ଲୁଧିଆନା – ପଞ୍ଜାବର ଲୁଧିଆନାରେ ମଦ୍ୟପ ସ୍ୱାମୀଙ୍କୁ ହତ୍ୟା କରିବା ପରେ ଜଣେ ମହିଳା ତାଙ୍କ ଆତ୍ମୀୟ ସ୍ୱଜନଙ୍କୁ ହୃଦଘାତରେ ତାଙ୍କର ମୃତ୍ୟୁ ହୋଇଥିବା କଥା କହିଥିଲେ । ମୃତକ ଜଣଙ୍କ ପ୍ରଚୁର ମଦ୍ୟପାନ କରୁଥିବାରୁ ପରିବାର ଲୋକ ମଧ୍ୟ ବିଶ୍ୱାସ କରିଯାଇଥିଲେ।
ହେଲେ ଅନ୍ତିମ ସଂସ୍କାର ସମୟରେ ମୃତକଙ୍କ ଶରୀରରେ କିଛି ଆଘାତର ଚିହ୍ନ ତାଙ୍କ ଭାଇ ଦେଖିବା ପାଇଁ ପାଇଥିଲେ । ସେ ତୁରନ୍ତ ପୁଲିସକୁ ଖବର ଦେଇଥିଲେ । ପୁଲିସ ଘଟଣାସ୍ଥଳରେ ପହଞ୍ଚି ଅନ୍ତିମ ସଂସ୍କାରକୁ ରୋକିଥିଲେ ।
ମୃତକ ମଦ୍ୟପାନ କରିବା ପରେ ତାଙ୍କ ସ୍ତ୍ରୀ ଏବଂ ଝିଅକୁ ପ୍ରବଳ ମାଡ ମାରୁଥିବା ଅଭିଯୋଗ ହୋଇଛି । ଘଟଣା ଘଟିବା ରାତିରେ ସେ ମଧ୍ୟ ସ୍ତ୍ରୀ ଏବଂ ଝିଅକୁ ମାଡ ମାରିଥିଲେ । ଏଥିରେ ତାଙ୍କ ସ୍ତ୍ରୀ ରାଗିଯାଇ ଏକ କପଡାରେ ତାଙ୍କ ବେକକୁ ଭିଡି ଧରିବାରୁ ଶ୍ୱାସରୁଦ୍ଧ ହୋଇ ତାଙ୍କର ମୃତ୍ୟୁ ହୋଇଥିଲା । ରାତିରେ ମୃତ ଦେହ ସହ ରହି ସକାଳେ ସେ ତାଙ୍କ ବନ୍ଧୁବାନ୍ଧବଙ୍କୁ ହୃଦଘାତରେ ମୃତ୍ୟୁ ହୋଇଥିବା କଥା କହିଥିଲେ ।
ମଦ୍ୟପାନ କରୁଥିବାରୁ ହୃଦଘାତ ହୋଇଥିବା କଥା ସମସ୍ତେ ବିଶ୍ୱାସ କରିଥିଲେ। ହେଲେ ମୃତକଙ୍କ ଭାଇଙ୍କ ଅଭିଯୋଗ ପରେ ପୁଲିସ ଅନ୍ତିମ ସଂସ୍କାର କାର୍ଯ୍ୟ ରୋକି ଶବ ଜବତ କରିଥିଲା । ପରେ ତାଙ୍କ ପତ୍ନୀ ତାଙ୍କୁ ହତ୍ୟା କରିଥିବା ସ୍ୱୀକାର କରିବା ପରେ ପୁଲିସ ତାଙ୍କୁ ଗିରଫ କରିଛି ।
