କାମାକ୍ଷାନଗର: କାମାକ୍ଷାନଗର ଉପଖଣ୍ଡ ପରଜଙ୍ଗ ଥାନା ମୁଣ୍ଡେଇଲ ଛକ ନିକଟରେ ୩ ଦଫା ଦାବିରେ ୫୩ ନମ୍ବର ଜାତୀୟ ରାଜପଥ ଅବରୋଧ କରିଛନ୍ତି ମୁଣ୍ଡେଇଲ ଗ୍ରାମବାସୀ। ମୁଣ୍ଡେଇଲ ଛକ ନିକଟରେ ଥିବା ଟୋଲଗେଟ ଦେଇ କ୍ଷେତକୁ ଚାଷୀଙ୍କ ଶଗଡ଼ ନେବା ଆଣିବା ପାଇଁ ଏକ ସ୍ୱତନ୍ତ୍ର ରାସ୍ତା ନିର୍ମାଣ ଓ ଟୋଲ ଗେଟର ନାମ ଖଇରାମୁଣ୍ଡାକୁ ପରିବର୍ତ୍ତନ କରି ଗେଲ୍ଲେଇ କାଟେଣୀ କରିବା, କ୍ଷେତକୁ ଜାତୀୟ ରାଜପଥର ବର୍ଷପାଣି ପସି ଫସଲ ନଷ୍ଟ ହେଉଛି ତାହାର ସୁରକ୍ଷା ପାଇଁ କଂକ୍ରିଟ କାନ୍ଥର ବ୍ୟବସ୍ଥା ଆଦି ୩ଦଫା ଦାବିରେ ରାସ୍ତା ରୋକ କରିଛନ୍ତି ଗ୍ରାମବାସୀ। ଫଳରେ ରାସ୍ତାର ଉଭୟ ପାର୍ଶ୍ୱରେ ଶହ ଶହ ଗାଡି ଅଟକି ରହିଥିଲା। ଯେଉଁଥିପାଇଁ ତାଳଚେର-ଡ଼ୁବୁରୀ ଯାତାୟତ ଏକ ପ୍ରକାର ଠପ୍ ହୋଇଯାଇଥିଲା। ସେପଟେ ଘଟଣା ସ୍ଥଳରେ ପୁଲିସ ପହଞ୍ଚି ବୁଝାସୁଝା କରିଥିଲେ ହେଁ ଗ୍ରାମବାସୀ କୌଣସି କଥା ଶୁଣିବାକୁ ପ୍ରସ୍ତୁତ ନଥିଲେ। ପରଜଙ୍ଗ ତହସିଲଦାର ପହଞ୍ଚି ଗ୍ରାମବାସୀଙ୍କୁ ବୁଝାସୁଝା କରି ଯଥା ସମ୍ଭବ ପଦକ୍ଷେପ ନେବାକୁ ପ୍ରତିଶୃତି ଦେବା ପରେ ଗାଡି ଚଳାଚଳ ସ୍ୱାଭାବିକ ହୋଇଥିଲା।
Comments are closed.