରେ ୦-୨ ଗୋଲରେ ଜିଏନ୍ଡିୟୁ ଅମୃତସର ନିକଟରୁ ପରାଜିତ ହୋଇଛି। ସେମିଫାଇନାଲରେ ପ୍ରବେଶ କରିଥିବା କିଟ୍ ପୁରୁଷ ମହିଳା ରଗ୍ବୀ ଦଳ ସହ କିଟ୍ ଟେନିସ ଦଳକୁ କିଟ୍ ଓ କିସ୍ର ପ୍ରତିଷ୍ଠାତା ସାଂସଦ ଡ. ଅଚ୍ୟୁତ ସାମନ୍ତ ଶୁଭେଚ୍ଛା ଜଣାଇବା ସହ ଆଗାମୀ ମ୍ୟାଚର ସଫଳତା କାମନା କରିଛନ୍ତି।
Comments are closed.