ଚୌଦ୍ୱାର : ରାଜ୍ୟର ବିଭିନ୍ନ କାରାଗାରରେ ମାନସିକ ରୋଗରେ ପୀଡ଼ିତ କଏଦୀ ମାନଙ୍କର ସ୍ୱତନ୍ତ୍ର ଚିକିତ୍ସା ପାଇଁ ଜେଲ ବିଭାଗ ତରଫରୁ ସ୍ୱତନ୍ତ୍ର ପଦକ୍ଷେପ ଆରମ୍ଭ କରାଯାଇଛି। କାରାଗାରରେ ରହୁଥିବା କଏଦୀ ପୁର୍ବରୁ ହେଉ ଅବା କାରାଗାରକୁ ଆସି ବିଭିନ୍ନ ପ୍ରକାର ମାନସିକ ରୋଗରେ ଆକ୍ରାନ୍ତ ହୋଉଥିବା ଦୃଷ୍ଟିରୁ ସେମାନଙ୍କୁ ଉପଯୁକ୍ତ ଚିକିତ୍ସା ଓ ପରାମର୍ଶ ପ୍ରଦାନ କରାଯାଇ ସୁସ୍ଥ କରିବା ଏବଂ ସେମାନଙ୍କ ମାନସିକ ସନ୍ତୁଳନକୁ ବଜାୟ ରଖିବା ପାଇଁ ବିଭିନ୍ନ ଦିଗରୁ ପ୍ରୟାସ କରାଯିବ ବୋଲି ଜେଲ ଡିଜି ମନୋଜ ଛାବ୍ରା ସୂଚନା ଦେଇଛନ୍ତି । ଚୌଦ୍ୱାର ମଣ୍ଡଳ କାରାଗାର ପରିସରରେ ବୁଧବାର ଦିନ ମାନସିକ ରୋଗ ବିଶେଷଜ୍ଞ ଡାକ୍ତର ଓ ମନସ୍ତତ୍ୱବିତ୍ ମାନଙ୍କୁ ନେଇ ଅନୁଷ୍ଠିତ କର୍ମଶାଳାରେ ଡିଜି ଶ୍ରୀ ଛାବ୍ରା ଅତିଥି ଭାବେ ଯୋଗଦେଇ ବିଶେଷଜ୍ଞ ଡାକ୍ତର ଓ ମନସ୍ତତ୍ୱବିତ୍ ମାନଙ୍କ ସହିତ ବିଭିନ୍ନ ପରାମର୍ଶ କରିଥିଲେ । ପରେ ସେ ସୂଚନା ଦେଇଥିଲେ ଯେ ମାନସିକ ରୋଗୀଟିକୁ ଉପଯୁକ୍ତ ଚିକିତ୍ସା ଓ ପରାମର୍ଶ ପ୍ରଦାନ କଲେ ସେ ଭବିଷ୍ୟତରେ ଜଣେ ସୁସ୍ଥ ମସ୍ତିଷ୍କ ସମ୍ପନ୍ନ ବ୍ୟକ୍ତ ଭାବେ ସମାଜରେ ନିଜର ପରିଚୟ ସୃଷ୍ଟି କରିପାରିବ। ଓଡିଶାରେ ଥିବା ବିଭିନ୍ନ କାରାଗାରରେ ଏଭଳି ରୋଗୀଙ୍କ ସଂଖ୍ୟା ଅଧିକ ଥିବା ଓ ଏହି ସଂଖ୍ୟା କ୍ରମେ କ୍ରମେ ବଢ଼ୁଥିବା ବେଳେ ସେମାନଙ୍କ ଚିକିତ୍ସା ପାଇଁ ଡାକ୍ତର ଓ ମନସ୍ତତ୍ୱବିତଙ୍କ ଅଭାବ ଥିବା ବେଳେ ଦୀର୍ଘଦିନ ପରେ ୨୭ଜଣ ଅଭିଜ୍ଞ ଡାକ୍ତର ଓ ମନସ୍ତତ୍ୱବିତଙ୍କୁ ନିଯୁକ୍ତି ଦିଆଯାଇଛି । ଏହି ମାନସିକ ରୋଗ ଡାକ୍ତର ଓ ମନସ୍ତତ୍ୱବିତ୍ ମାନେ ଆସନ୍ତା ମେ ମାସରୁ ରାଜ୍ୟର ବିଭିନ୍ନ କାରାଗାରକୁ ଯାଇ ମାନସିକ ରୋଗରେ ପୀଡ଼ିତ କଏଦୀ ମାନଙ୍କର ଚିକିତ୍ସା କରିବେ ବୋଲି ସେ ସୂଚନା ଦେଇଥିଲେ। ଜେଲ ଅଧିକ୍ଷକ ପ୍ରଦୀପ୍ତ କୁମାର ବେହେରାଙ୍କ ପ୍ରତ୍ୟକ୍ଷ ତତ୍ୱାବଧାନାରେ ଅନୁଷ୍ଠିତ ଏହି କର୍ମଶାଳାରେ ଜେଲର ବିଭେନ୍ଦୁ ଭୁୟାଁଙ୍କ ସମେତ କଟକ ବଡମେଡିକାଲର ଡା.ଅଜୟ ମିଶ୍ର, ଡା. ଯଶୋବନ୍ତ ମହାପାତ୍ର, ଡା.ଏଲ.ଏସ୍.ମହାପାତ୍ର ଓ ଡା. ଅନୁରାଧା ମହାପାତ୍ର ପ୍ରମୁଖ ଯୋଗଦେଇ ମାନସିକ ରୋଗ ଚିକିତ୍ସା ସମ୍ପର୍କିତ ବିଭିନ୍ନ ଯୋଜନା ଓ କାର୍ଯ୍ୟାବଳୀ ସମ୍ପର୍କରେ ଆଲୋଚନା କରିବା ସହିତ କାରାଗାରର ମାନସିକ ରୋଗୀ ମାନଙ୍କ ସହିତ ଭାବର ଆଦାନ ପ୍ରଦାନ କରିଥିଲେ।
Popular Categories
Previous article
Next article