ଭୁବନେଶ୍ବର: ପଶ୍ଚିମାଝଡ଼ ତଥା କାଳବୈଶାଖୀ ପ୍ରଭାବରେ ଆଜିଠାରୁ ଦୁଇଦିନ ଧରି ରାଜ୍ୟର ବିଭିନ୍ନ ଅଞ୍ଚଳରେ ବିଜୁଳି ଘଡ଼ଘଡ଼ି ସହ ବର୍ଷା ପବନର ସମ୍ଭାବନା ରହିଛି। ଉପକୂଳ ଏବଂ ଆଭ୍ୟନ୍ତରୀଣ ଓଡ଼ିଶାରେ ଏହାର ପ୍ରଭାବ ଅଧିକ ରହିବାର ଆଶଙ୍କା ରହିଛି। ଏଥିପାଇଁ କେତେକ ଜିଲାକୁ ଭୁବନେଶ୍ବର ପାଣିପାଗ ବିଜ୍ଞାନ କେନ୍ଦ୍ର ପକ୍ଷରୁ ହଳଦିଆ ସତର୍କ ସୂଚନା ଜାରି କରାଯାଇଛି। ଅନ୍ୟପଟେ ପାଣିପାଗ ବିଶେଷଜ୍ଞ ଶରତ ଚନ୍ଦ୍ର ସାହୁ କହିଛନ୍ତି, କାଳବୈଶାଖୀ ପ୍ରଭାବ ଏପ୍ରିଲ ୩ ପର୍ଯ୍ୟନ୍ତ ରହିବ। ୨୬ ଓ ୨୭ରେ କାଳବୈଶାଖୀ ଜନିତ ବର୍ଷା ପବନ ହେବାକୁ ଥିବାବେଳେ ପୁଣି ମାର୍ଚ୍ଚ ୩୧ରୁ ଏପ୍ରିଲ ୩ ପର୍ଯ୍ୟନ୍ତ କାଳବୈଶାଖୀ ଜନିତ ବିଜୁଳି ଘଡ଼ଘଡ଼ି ସହ ବର୍ଷା ହେବାର ସମ୍ଭାବନା ରହିଛି। ଏହି ସମୟ ପରିଧିରେ ସର୍ବାଧିକ ତାପମାତ୍ରା ବୃଦ୍ଧିର ସମ୍ଭାବନା ନ ଥିବାବେଳେ ଏପ୍ରିଲ ୪ରୁ ଦିନ ତାପମାତ୍ରା ବଢ଼ିବ।
୩ ଦିନ ବ୍ୟବଧାନ ପରେ ପୁଣିଥରେ ଓଡ଼ିଶା ଉପରେ ପଶ୍ଚିମାଝଡ଼ ପ୍ରଭାବ ଅନୁଭୂତ ହେବ। ଆସନ୍ତା ୨୪ ଘଣ୍ଟା ମଧ୍ୟରେ କେନ୍ଦୁଝର, ମୟୂରଭଞ୍ଜ ଯାଜପୁର, ବାଲେଶ୍ବର, ଭଦ୍ରକ, ଅନୁଗୋଳ, ଢେଙ୍କାନାଳ, ରାୟଗଡ଼ା, କନ୍ଧମାଳ, ଗଞ୍ଜାମ, ଗଜପତି, ନୟାଗଡ଼ ଏବଂ ଖୋର୍ଦ୍ଧା ଜିଲାର କିଛି ସ୍ଥାନରେ ବଜ୍ରପାତ ସହ ଘଣ୍ଟାପ୍ରତି ୪୦କିମିରୁ ୫୦କିମି ବେଗରେ ପବନ ବହିପାରେ। ମୟୂରଭଞ୍ଜ, ବାଲେଶ୍ବର, ଗଞ୍ଜାମ ଏବଂ ଗଜପତି ଜିଲାରେ କୁଆପଥର ମାଡ଼ ହେବାର ସମ୍ଭାବନା ରହିଛି। କେନ୍ଦ୍ରାପଡ଼ା, କଟକ, ଜଗତସିଂହପୁର, ପୁରୀ, ସୁନ୍ଦରଗଡ଼, କଳାହାଣ୍ଡି, ମାଲକାନଗିରି ଏବଂ କୋରାପୁଟ ଜିଲାର କିଛି ସ୍ଥାନରେ ବଜ୍ରପାତ ନେଇ ପାଣିପାଗ ବିଭାଗ ପକ୍ଷରୁ ଉପରୋକ୍ତ ଜିଲାଗୁଡିକୁ ହଳଦିଆ ସତର୍କ ସୂଚନା ଜାରି କରାଯାଇଛି। ସ୍ବତନ୍ତ୍ର ରିଲିଫ୍ ଆୟୁକ୍ତ (ଏସ୍ଆରସି) ସମସ୍ତ ଜିଲାପାଳଙ୍କୁ ସତର୍କ ରହିବାକୁ ଚିଠି ଲେଖିଛନ୍ତି।
୨୭ ତାରିଖରୁ ବର୍ଷାର ବିସ୍ତୃତି ବଢ଼ିବ। ସମଗ୍ର ଉପକୂଳ ଜିଲାରେ ବିଜୁଳି ଘଡ଼ଘଡ଼ି ସହ ବର୍ଷା ହେବ ଏବଂ ପବନର ବେଗ ଘଣ୍ଟା ପ୍ରତି ୩୦କିମିରୁ ୪୦କିମି ରହିବ। ବଜ୍ରପାତ, କୁଆପଥର ମାଡ଼, ବର୍ଷା ଓ ପବନକୁ ନେଇ ପ୍ରସ୍ତୁତ ରହିବାକୁ ଏସ୍ଆର୍ସି ଜିଲାପାଳଙ୍କୁ ନିର୍ଦେଶ ଦେଇଛନ୍ତି। ସତର୍କତା ଜାରି ହୋଇଥିବା ଜିଲାଗୁଡ଼ିକ ଉପରେ ପ୍ରଶାସନ ପକ୍ଷରୁ ସତର୍କ ନଜର ରଖିବା, ଲୋକମାନେ ବର୍ଷା, ପବନ ଓ ବଜ୍ରପାତ ସମୟରେ ସୁରକ୍ଷିତ ସ୍ଥାନରେ ଆଶ୍ରୟ ନେବା, ତଳିଆ ଓ ସହରାଞ୍ଚଳରେ ଲୋକଙ୍କୁ ଜଳବନ୍ଦୀ ପରିସ୍ଥିତିରୁ ରକ୍ଷା କରିବାକୁ ଜଳ ନିଷ୍କାସନର ବ୍ୟବସ୍ଥା କରିବା, ବର୍ଷା ପରିମାଣ ସଂକ୍ରାନ୍ତରେ ସାଙ୍ଗେ ସାଙ୍ଗେ ଅବଗତ କରିବାକୁ କୁହାଯାଇଛି।
