ଗୌହ୍ବାଟି: ସିକ୍କିମର ନାଥୁ ଲାରେ ବଡ଼ ଧରଣର ହିମସ୍ଖଳନ ଘଟି ୭ ଜଣ ପର୍ଯ୍ୟଟକଙ୍କ ମୃତ୍ୟୁ ଘଟିଛି। ଏଥିସହ ୧୧ ଜଣ ଆହତ ହୋଇଥିବା ଜଣାପଡ଼ିଛି। ବହୁ ସଂଖ୍ୟକ ପର୍ଯ୍ୟଟକ ବରଫରେ ଫସି ରହିଥିବା ବେଳେ ସେନା ଯବାନଙ୍କ ପକ୍ଷରୁ ଉଦ୍ଧାର କାର୍ଯ୍ୟ ଜାରି ରହିଛି। ହିମସ୍ଖଳନ ସମୟରେ ୧୫୦ରୁ ଊର୍ଦ୍ଧ୍ବ ପର୍ଯ୍ୟଟକ ଏହି ଅଞ୍ଚଳରେ ଥିବା ସୂଚନା ମିଳିଛି।
ସେନା ଅଧିକାରୀ କହିଛନ୍ତି ଯେ, ଗାଙ୍ଗଟକକୁ ନାଥୁଲା ସହିତ ସଂଯୋଗ କରୁଥିବା ଜବାହରଲାଲ ନେହେରୁ ରୋଡରେ ଘଟିଥିବା ହିମସ୍ଖଳନରେ ୭ ଜଣ ପର୍ଯ୍ୟଟକଙ୍କ ମୃତ୍ୟୁ ଘଟିଥିବାବେଳେ ୮୦ରୁ ଅଧିକ ଲୋକ ବରଫ ଅତଡ଼ା ତଳେ ଫସି ରହିଥିବାର ଆଶଙ୍କା କରାଯାଉଛି।
ସୂଚନା ଅନୁସାରେ, ମଙ୍ଗଳବାର ଦିନ ପ୍ରାୟ ୧୧.୩୦ ସମୟରେ ଏହି ହିମସ୍ଖଳନ ଘଟିଛି। ଏଥିରେ ଆହତ ହୋଇଥିବା ୭ ଜଣଙ୍କର ନିକଟସ୍ଥ ଆର୍ମି ହସ୍ପିଟାଲରେ ମୃତ୍ୟୁ ଘଟିଛି। ମୃତକଙ୍କ ମଧ୍ୟରେ ଚାରି ପୁରୁଷ, ଜଣେ ମହିଳା ଏବଂ ଗୋଟିଏ ଶିଶୁ ରହିଛନ୍ତି।
ପୁଲିସର ସୂଚନାନୁସାରେ, ଇତି ମଧ୍ୟରେ ବରଫରେ ଫସି ରହିଥିବା ୩୦ ପର୍ଯ୍ୟଟକଙ୍କୁ ଉଦ୍ଧାର କରାଯାଇ ଗାଙ୍ଗଟକର ଏସଟିଏନଏମ ହସ୍ପିଟାଲ ଏବଂ ସେଣ୍ଟ୍ରାଲ ରେଫରାଲ ହସ୍ପିଟାଲରେ ଭର୍ତ୍ତି କରାଯାଇଛି।
ଚେକପୋଷ୍ଟର ଇନ୍ସପେକ୍ଟର ଜେନେରାଲ ସୋନମ ତେନଜିଙ୍ଗ ଭୁଟିଆଙ୍କ ସୂଚନା ଅନୁଯାୟୀ, ‘‘କେବଳ ୧୩ ମାଇଲ ପାଇଁ ପାସ୍ ଜାରି କରାଯାଇଥାଏ, କିନ୍ତୁ ପର୍ଯ୍ୟଟକମାନେ ବିନା ଅନୁମତିରେ ୧୫ ମାଇଲ ଆଡକୁ ଯାଇଥିଲେ। ଘଟଣା ୧୫ ମାଇଲରେ ଘଟିଛି।’’
