ଗୁରୁଡିଝାଟିଆ : ଭକ୍ତି, ଭାବ ଓ ବିଶ୍ୱାସର ଗାଥା ମା’ ବାସନ୍ତୀ ଦୂର୍ଗାଙ୍କ ପାହାଡି ଉତ୍ସବ। ବିଜ୍ଞାନ ଯୁଗରେ ଦେବୀଙ୍କୁ ବିସର୍ଜନ ପାଇଁ ଯନ୍ତ୍ରଚାଳିତ ଗାଡିରେ ନିଆଯାଏ । ହେଲେ ଗୁରୁଡିଝାଟିଆ-କୋତର ମା’ ବାସନ୍ତୀଦୂର୍ଗାଙ୍କ ଅଲୌକିକ ମହିମା । ଏବେ ବି ଶ୍ରଦ୍ଧାଳୁଭକ୍ତମାନେ ମାଆଙ୍କୁ ପୀଠରୁ ୩ କିମି କାନ୍ଧରେ ନେଇ ଛୋଟିଆମ୍ବ ଗ୍ରାମର ପୋଖରୀରେ ବିସର୍ଜନ କରିଥାନ୍ତି । ବାଟରେ ଶହଶହ ସଂଖ୍ୟାରେ ମନସ୍କାମନାଧାରୀଙ୍କ ଗୁହାରୀ ପଡିବା ଦୃଶ୍ୟ ଯେଭଳି ହୃଦୟକୁ ଦୋହଲାଇ ଦିଏ ଅନୁରୂପ ଭାବେ ନୂଆଲୁଗା ପାହାଡି ପରାଯିବା ପରମ୍ପରା ମଧ୍ୟ ୭୭ ବର୍ଷର । ମାଆଙ୍କ ସ୍ପର୍ଶ ହେଲେ ନୂଆଲୁଗା ପରିବାର ଓ ବ୍ରତଧାରୀଙ୍କ ପାଇଁ ଆଶୀର୍ବାଦର ରେଣୁ ଢାଳିଥାଏ ବୋଲି ବିଶ୍ୱାସ କରାଯାଏ । ଶନିବାର ଅପରାହ୍ନରେ ଶହଶହ ଶ୍ରଦ୍ଧାଳୁଙ୍କ ଗହଣରେ ମାଆଙ୍କୁ ମେଲାଣି ଦିଆ ଯାଇଥିଲା।
ପୂଜା କମିଟିର ସଭାପତି ବସନ୍ତ କୁମାର ସାହାଣୀ, ସଂପାଦକ ଅମରେନ୍ଦ୍ର ଧଳ, ଦେବାଶିଷ ବିଶ୍ୱାଳ, ଚନ୍ଦନ କୁମାର ବିଶ୍ୱାଳ, ରଶ୍ମୀରଞ୍ଜନ ସାହାଣୀ, ହୃଦାନନ୍ଦ ସାହାଣୀ, ମନୋଜ କୁମାର ସାହୁ ପବିତ୍ର କୁମାର ସାହାଣୀ ଓ ସରପଞ୍ଚଙ୍କ ପ୍ରତିନିଧି ସନାତନ ଦଳାଇ ପ୍ରମୁଖଙ୍କ ସହିତ ଗାଁର ମୁରବୀ ଓ ଯୁବକମାନେ ଉପସ୍ଥିତ ରହି ପାହାଡି ଯାତ୍ରା ତଥା ଭସାଣୀ ଉତ୍ସବରେ ସକ୍ରିୟ ଅଂଶଗ୍ରହଣ କରିଥିଲେ। ଗୁରୁଡିଝାଟିଆ ଥାନା ଅଧିକାରୀ ରଞ୍ଜନ କୁମାର ପ୍ରଧାନଙ୍କ ପ୍ରତ୍ୟେକ୍ଷ ତତ୍ୱାବଧାନରେ ଶାନ୍ତିଶୃଙ୍ଖଳା ରକ୍ଷା ପାଇଁ ପୁଲିସ ଫୋର୍ସ ମୁତୟନ ହୋଇଥିଲେ। ଜିଲ୍ଲାର ବିଭିନ୍ନ ପ୍ରାନ୍ତରୁ ଶ୍ରଦ୍ଦାଳୁମାନେ ଉପସ୍ଥିତ ରହି ପାହାଡି ଉତ୍ସବରେ ଯୋଗ ଦେଇଥିଲେ।
